businessinsider.ge - ბიზნესი

ბიზნესი

თბილისი დრაი პორტი პირველ ტვირთებს მომავალ კვირაში ელოდება

01.05.2025.10:00

თბილისი დრაი პორტის (Tbilisi Dry Port) პირველი ფაზის მშენებლობა უკვე დასრულდა ის პოსტი მზადაა ტვირთების მისაღებად, - ამის შესახებ Business Insider Georgia-სთან საუბრისას თბილისი დრაი პორტის გენერალურმა დირექტორმა ნინო ნემსაძემ განაცხადა.

როგორც კომპანია თბილისი დრაი პორტის გენერალური დირექტორი აცხადებს, პორტში პირველი ტვირთი მომავალ კვირაში შევა.

„ყველა ნებართვა რაც ოპერირებისთვის იყო აუცილებელი უკვე მიღებული გაქვს. ეს არის საბაჟო საწყობის ნებართვა, რკინიგზის ექსპლუატაციისთვის აუცილებელი ნებართვები. ფაქტობრივად გახსნილები ვართ და პირველ მატარებელს უკვე მომავალ კვირაში ველოდებით, რომელიც პორტში პირველ ტვირთებს შემოიტანს. მატარებელი ჩვენთან შემოვა ფოთის პორტიდან, ხოლო ტვირთი რა ტიპის იქნება და ფოთში საიდან შემოვა ეს ჯერ ჩვენთვის უცნობია.

ჩვენ ამ წუთას შესაძლებლობა გაქვს, რომ 100 ათას TEU-მდე ტვირთბრუნვა გვქონდეს წლის განმავლობაში. შესაბამისად იმედია მაქვს, რომ წლის ბოლოსთვის საშუალოდ ამ ბრუნვას მივუახლოვდებით“, - აღნიშნა ნინო ნემსაძემ.

თბილისი დრაი პორტის პირველი ფაზის დასრულების შემდეგ იწყება მეორე ფაზის განხორციელება. როგორც ნინო ნემსაძე ამბობს, ამ დროისათვის საპროექტო სამუშაოები მიმდინარეობს.

„მეორე ფაზის პროექტირება ამ ეტაპისთვის აქტიურ ფაზაშია და როგორც კი საპროექტო დოკუმენტაცია მომზადდება და სამშენებლო ნებართვებს მივიღებთ დავიწყებთ მშენებლობას. რაც შეეხება მშენებლობის პროცესს, მისი დასრულება მშენებლობის დაწყებიდან 4-6 თვეში მოხდება. თუმცა კონკრეტული გეგმა-გრაფიკი ჯერჯერობით გაწერილი არ გაქვს“, - აღნიშნა თბილისი დრაი პორტის გენერალურმა დირექტორმა.

2021 წელს დაარსებული თბილისი დრაი პორტი არის ერთობლივი საწარმო Abu Dhabi Ports Group-ს, Wilhelmsen Port Services Georgia-სა და Inveco LLC-ს შორის.

თბილისი დრაი პორტი მდებარეობს საქართველოს დედაქალაქში, რომელიც დაშორებულია შავი ზღვის ნავსადგურებიდან და მეზობელი ქვეყნებიდან დაახლოებით 380 კმ-ით. იგი წარმოადგენს მომხიბვლელ ადგილს მიწოდების ჯაჭვის მართვისთვის საქართველოსა და რეგიონისთვის. მთლიანი ფართობით, რომელიც მოიცავს 196,000 მ² და 87,000 მ² მიწის ნაკვეთებს თბილისის სამრეწველო ზონაში, თბილისი დრაი პორტი უზრუნველყოფს ფართო სივრცეს სხვადასხვა ლოგისტიკური საჭიროებების დასაკმაყოფილებლად.