„ლილუაშვილის მამული“ საოჯახო სასტუმროსა და მარანს აერთიანებს და ბაზარზე 2018 წლიდან ოპერირებს. 2025 წლის შედეგებსა და სამომავლო გეგმებზე Business Insider Georgia კომპანიის დამფუძნებელს, მათე ლილუაშვილს ესაუბრა.

„2025 წელს დადებითად ვაფასებთ. ჩვენი ცნობადობა საგრძნობლად გაიზარდა. მონაწილეობა მივიღეთ „გემო ფესტში“, სადაც განსხვავებული მენიუ წარვადგინეთ.
ამასთან, 2025 წელს ახალი მიმართულებაც დავიმატეთ, რაც საშემოდგომო აქტივობებსა და მასტერკლასებს გულისხმობს სკოლისა და ბაღის ბავშვებისთვის, რომლებიც იმერული ვახშმით სრულდება. ეს ჩვენთვის ახალი გამოწვევა იყო, რომელსაც წარმატებით გავართვით თავი.
საოჯახო მარანის მიმართულებითაც წარმატებული წელი გვქონდა. უფრო აქტიურად ჩავერთეთ სხვადასხვა გამოფენაში. ნოემბერში ავსტრიაში ვიმყოფებოდით, სამომავლოდ კი ჩინეთში გამგზავრებას ვგეგმავთ.

ამ ეტაპზე სამი სახეობის ღვინო გვაქვს. ასევე ვამზადებთ ლიქიორებს ბებიის რეცეპტით. არომატები მრავალფეროვანია - ბუშმალა, ჟოლო, ალუბალი და ჩვენი ეზოს ვარდის ლიქიორი, რომლებიც მომხმარებელთა დიდ მოწონებას იწვევს “, - აცხადებს მათე ლილუაშვილი.

სამომავლოდ „ლილუაშვილის მამული“ გაფართოებას და ფინური ტიპის საუნის დამატებას გეგმავს.

სამომავლოდ ტერასაზე ფინური საუნის მოწყობას ვგეგმავთ, რომელსაც პატარა მრგვალი აუზიც ექნება “, - აღნიშნავს კომპანიის დამფუძნებელი.

ცნობისთვის, „ლილუაშვილის მამული“ იმერეთში, ვანის მუნიციპალიტეტის სოფელ შუაგორაში მდებარეობს. ბუნებაში ჩაფლული მამული ორსაუკუნოვან მეღვინეობას, საოჯახო სასტუმროსა და იმერულ სამზარეულოს აერთიანებს.