Ponpon  არის ქართული საბავშვო ბრენდი, რომელიც ქმნის და აწარმოებს უმაღლესი ხარისხის ტანსაცმელსა და აქსესუარებს. მეტი ინფორმაციისთვის, Business Insider Georgia ბრენდის თანადამფუძნებელს ანუკა მეგრელიშვილს ესაუბრა.

„Ponpon არის ქართული საბავშვო ბრენდი, რომელიც ქმნის და აწარმოებს უმაღლესი ხარისხის ტანსაცმელსა და აქსესუარებს 0-დან 10 წლამდე ასაკის ბავშვებისთვის. ჩვენი მთავარი მიზანია მომხმარებლებს შევთავაზოთ კომფორტული, უსაფრთხო და განსხვავებული დიზაინის პროდუქცია “, - ამბობს კომპანიის თანადამფუძნებელი.

ბრენდის ასორტიმენტი მოიცავს როგორც ყოველდღიურ, ისე განსაკუთრებული დღეებისთვის განკუთვნილ ტანისამოსს.

„ჩვენი ასორტიმენტი მოიცავს, როგორც ყოველდღიურ ტანსაცმელს, ისე განსაკუთრებული დღეებისთვის შექმნილ „აუტფიტებს“. Ponpon-ის კოლექციებში შეხვდებით ნაზ ფერებს, ბუნებრივ ქსოვილებსა და თანამედროვე დიზაინს, რომელიც ბავშვურ თავისუფლებასა და ელეგანტურობას აერთიანებს. გარდა ტანსაცმლისა, ვქმნით აქსესუარებსაც - ქუდებს, ჩანთებს და სხვა დეტალებს, რომლებიც მთლიანობაში ქმნიან Ponpon-ის უნიკალურ სტილს “, - აღნიშნავს ანუკა მეგრელიშვილი.

Ponpon-ი თბილი და გულწრფელი ბრენდია ბავშვებისთვის, რასაც სხვადასხვა ფაქტორი განაპირობებს.

„Ponpon-ში გვჯერა, რომ ბედნიერი გუნდი ქმნის ბედნიერ ბრენდს. ვაფასებთ შემოქმედებითობას, ინიციატივასა და ერთმანეთის მხარდაჭერას. თითოეულ თანამშრომელს ვაძლევთ საშუალებას საკუთარი იდეებით ჩაერთოს პროცესებში, იქნება ეს დიზაინი, წარმოება თუ კომუნიკაცია. სწორედ ამ ერთიანმა შთაგონებამ შექმნა Ponpon-ი ისეთი, როგორიც დღეს არის - თბილი და გულწრფელი ბრენდი ბავშვებისთვის “, - აცხადებს კომპანიის თანადამფუძნებელი.

ბრენდი სამომავლოდ კოლექციების გამრავალფეროვნებასა და საერთაშორისო ბაზრებზე პოზიციონირებას გეგმავს.

„მომავალში ვგეგმავთ Ponpon-ის კოლექციების გაფართოებას და საერთაშორისო ბაზრებზე პოზიციონირებას. ჩვენი მიზანია, ქართულმა ხარისხმა და დიზაინმა ბავშვთა მოდის სფეროში ღირსეულად დაიმკვიდროს ადგილი არა მხოლოდ საქართველოში, არამედ მის ფარგლებს გარეთაც.

სწორედ ამ მიზნის ფარგლებში, Ponpon წელს გეგმავს მონაწილეობას Playtime New York-ის გამოფენაზე. ეს იქნება მნიშვნელოვანი ნაბიჯი ბრენდის საერთაშორისო ცნობადობის გაზრდისა და ახალი თანამშრომლობების დამყარებისკენ “, - განმარტავს ანუკა მეგრელიშვილი.

ცნობისთვის, ბრენდი ორი დედის - ლიკუნა რატიანისა და ანუკა მეგრელიშვილის სიყვარულითა და ხედვით დაიბადა. პროდუქციის წარმოებაში მაღალი ხარისხის ორგანული ბამბა გამოიყენება და ყოველ ნივთს გამორჩეული დეტალი და აქსესუარი ემატება, რაც ბავშვებისათვის განკუთვნილ ყოველდღიურ სამოსს უფრო ახალისებს.