კომპანია თოლია - Tolia ქვეყანაში სანაყინეების ქსელის გაფართოების პროცესს აგრძელებს. როგორც Business Insider Georgia-სთან კომპანიის სანაყინეების მარკეტინგის მენეჯერმა, ბერდია ბედიაშვილმა განაცხადა, 2026 წელს კომპანია 5 ახალი ობიექტის გახსნას გეგმავს.

„დღეისათვის „თოლიას“ სანაყინეების ქსელი 31 ობიექტს აერთიანებს, საიდანაც 4 ობიექტი 2025 წელს დავამატეთ. 2026 წელს კი კიდევ 5 ობიექტის გახსნა იგეგმება. ახალი ობიექტები როგორც თბილისში, ისე რეგიონებშიც გაიხსნება“, - განმარტავს ბერდია ბედიაშვილი.

სანაყინეების ქსელის გაფართოებასთან ერთად, „თოლია“ ასორტიმენტის გაზრდაზეც ინტენსიურად მუშაობს. კომპანიამ მომხმარებლებს უკვე შესთავაზა ცხელი შოკოლადი, ხოლო ზაფხულის სეზონზე ახალი პროდუქტების შეთავაზების გეგმაზე მუშაობა გრძელდება.

„თოლია“ დღეს ნაყინის ბაზრის ლიდერია და მისი წარმატება რამდენიმე ფაქტორით განპირობებულია, მათ შორის გამორჩეული მენიუ და კონცეფცია, რაც კომპანიას კონკურენტებისგან გამოარჩევს.

„თოლია“ ერთ-ერთი ყველაზე ცნობილი ქართული ბრენდია ნაყინის ინდუსტრიაში. კომპანია ბაზარზე 1997 წლიდან ოპერირებს და მომხმარებელს როგორც ინდუსტრიულ, ისე ჩამოსასხმელ ნაყინებს სთავაზობს.

„თოლიას“ სანაყინეები მდიდარ მენიუს სთავაზობს, თუმცა განსაკუთრებული პოპულარობით ვანილის ნაყინი სარგებლობს, რომელიც გაყიდვებში ერთპიროვნული ლიდერია. მას მოსდევს შოკოლადის ნაყინი.

ბრენდის წარმატების ერთ-ერთი მთავარი ფაქტორი მისი ძლიერი იმიჯია, რომელიც წლების განმავლობაში ჩამოყალიბდა. „თოლია“ საქართველოში ნაყინის ერთ-ერთი პირველი მწარმოებელი იყო, რომელმაც 90-იან წლებში მომხმარებელს ხარისხიანი პროდუქტი შესთავაზა, რაც დღემდე ინარჩუნებს მომხმარებლის ლოიალობას.