„თბილისი დრაი პორტი“ (Tbilisi Dry Port), რომელმაც ოპერირება რამდენიმე თვის წინ დაიწყო, ტვირთნაკადის ზრდაზე საუბრობს. როგორც Business Insider Georgia-სთან საუბრისას „თბილისი დრაი პორტის“ გენერალურმა დირექტორმა ნინო ნემსაძემ განაცხადა, ტვირთნაკადის მნიშვნელოვანი ზრდა უკვე სახეზეა.

„რაც შეეხება ტვირთნაკადებს, არის მნიშვნელოვანი ზრდა. თუმცა, რაც საქართველოს რკინიგზამ ბათუმიდან და ფოთიდან ბლოკ მატარებლები დანიშნა, ჩვენი ტვირთბრუნვა მნიშვნელოვნად გაიზარდა. ეს ყველაფერი ჩვენზე დადებითად აისახა.

დღეისათვის პორტში შემოსული ტვირთების უმეტესი ნაწილი არის თბილისისთვის განკუთვნილი ტვირთი, თუმცა გვაქვს სატრანზიტო ტვირთებიც, და განკუთვნილია რეგიონისთვის: სომხეთი, აზერბაიჯანი, ცენტრალური აზია. ასევე ექსპორტის რამდენიმე შემთხვევა გვქონდა. ჯერჯერობით ექსპორტის შემთხვევები მცირეა, თუმცა მზარდი“, – განმარტავს ნინო ნემსაძე.

აღსანიშნავია, რომ „თბილისის დრაი პორტის“ მშენებლობა რამდენიმე ფაზას მოიცავს. კომპანიამ პირველი ფაზის დასრულებისთანავე აქტიურად დაიწყო მეორე ფაზის განხორციელებაზე მუშაობა.

„მეორე ფაზის საპროექტო დოკუმენტაცია ახლა მზადდება და უახლოეს მომავალში დასრულდება. შემდეგ უკვე მშენებლობის ნებართვის მისაღებად მივმართავთ თბილისის მერიას. გვექნება რა სამშენებლო ნებართვა, მაშინვე დავიწყებთ სამშენებლო პროცესს. ჩვენი ვარაუდით, შემოდგომის ბოლოს უკვე აქტიურად გვექნება სამშენებლო სამუშაოები“, – ამბობს „თბილისი დრაი პორტის“ გენერალური დირექტორი.

აღსანიშნავია, რომ „თბილისი დრაი პორტის“ პირველი ფაზა წელიწადში 100 ათას TEU-მდე ტვირთბრუნვაზეა გათვლილი, ხოლო მეორე ფაზის განხორციელების შემდეგ პორტის წლიური ტვირთბრუნვა უკვე 280 ათას TEU-ს მიაღწევს.

„თბილისი დრაი პორტი“ მნიშვნელოვან როლს ასრულებს სტრატეგიული სატრანზიტო დერეფნის განვითარებაში, უზრუნველყოფს ინტეგრირებულ ლოგისტიკურ სერვისებს და წარმოადგენს ბათუმისა და ფოთის პორტების ლოგიკურ გაგრძელებას. იგი ფუნქციონირებს როგორც სატრანზიტო ჰაბი კავკასიისა და ცენტრალური აზიის რეგიონების დასაკავშირებლად.

„თბილისი დრაი პორტი“ არის მულტიმოდალური საკონტეინერო ტერმინალი, რომელიც უზრუნველყოფს ტვირთის მიღებას როგორც რკინიგზით, ასევე სატვირთო მანქანებით, და მის დასაწყობებას. „თბილისი დრაი პორტი“ დაკავშირებულია სარკინიგზო ლიანდაგით საქართველოს რკინიგზის თბილისის ტერმინალთან, საიდანაც მოხდება ბათუმისა და ფოთის ზღვის პორტებიდან ჩამოსული კონტეინერების „თბილისი დრაი პორტში“ გადმოზიდვა.