შვეიცარიული ტექნოლოგიით, ადგილობრივი რძისგან დამზადებული ყველი ,,ოდლისი" ქართველ მომხმარებლებში და უცხოელ ტურისტებში ძალიან დიდი პოპულარობით სარგებლობს. კომპანიის თანადამფუძნებელი მაკა გიორგანაშვილი Business Insider Georgia- თან ამბობს რომ შემოდგომის სეზონი „ოდლისისთვის“ საკმაოდ დატვირთულია.

„დატვირთვა ნამდვილად დიდია, ბევრი სტუმარი გვყავს. ზაფხული საკმაოდ აქტიური იყო, თუმცა შემოდგომის სეზონი კიდევ უფრო დატვირთული აღმოჩნდა. ქართველები ხშირად გვსტუმრობენ, თუმცა ყველის ტურს ძირითადად უცხოელი სტუმრები ირჩევენ. ქართველ სტუმრებს კი უფრო უყვართ ჩვენს ყველის ბარში მოსვლა, ყველისა და ღვინის დაგემოვნება. ტურში ქართველებიც გვყოლია, თუმცა ყველაზე დიდი ინტერესი მაინც უცხოელების მხრიდან მოდის “, - ამბობს მაკა გიორგანაშვილი.

ყველის ტური რამდენიმე ეტაპს მოიცავს და გულისხმობს როგორც „ოდლისის“ ისტორიის გაზიარებას სტუმრებისთვის, ისე საწარმოს დათვალიერებას.

„სტუმრებს ტურს ჩვენი შვილები უტარებენ და უზიარებენ ისტორიას თუ როგორ დავიწყეთ საქმიანობა. შემდეგ ვაჩვენებთ საწარმოს და ვუხსნით, როგორ მზადდება ყველი, რამდენი ტიპის ყველს ვაწარმოებთ და როგორ ვუვლით თითოეულს. ამის შემდეგ ვუზიარებთ, როგორ გაიხსნა ჩვენი ყველის ბარი. ტური ბარში დეგუსტაციით სრულდება, სადაც სომელიე სტუმრებს ურჩევს, რომელ ღვინოსთან რომელი ყველი უნდა დააგემოვნონ. ბოლოს სტუმრები ლამაზად გაწყობილ სუფრასთან იკავებენ ადგილს და ყველისა და ღვინის დაგემოვნებას აგრძელებენ “, - აცხადებს კომპანიის თანადამფუძნებელი.

„ოდლისი“ ამჟამად აწარმოებს სამი ტიპის ყველს: მაგარს, ნახევრად მაგარს და რბილს. რაც შეეხება გემოს, ასორტიმენტი მოიცავს 33 გემოს, რომლის გაზრდაც სამომავლოდ იგეგმება.

„ამჟამად გვაქვს 33 გემო, თუმცა ახალი წლის შემდეგ რამდენიმე ახალი გემოს დამატებას ვგეგმავთ, ამ საკითხზე აქტიურად ვმუშაობთ “, - აღნიშნავს მაკა გიორგანაშვილი.