სოფელ ტიბაანში მდებარე თანამედროვე ტექნოლოგიებით აღჭურვილი მესაქონლეობის ფერმა Butrana / ბუტრანა იზრდება. როგორც „ბუტრანას“ დამფუძნებელი, ჯემალ ხატიაშვილი Business Insider Georgia-სთან საუბრისას განმარტავს, რამდენიმე დღეში ფერმას 25 ერთეული Fleckvieh-ის ჯიშის ძროხა შეემატება, რაც ფერმის რძის წარმადობას 50%-ით გაზრდის.

„ამ ეტაპზე ადგილობრივ ბაზარზე მხოლოდ ნედლი რძის რეალიზაციას ვაკეთებთ. ხელშეკრულება გვაქვს სხვა საწარმოსთან და მას ვაწვდით ნედლეულს. რაც შეეხება ფერმის გაფართოებას, სიახლე გვაქვს ის, რომ ავსტრიიდან რამდენიმე დღეში შემოვა ჩვენს ფერმაში Fleckvieh-ის ჯიშის ძროხები („სიმენტალი“). დღეისათვის ჩვენი ფერმა დაახლოებით 70 სულს აერთიანებს და მალე ავალთ 100 სულამდე.

გეტყვით, რომ „სიმენტალის“ ჯიშის ძროხები, რომელიც ახლა შემოგვყავს, გამოირჩევიან რძის მაღალი ხარისხით და ფერმის წარმადობა 50%-ით გაიზრდება,“ - განმარტავს ჯემალ ხატიაშვილი.

მისივე განმარტებით, დღეისათვის ბაზარზე 1 ლიტრი ნედლი რძის ფასი 2 ლარია.

„ახლა ნედლი რძის ფასი საშუალოდ 2 ლარია. თუმცა რამდენიმე თვის წინ, როდესაც ქვეყანაში დიდი ამბები იყო ატეხილი აფლატოქსინებთან დაკავშირებით და ასე შემდეგ, იმ დროს ფასი 10–15%-ით შემცირდა. თუმცა ამ ამბების ჩავლილის შემდეგ ფასმა მოიმატა. ჩვენს შემთხვევაში სეზონურობას მნიშვნელობა არ აქვს და ზამთარსა და ზაფხულში ერთი და იგივე ფასად ვყიდით რძეს, რადგანაც შესაბამისი ხელშეკრულება გვაქვს კომპანიასთან,“ - ამბობს „ბუტრანას“ დამფუძნებელი.

აღსანიშნავია, რომ „ბუტრანა“ ნედლ რძეს რძის პროდუქტების მწარმოებელ კომპანია „ლეანკას“ აწვდის.

„ბუტრანა“ ამ ეტაპზე რძის პროდუქტების საკუთარი წარმოების განახლებას არ გეგმავს, თუმცა მის სამომავლო გეგმებში შედის.

შეგახსენებთ, „ბუტრანამ“ სიღნაღის მუნიციპალიტეტის სოფელ ტიბაანში, თანამედროვე ტექნოლოგიებით აღჭურვილი ფერმა 2022 წლის აპრილში გახსნა. პროექტის საინვესტიციო ღირებულება 1 მილიონი ლარია.