საქართველოში ერთ-ერთი ყველაზე მეტად მონაცემებზე დაფუძნებული კომპანია ვართ, - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას კომპანია „ამბასადორი აილენდ ბათუმის“ გენერალურმა დირექტორმა გოჩა კამკიამ განაცხადა. 

მისი განცხადებით, პროექტის განხორციელების შედეგად დასაქმდება დაახლოებით 20 000-მდე ადამიანი, ყოველწლიურად ბიუჯეტში შევა 64 მილიონი დოლარი, ხოლო კუნძულზე ოპერირებას დაიწყებს 500-ზე მეტი დამოუკიდებელი ბიზნესი, რაც პროექტს გრძელვადიან ეკონომიკურ ზრდის პლატფორმად აყალიბებს.

„პროექტის მასშტაბებთან ერთად, შემიძლია ვთქვა, რომ ჩვენ საქართველოში ერთ-ერთი ყველაზე მეტად მონაცემებზე დაფუძნებული კომპანია ვართ. Colliers-ს ლონდონისა და თბილისის ოფისების ჩართულობით, პროექტის დაწყებამდე ჩავატარეთ საერთაშორისო კვლევა, რის საფუძველზეც გვაქვს ყველა ის მონაცემი, რაც მომავალში კუნძულზე შეიქმნება.

საზოგადოებისთვის, პირველ რიგში, ალბათ დასაქმების მაჩვენებელი იქნება საინტერესო - კვლევაში პირდაპირ არის აღნიშნული, რომ პროექტის განხორციელების შედეგად, დაახლოებით საქართველოს 20 000 მოქალაქე დასაქმდება. რაც შეეხება საბიუჯეტო და სახელმწიფოებრივ ნაწილს, პროექტი ყოველწლიურად 64 მილიონი აშშ დოლარის გადასახადების აკუმულირებას მოახდენს.

ამასთანავე, პროექტის ფარგლებში ოპერირებას 500-ზე მეტი ბიზნესკომპანია დაიწყებს. მნიშვნელოვანია, რომ მათ არ ექნებათ პირდაპირი შემხებლობა „ამბასადორის“ ჯგუფთან - ისინი დამოუკიდებელ გზას იპოვიან, შექმნიან საკუთარ ბიზნესს და განავითარებენ თავიანთ ისტორიას საქართველოში.

ფაქტობრივად, ჩვენ შევქმენით კონკრეტული ლოკაცია გრძელვადიანი განვითარების პერსპექტივით, რომლის დაგეგმვაზეც მაღალი დონის სპეციალისტებმა იმუშავეს. პროექტის განხორციელების წარმოუდგენელი ტემპი სწორედ იმას ადასტურებს, რომ ჩვენი პროგნოზები გამართლებულია და ყველაფერი თავიდანვე სწორად დაიგეგმა. შესაბამისად, „ამბასადორ აილენდ ბათუმს“, რომელიც ამჟამად აქტიურ ფაზაშია, წინ დიდი წარმატების ისტორია ელოდება“, - განმარტავს კამკია.

„ამბასადორი აილენდ ბათუმის“ გენერალური დირექტორის განცხადებით, პროექტი უკვე 50%-ით დასრულებულია და კუნძული მზადაა ბიზნეს პროცესების დასაწყებად - ექსპლუატაციაშია შეყვანილი 26 და 21 ჰექტარი, პარალელურად კი მიმდინარეობს როგორც კომპანიის მულტიფუნქციური განვითარება, ისე რამდენიმე მსხვილი დამოუკიდებელი პროექტი, მათ შორის IG Development-ის 120 000 კვ.მ სავაჭრო ცენტრი და „Tonino Lamborghini“-ს კომპლექსი.

„„პირველ რიგში, საზოგადოებისთვის საინტერესო იქნება უშუალოდ პროექტის შედეგებზე საუბარი, რადგან „ამბასადორ აილენდ ბათუმი“ უკვე აღარ არის მხოლოდ ინსპირაცია - ეს არის კონკრეტული შედეგებით წარმოდგენილი პროექტი. საყოველთაოდ ცნობილია, რომ სამუშაოების 50% ფაქტობრივად დასრულებულია. კერძოდ, ექსპლუატაციაში შევიყვანეთ ერთი ნახევარკუნძულის 26-ჰექტარიანი და მეორე ნახევარკუნძულის 21-ჰექტარიანი ნაწილი. ეს ნიშნავს, რომ კუნძული, განვითარების პარალელურად, სრულად მზად არის ბიზნესპროცესების დასაწყებად.

ჩვენ საკუთარ თავზე ავიღეთ პირველობის ინიციატივა და დავიწყეთ მულტიფუნქციური კომპლექსის მშენებლობა, რათა მომავალი პარტნიორებისთვის გვეჩვენებინა, რომ ეს ლოკაცია უკვე ფუნქციონირებს და მზად არის ბიზნესისთვის. ამ თემას თქვენი გადაცემის სხვა ნაწილში უფრო დეტალურად შევეხებით.

ასევე აღსანიშნავია, რომ კუნძულზე ამჟამად ჩვენგან დამოუკიდებელი ოთხი ბიზნესპროექტი ხორციელდება. მაგალითად, ცნობილი ქართული კომპანია IG Development წელს დაიწყებს 120 000 კვადრატული მეტრი ფართობის სავაჭრო ცენტრის მშენებლობას, რომელიც თავისი მულტიფუნქციური დატვირთვით საქართველოში საუკეთესო იქნება.

მეორე მნიშვნელოვანი პროექტია Tonino Lamborghini, რომლის სამშენებლო სამუშაოები გუშინ დაიწყო. ის მსოფლიო ბაზარზე უკვე პოზიციონირებს, როგორც კოლექციური უძრავი ქონება. მესამე თავად ჩვენი პროექტია, ხოლო მეოთხე - კიდევ ერთი გამორჩეული ქართული კომპანია, რომელიც კუნძულზე შემოსვლასა და უმსხვილესი პროექტის დაწყებას სულ მალე დააანონსებს. ვინაიდან ეს ინფორმაცია ჯერ კიდევ ახალია, თქვენი ნებართვით, ერთობლივ განცხადებას მოგვიანებით გავაკეთებთ“, - აცხადებს კომპანიის გენერალური დირექტორი.