ლოკოკინების ფერმის მფლობელი და მწარმოებელი „ნადი ჯგუფი“ საექსპორტო არეალის გაფართოებით არის დაკავებული. როგორც Business Insider Georgia-სთან კომპანიის დამფუძნებელმა მერაბ ნადარაიამ განაცხადა, ამ ეტაპზე „ნადი ჯგუფი“ პროდუქციის ექსპორტს თურქეთსა და საფრანგეთში ახდენს, ხოლო სამომავლოდ ექსპორტს იტალიასა და ესპანეთშიც განიხილავს. 

„მოსავლის აღება უკვე დაწყებული გვაქვს და საკმაოდ კარგი მოსავალია. ფაქტობრივად მოსავალი წელს 30%-ით არის გაზრდილი. ჩვენ პროდუქციას ექსპორტს თურქეთსა და საფრანგეთში ვახდენთ. ასევე მოლაპარაკებებს ვაწარმოებთ იტალიაში დაბრუნებაზე და ესპანეთის ბაზარზე გასვლაზე. გასულ წელს იტალიაში ექსპორტი საკმაოდ ცოტა იყო. თუმცა დღეს ჩვენი ექსპორტის დაახლოებით 60%-ი თურქეთს უკავია, ხოლო დანარჩენი საფრანგეთს“, - აცხადებს კომპანიის დამფუძნებელი.

საქსტატის საიტზე განთავსებული სტატისტიკა აჩვენებს, რომ თურქეთში ლოკოკინას ექსპორტი რაოდენობრივად პირველ ადგილზეა, თუმცა ფისკალური კუთხით ექსპორტი უფრო საფრანგეთშია მომგებიანი. „ნადი ჯგუფში“ აცხადებენ, რომ სხვადასხვა სახის ხელშეკრულებები აქვთ და ამიტომ რაოდენობრივად ყველაზე მეტს ამ ეტაპზე თურქეთში ყიდიან. 

„სხვადასხვა ხელშეკრულებები გაქვს და ამიტომ ჩვენ არ გვინდა, რომ რომელიმე ხელშეკრულება დავაზარალოთ და ამიტომ საფრანგეთში ექსპორტი რაოდენობრივად შედარებით ნაკლები გაქვს“, - ამბობს მერაბ ნადარაია. 

რაც შეეხება ესპანეთს, ეს საქართველოში „გაზრდილი“ ლოკოკინასთვის ახალი ბაზარია. თუმცა ირკვევა, რომ ესპანეთში სხვა ჯიშის ლოკოკინებზეა მოთხოვნა და ამიტომ „ნადი ჯგუფმა“ თავის ფერმაში ამ ჯიშის ლოკოკინების გამრავლება დაიწყო და თუ პროექტი გაამართლებს, ესპანეთის ბაზარზეც შევა. 

„სხვა ჯიშის ლოკოკინებზეა მოთხოვნა ესპანეთში. ახლა ამ ჯიშს ვცდით, თუ რამდენად შეეგუება საქართველოს კლიმატს ეს ლოკოკინა და ამის შემდეგ დავიწყებთ ესპანეთში ექსპორტს. ვნახოთ რა გამოვა. სურვილი არის“, - განმარტავს მერაბ ნადარაია. 

დღეისათვის „ნადი ჯგუფის“ ლოკოკინების ფერმა 3 ჯიშის ლოკოკინების გამრავლებაზეა ორიენტირებული.

რაც შეეხება ფერმერების დაინტერესებას, „ნადი ჯგუფში“ აცხადებენ, რომ ინტერესმა იკლო და ამის მიზეზად თავისუფალი ფართობების არარსებობას ასახელებენ. 

„მოთხოვნა არ გაზრდილა და ფერმერების აქტიურობა ცოტა შეჩერდა კიდეც. ამის მიზეზი არის ალბათ ის, რომ ხელსაყრელი პირობები არ არის, ლოკოკინას მისთვის ხელსაყრელი პირობები სჭირდება და სადაც ვენახია იქ ხომ ვენახს ვერ ამოიღებენ ამიტომ ფართობები სჭირდება და ამ რაოდენობის თავისუფალი ფართობი არ არის. დაკავებულია“, - ამბობს კომპანიის დამფუძნებელი.

თავად „ნადი ჯგუფი“ ფერმის გაფართოებას აღარ აპირებს. 

„ფერმის გაფართოებას არ ვაპირებ, რადგანაც საკმაოდ მოზრდილი ფერმა მაქვს. გაფართოების რესურსიც არ არის. ალბათ იმ ფერმერების რაოდენობის ზრდას შევუწყობთ ხელს, რომლებიც ლოკოკინების მოშენებით იქნებიან დაინტერესებულნი“, - აცხადებს მერაბ ნადარაია. 

სამომავლოდ „ნადი ჯგუფი“ ახალი მიმართულების ათვისებასაც განიხილავს და კოსმეტიკის განვითარების მიმართულებით საკუთარი წვლილის შეტანას გეგმავს. 

„კოსმეტიკის მიმართულებით ძირითადად ლოკოკინას ლორწოზეა საუბარი. ჩვენ ლორწო ამოგვაქვს არსებული ჯიშებისგანაც, მაგრამ ლორწოს ბაზარი ცალკეა განსახილველი. დიდი ინვესტიცია სჭირდება, რომ მისგან ფხვნილი მივიღოთ. ისე კი ვგეგმავთ სამომავლოდ“, - აცხადებს „ნადი ჯგუფის“ დამფუძნებელი.

შპს „ნადი ჯგუფი“ 2018 წელს, იტალიური კომპანია ,,ჩერასკოს" მოლუსკების საერთაშორისო ინსტიტუტთან თანამშრომლობით, დაფუძნდა.