2026 წელს ნუგბარი • Nugbari 10 წლის ხდება. იუბილესთან ერთად, ქართულ ტკბილეულზე სპეციალიზებული კომპანია „ნუგბარი“ ახალ, ამბიციურ ნაბიჯს დგამს. როგორც კომპანიის აღმასრულებელი დირექტორი, ნინო გერზმავა, Business Insider Georgia-სთან საუბარში აღნიშნავს, ბრენდი მუშაობს ინოვაციურ პროექტზე, რომლის მთავარი მიზანიც ქართული ტრადიციული ჩურჩხელის საერთაშორისო ბაზარზე გატანაა. „ნუგბარი“ ასორტიმენტის გამრავალფეროვნებაზე მუშაობს. 

„ამ ეტაპზე კომპანიის მთელი ფოკუსი მიმართულია ახალი, ამბიციური პროექტისკენ. კომპანიის მიზანია ქართული ტრადიციული ჩურჩხელა მსოფლიო ბაზარს გააცნოს, როგორც პრემიუმ ხარისხის, ბუნებრივი და ჯანსაღი ხემსი - გამორჩეული მაღალი ენერგეტიკული ღირებულებით, ავთენტური გემოთი.

ვმუშაობთ ახალ ასორტიმენტზე. ეს იქნება უშაქრო, ვეგან-მეგობრული და ბუნებრივი, ქიმიური დანამატებისგან სრულიად თავისუფალი ხაზი“, - აცხადებს კომპანიის აღმასრულებელი დირექტორი.

როგორც მწარმოებელი აცხადებს, „ნუგბარის“ თითოეული პროდუქტი მზადდება და დამზადდება ადგილობრივი, პრემიუმ ხარისხის ინგრედიენტებით.

„სხვა მწარმოებლებისგან განსხვავებით ჩვენ კომპანიას აქვს უნიკალური უპირატესობა საკუთარი წარმოების, კახური რქაწითელისა და საფერავის ბადაგისგან შექმნას ჩურჩხელა.
მიუხედავად იმისა, რომ „ნუგბარი“ უკვე საკმაოდ მსხვილი წარმოებაა, ჩვენთან დამზადებული თითოეული პროდუქტი ხელნაკეთია. ჩურჩხელა მზადდება ძველისძველი კახური საავტორო რეცეპტით.

საგანგებოდ ვარიდებთ თავს წარმოების სრულად ინდუსტრიალიზაციას, რადგან ჩვენთვის პრინციპულად მნიშვნელოვანია ჩურჩხელამ არ დაკარგოს ავთენტური გემო“, - ამბობს ნინო გერზმავა.

რაც შეეხება ჩურჩხელის საერთაშორისო ბაზრებზე პოზიციონირებას, სადაც „ნუგბარი“ წლებია აქტიურად ოპერირებს, ფართოვდება და ამაზეც კომპანია ინტენსიურად მუშაობს.

„ექსპორტი - „ნუგბარისთვის“ განვითარების უმთავრესი მიმართულებაა. მიმდინარეობს ინტენსიური მოლაპარაკებები პოტენციურ პარტნიორებთან ევროპაში, აზიაში, ამერიკაში და პოსტსაბჭოთა ბაზრებზე, სადაც ჩურჩხელა უკვე აღიარებული და საყვარელი პროდუქტია.
ამავდროულად ვემზადებით საერთაშორისო ონლაინ-მარკეტპლეისებზე პოზიციონირებისთვისაც.
„ნუგბარის“ ახალი ხაზი, რომელიც 2026 წლიდან გამოჩნდება ადგილობრივ და საერთაშორისო ბაზარზე - ქმნის მოდერნიზებულ, ცხოვრების თანამედროვე რიტმისთვის იდეალურად მორგებულ ჯანსაღ ტკბილეულს, რომელიც იმავდროულად არ კარგავს საკუთარ ფესვებთან და ისტორიასთან კავშირს“, - ამბობს „ნუგბარის“ აღმასრულებელი დირექტორი.