ლოგისტიკური კომპანია ULC Terminal აქტიურად ემზადება ახალი კომპიუტერიზებული სატრანზიტო სისტემის – NCTS–ში ჩასართავად. როგორც Business Insider Georgia-სთან საუბარში კომპანიის დირექტორმა და ერთ-ერთმა დამფუძნებელმა, გიორგი ჯანყარაშვილმა აღნიშნა, სისტემაში ჩართვა ნიშნავს ეფექტური და სწრაფი ტრანზიტული სერვისების დანერგვას.

მისი თქმით, კომპანიამ უკვე მიმართა შემოსავლების სამსახურს შესაბამისი ლიცენზიის მისაღებად, და მოსალოდნელია, რომ იგი სექტემბრის დასაწყისში გაიცემა. შედეგად, ULC Terminal გახდება მეხუთე ქართული კომპანია, რომელიც NCTS სისტემაში ჩაერთვება.

„NCTS სისტემის დანერგვა და საქართველოში მისი გამოყენება უმნიშვნელოვანესია ქვეყნის ეკონომიკისთვის და სატრანსპორტო დერეფნის განვითარებისთვის, რომელსაც აბრეშუმის გზას ვუწოდებთ. ქართული კომპანიების ამ სისტემაში ინტეგრაცია სერიოზულ პოტენციალს ქმნის. ერთ-ერთი მთავარი უპირატესობაა ისიც, რომ შესაძლებელი გახდება უცხოური კომპანიებიდან ფინანსების მობილიზება — სწორედ ეს არარეზიდენტი კომპანიები იქნებიან ჩვენი ძირითადი დამკვეთები,“ – აცხადებს გიორგი ჯანყარაშვილი.
მისივე თქმით, ქართული კომპანიებისთვის NCTS სისტემაში ჩართვა საკმაოდ რთული და ხანგრძლივი პროცესია.

„ლიცენზიის მისაღებად საჭიროა სისტემის დანერგვა - პროგრამული უზრუნველყოფის ჩათვლით. ასევე, კომპანია უნდა აკმაყოფილებდეს გარკვეულ კრიტერიუმებს, მათ შორის ფინანსურ მდგრადობას. ფაქტობრივად, ეს წარმოადგენს გარანტიას, რომელსაც იძლევა ქართული მხარე, რომ ტვირთი A-დან B პუნქტში ნამდვილად ჩავა და პასუხისმგებლობა სწორედ კომპანიაზეა,“ – აღნიშნავს ჯანყარაშვილი.

შეგახსენებთ, რომ ახალი კომპიუტერიზებული სატრანზიტო სისტემა (NCTS) ეფუძნება საერთაშორისო სტანდარტებს და უზრუნველყოფს ტვირთების ელექტრონულ მონიტორინგს, გამარტივებულ საბაჟო პროცედურებს და ტრანზიტის გამჭვირვალობას.

ULC Terminal 2021 წელს დაარსდა. მისი მიზანია ბაზარზე მომსახურების დონის ამაღლება, ევროპული სტანდარტების დანერგვა და ისეთი ლოგისტიკური ჰაბის შექმნა, რომელიც ხელს შეუწყობს საქონლის ტვირთბრუნვის ზრდას საქართველოს ტერიტორიაზე და გაამარტივებს კომუნიკაციას გადამხდელებსა და სახელმწიფოს შორის.