ხუდონჰესი არის უმნიშვნელოვანესი პროექტი, არამარტო ენერგეტიკისთვის, არამედ მთელი ქვეყნისთვის, - ამის შესახებ Business Insider Georgia-სთან კომპანია "ბემონის" მმართველმა პარტნიორმა გიორგი მირცხულავამ განაცხადა. მისი თქმით, ისეთი პროექტის განხორციელება, როგორიც არის ხუდონის პროექტი, ქვეყნის ეკონომიკური სიძლიერისთვის მნიშვნელოვანია.

„როდესაც ჩვენ ვლაპარაკობთ ენერგოდამოუკიდებლობაზე, ალბათ მთავარი როლი ამ ენერგოდამოუკიდებლობაში ხუდონჰესს უკავია. კიდევ არის რამდენიმე დიდი ჰიდროპროექტი, რომელიც უმნიშვნელოვანესია ჩვენი ქვეყნისათვის.

ძალიან სამწუხაროა, რომ ჩვენ ვერ შევძელით საბჭოთა კავშირის შემდგომ პერიოდში ამ პროექტის განხორციელება, იმიტომ რომ ეს პროექტი და სხვა დიდი ჰიდროპროექტები რომ განხორციელებულიყო, საქართველო ეკონომიკური სიძლიერით, ენერგოდამოუკიდებლობით თვისობრივად სხვა საფეხურზე იქნებოდა და ბევრად უფრო დიდი მოთამაშე იქნებოდა ჩვენს რეგიონში ენერგეტიკის კუთხით.

რაც შეეხება პრემიერის განცხადებას, რომ შესაძლოა პოტენციურად სახელმწიფო იყოს ერთ-ერთი თანაინვესტორი. მე მივესალმები ამას. ალბათ აუცილებლობაც არის, რადგანაც კერძო ინვესტორებმა ვერ შეძლეს ამ პროექტის განხორციელება და შესაძლებელია სწორედ სახელმწიფოს თანამონაწილეობით გახდეს ეს შესაძლებელი.

რა თქმა უნდა, სწორი კომუნიკაციით ადგილობრივ მოსახლეობასთან და სწორი საინჟინრო გადაწყვეტის პოვნით. მაგრამ თუ ჩვენ გვინდა, რომ საქართველოში ერთხელ და სამუდამოდ ყველაზე დიდი სიმდიდრე რაც გაგვაჩნია, ეს არის ჰიდრო, დიდი რამდენიმე სულ ჰიდროპროექტი განვახორციელოთ, რა თქმა უნდა მთავარი მათ შორის და უპირველესი არის ხუდონჰესი“, - აღნიშნა გიორგი მირცხულავამ.

მისივე თქმით, ამა თუ იმ პროექტზე თუ ჩარევა გარედან მომდინარეობს მათი გაუნებელყოფა შესაბამისი ორგანოების საქმე, მაგრამ თუ წინააღმდეგობა ადგილობრივების მხრიდან მოდის, მნიშვნელოვანია მათთან სწორი და სამართლიანი კომუნიკაცია.

„რაც შეეხება ადგილობრივ მოსახლეობასთან, მათთან არის საჭირო ასე ვთქვათ სამართლიანი, ღია საუბარი და ახსნა. და შევახსენებ მოსახლეობას, რომ არც ენგურჰესი არ აშენებულა ისე, რომ არ მომხდარა იქიდან ვთქვათ რაღაცა ნაწილი მოსახლეობის გასახლება, იგივე ჟინვალზე შემიძლია ვთქვა და ყველა დიდ პროექტზე. ან თუნდაც ჩვენ რომ ვაშენებთ ვთქვათ სახელმწიფო მნიშვნელობის გზებს, იქაც ხდება გასახლება, ხდება კომპენსაციის გადახდა და მოსახლეობის გაყვანა, იმიტომ რომ არის სახელმწიფო ინტერესი. და ამ შემთხვევაში ადგილობრივმა მოსახლემ უნდა მიიღოს სამართლიანი კომპენსაცია და მოხდეს ვთქვათ მისი უფლებების გათვალისწინება.

