გურული ფაცხა „დოლაბი“ „გემო ფესტში“ მონაწილეობით კმაყოფილია. 

„ჩვენ უკვე 4 წელია ბაზარზე ვართ, და ჩვენი მომხმარებლები არიან როგორც ქართველები, ასევე უცხოელები. აქტიურად ვიღებთ შეკვეთებს სოციალური ქსელებით. ძალიან ბევრი მომხმარებელი გვყავს და ხშირად შეკვეთებსაც ვეღარ ვიღებთ, რადგან ფიზიკურად ვერ ვასწრებთ. განსაკუთრებით ზაფხულში ძალიან დატვირთულები ვართ. „გემო ფესტის“ განმავლობაში ჩვენს ლოკაციაზე სტუმრების ნაკლებობა ნამდვილად არ იგრძნობოდა. პირიქით - მოგვიწია სტუმრებისთვის უარის თქმაც, რის გამოც ყველას ფესტივალზე ვეპატიჟებოდით.

მჯერა, რომ თუ მსგავს ფესტივალებში მონაწილეობ, მეტ ახალ ადამიანს გაიცნობ და ეს მნიშვნელოვანი ნაბიჯია მიზნების მისაღწევად და წარმატებისთვის. ბევრ რამეზე რომ უარი მეთქვა, დღეს აქ არ ვიქნებოდი. მთავარია, რომ ასეთ გამოწვევებზე, უარი არ თქვა. არ ველოდით ამდენ სტუმარს და ასეთ გამოხმაურებას.

„გემო ფესტის“ სტუმრებს შევთავაზეთ ჩვენი საავტორო კერძი - ღორის ხორცი ჩაშუშული გურულ აჯიკასა და პრასის-მწვანე ხახვის სოუსში, მჭადის ჩიფსებით, რომელიც მზადდება გურული სუნელებით. ასევე წარვადგინეთ "დედს კექსი" - ძველი რეცეპტით მომზადებული კექსი. პირველივე დღეს ამოგვეწურა ორდღიანი მარაგი და მოგვიწია თავიდან შევსება.

ამ ფესტივალს დიდი ხანია ვადევნებდი თვალს და სულ მქონდა კითხვა, რატომ არ ტარდებოდა გურიაში. როდესაც გავიგე, რომ გურიაში ჩატარდებოდა, სიხარულით მივიღეთ მონაწილეობა და სამომავლოდაც აუცილებლად გავაგრძელებთ. ყველას ვურჩევ მონაწილეობას - ასეთი ფესტივალები მეწარმეებისთვის ნამდვილად არის განვითარების და ახალი შესაძლებლობების გზა,“ - ამბობს ეკა სალუქვაძე.

მისივე თქმით, „დოლაბისთვის“ 2025 წელი განსაკუთრებული აღმოჩნდა - არსებობის ოთხწლიანი ისტორიის განმავლობაში ასეთი დატვირთული წელი ჯერ არ ჰქონიათ.

აღსანიშნავია, რომ 23-24 აგვისტოს შეკვეთილში, მუსიკოსთა პარკში, ტურიზმის ეროვნული ადმინისტრაციის ორგანიზებით გასტრონომიული ფესტივალი „გემო ფესტი“ გაიმართა.

ფესტივალში მონაწილეობის მსურველებს გამოცდილმა შეფმზარეულებმა ტრენინგი ჩაუტარეს და შედეგად 13 მონაწილე შეირჩა ოზურგეთის, ლანჩხუთისა და ჩოხატაურის მუნიციპალიტეტებიდან.

მონაწილეებს შესაძლებლობა ჰქონდათ, წარმოედგინათ როგორც ტრადიციული, ასევე იშვიათი და ნაკლებად ცნობილი გურული კერძები, რომლებიც ფესტივალის სტუმრებმა დააგემოვნეს.