Winery Ikalto • მეღვინეობა იყალთო, რომელიც ექსპორტზე ორიენტირებული კომპანიაა ბაზარს 25 დასახელების ღვინოს სთავაზობს. როგორც Business Insider Georgia-სთან კომპანიის დირექტორმა გიორგი გიორგობიანმა განაცხადა, ქართული ბაზრისთვის კომპანიამ სპეციალური ბრენდი შექმნა.

„ვაწარმოებთ 25 დასახელების ღვინოს. მეღვინეობა იყალთო ექსპორტზე ორიენტირებული კომპანიაა და წარმოდგენილები ვართ როგორც ევროპის, ისე აშშ-ს ბაზრებზე. ჩვენი ღვინოები იყიდება ასევე ყაზახეთშიც. კომპანია ადგილობრივ ბაზარზე წარმოდგენილი არ იყო და წელს შემოვედით ერთ-ერთი ბრენდით „მთვრალი ზოდიაქო“. ადგილობრივ ბაზარზე ჩვენი ღვინოები იყიდება „8000 მოსავალი“-ს ქსელში, ასევე გაქვს ონლაინ გაყიდვები და მთლიანობაში 20 ობიექტში ვართ წარმოდგენილები.

გეტყვით, რომ აშშ-ს ბაზრისთვისაც 3 ბრენდი გაქვს შექმნილი და ინტერესთა კონფლიქტი, რომ არ გვქონდეს კომპანია საშუალებას იძლევს, რომ რამდენიმე ბრენდი შევქმნათ და რამდენიმე ბრენდით ვიყოთ ბაზარზე წარმოდგენილები და ასე ყველა სეგმენტზე და ბაზარზე მოვახდინოთ ოპერირება. რაც შეეხება „მთვრალ ზოდიაქოებს“ ის მთლიანად ქართულ ბაზარზეა გათვლილი და ორიენტირებული. კონცეფციაც არის ქართველი მხატვრის მიერ შესრულებული ნახატებით“, - აცხადებს გიორგი გიორგობიანი.

აღსანიშნავია, რომ დღეისათვის მეღვინეობა იყალთოს ღვინოების 80%-ი ექსპორტზე, ხოლო 20%-ი ადგილობრივ ბაზარზე იყიდება. კომპანიის ექსპორტის დიდი წილი კი აშშ-ზე მოდის.

კომპანია გარემოს დაცვისა და სოფლის მეურნეობის სამინისტროს მხარდაჭერითა და სოფლის განვითარების სააგენტოს ორგანიზებით, ნიდერლანდების სამეფოში, ქალაქ ამსტერდამში გამართულ გამოფენაზე World of Private Label International Trade Show-ზეც იყო წარმოდგენილი, საიდანაც საკმაოდ დადებითი მოლოდინებით დაბრუნდა.

„მეღვინეობა იყალთო“ ადგილობრივ ბაზაზე 2018 წლიდან ოპერირებს.