როდესაც ქვეყნის ინტერესზე ლაპარაკი, თითოეულმა ჩვენგანმა უნდა პირველ რიგში ქვეყნის ინტერესი დააყენოს წინ. მაგრამ კიდევ ერთხელ ხაზს ვუსვამ, უნდა იყოს სამართლიანი კომპენსაცია და ღია ლაპარაკი - ახსნა რატომ, რისთვის, რა სარგებელი აქვს ამით ქვეყანას და ამ ადამიანის ეკონომიკური მდგომარეობა არ უნდა გაუარესდეს, თუ არ გაუმჯობესდება“, - განმარტავს გიორგი მირცხულავა. 

კომპანია "ბემონის" მმართველი პარტნიორის თქმით, მის ხელთ არსებული ინფორმაციით ხუდონის აშენების შემდეგ ხუდონის გამომუშავება თითქმის უტოლდება ენგურჰესის ქართულ წილს.

„გეტყვით, რომ ხუდონის დაგროვებული წყალი მერე მიემართება ენგურის კაშხალში.  ზევით დაგროვდება ხუდონზე, შემდეგ ეს წყალი მიემართება ენგურის კაშხალში და შესაბამისად ჩვენ უფრო მეტი გამომუშავება გვექნება ენგურჰესზე. ენგურჰესი არის ქვაკუთხედი ჩვენი ტარიფის, იმიტომ რომ დაბალი ფასი არის ენგურის ტარიფის და ის აბალანსებს მთლიანად ვთქვათ ჩვენს ტარიფს“, - აღნიშნა გიორგი მირცხულავამ. 

დღეს ცნობილი გახდა, რომ „ხუდონჰესის“ პროექტი შესაძლოა სახელმწიფოს თანამონაწილეობით განხორციელდეს,

დღეს არ არის გამოკვეთილი არც ერთი კონკრეტული ინვესტორი, რომელზეც შეიძლება ითქვას, რომ ის იქნება დაკავებული „ხუდონჰესის" პროექტით, დღეს ეკონომიკის სამინისტრო უშუალოდ ამუშავებს ამ პროექტს, მათ შორის იმისათვის, რომ გაამზადოს წინადადებები ინვესტორებისთვის, - ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს განუცხადა.

როგორც მთავრობის მეთაურმა აღნიშნა, „ხუდონჰესი" არის ერთ-ერთი უმნიშვნელოვანესი სტრატეგიული პროექტი, რომელიც მაქსიმალურად სწრაფი ტემპით განხორციელდება.

„დღეს არ არის გამოკვეთილი არც ერთი კონკრეტული ინვესტორი, რომელზეც შეიძლება ითქვას, რომ ის იქნება დაკავებული „ხუდონჰესის" პროექტით. დღეს ეკონომიკის სამინისტრო უშუალოდ ამუშავებს ამ პროექტს, მათ შორის იმისათვის, რომ გაამზადოს წინადადებები ინვესტორებისთვის. ეს არის დღევანდელი მდგომარეობა. ეს არის ერთ-ერთი უმნიშვნელოვანესი სტრატეგიული პროექტი, რომელიც მაქსიმალურად სწრაფი ტემპით განხორციელდება. ეს არის ეკონომიკის სამინისტროს ერთ-ერთი დავალება, რაზეც აქტიურად მუშაობს ეკონომიკის სამინისტროს მთელი გუნდი, მათ შორის პირველ რიგში ენერგეტიკის სფეროში მომუშავე გუნდი", - განაცხადა პრემიერ-მინისტრმა.

კითხვაზე, „ხუდონჰესს" სახელმწიფო ააშენებს თუ ინვესტორი, პრემიერ-მინისტრმა აღნიშნა, რომ ეს საკითხი უნდა გადაწყდეს მოლაპარაკებების საფუძველზე პოტენციურ ინვესტორებთან.

„ჩვენ არ გამოვრიცხავთ სახელმწიფოს თანამონაწილეობასაც ამ პროექტის განხორციელებაში, ფინანსურ ნაწილს ვგულისხმობ", - განაცხადა ირაკლი კობახიძემ.