აბრეშუმის გზის ფორუმი მნიშვნელოვანი შესაძლებლობაა ქვეყნის პრეზენტაციისა და მისი პოტენციალის რეგიონის წარმომადგენლებისთვის გაცნობის თვალსაზრისით. ამის შესახებ Business Insider Georgia-სთან ELT Group-ის დამფუძნებელმა, ელგუჯა თურმანიძემ, 22–23 ოქტომბერს თბილისში მიმდინარე აბრეშუმის გზის ფორუმის გახსნის შემდეგ განაცხადა. ღონისძიებას პრემიერ-მინისტრი, მთავრობის წევრები, ბიზნესის წარმომადგენლები და რეგიონის ქვეყნების პრემიერ-მინისტრები და მინისტრები ესწრებოდნენ.

„ეს ღონისძიება 2015 წლიდან ტარდება და ორ წელიწადში ერთხელ იმართება ჩვენს ქვეყანაში. დღევანდელი მდგომარეობით, ფორუმზე 2300-ზე მეტი ვიზიტორი და მაღალი დონის წარმომადგენელია, მათ შორის - პრემიერ-მინისტრები და ბიზნესწრეების ლიდერები 73 ქვეყნიდან. ეს ერთ-ერთი ყველაზე მნიშვნელოვანი შესაძლებლობაა, რომ მოხდეს ჩვენი ქვეყნის პრეზენტაცია და მისი პოტენციალის გაცნობა რეგიონის წარმომადგენლებისთვის.

დღევანდელ პანელზე წარმოდგენილები იყვნენ აზერბაიჯანისა და სომხეთის პრემიერ-მინისტრები, რაც მისასალმებელია. აღსანიშნავია, რომ წინა ფორუმის დროს, ორი წლის წინ, მრავალი პროექტი მხოლოდ იდეის დონეზე იყო, დღეს კი ეს იდეები ხორცშესხმული და უკვე რეალიზებული პროექტებია.

დღეს და ხვალ გაიმართება რამდენიმე პანელი და დისკუსია სხვადასხვა მიმართულებით — როგორც ინფრასტრუქტურულ, ასევე რეგიონულ დონეზე. ინვესტირებისთვის წარმოდგენილი იქნება როგორც წარმატებით მიმდინარე, ასევე დაგეგმილი პროექტები. მათ შორისაა ისეთი მასშტაბური ინიციატივები, როგორიცაა თბილისის ახალი საერთაშორისო აეროპორტი, ანაკლიის პორტი, „ემაარ ჯგუფის“ ინვესტიცია, წყალტუბოს განვითარების პროექტები და რაჭის სათხილამურო ტრასები.

ფორუმი იძლევა უნიკალურ შესაძლებლობას არა მხოლოდ ამ პროექტების პრეზენტაციისთვის, არამედ პოტენციური ინვესტორების მოსაზიდადაც. როგორც გასული ორი წლის გამოცდილებამ აჩვენა, ეს კიდევ უფრო გაზრდის შესაძლებლობებს ჩვენი ქვეყნისთვის, მოსახლეობისთვის და მთლიანად რეგიონისთვის - როგორც მშვიდობის, თანამშრომლობისა და ეკონომიკური ურთიერთობების გაძლიერების მიმართულებით, ასევე პირდაპირი ფინანსური სარგებლის მიღების თვალსაზრისით.

დღევანდელ ფორუმზე ჩატარდა გამოკითხვაც, რომლის შედეგად მონაწილეთა უმრავლესობამ - 50%-მა - ხმა მისცა ინფრასტრუქტურის სხვადასხვა მიმართულების განვითარებას ჩვენს ქვეყნებსა და რეგიონში, იქნება ეს რკინიგზა, საჰაერო, საზღვაო თუ სხვა,“ - განაცხადა ელგუჯა თურმანიძემ.