ტურიზმისთვისაც ძალიან მნიშვნელოვანია, რომ პირდაპირ თბილისი დაკავშირებული იყოს ფრანკფურტთან, - ამის შესახებ რადიო „სივრცის“ ეთერში, გადაცემა Business Insider Georgia-ში სტუმრობისას, საქართველოს აეროპორტების გაერთიანების ხელმძღვანელმა ლევან მოსეშვილმა Condor Airlines-ის საქართველოს ავიაბაზარზე დაბრუნებასთან დაკავშირებით განაცხადა.

მისი განმარტებით, თბილისსა და ფრანკფურტს შორის ყოველდღიური ფრენები იმას ნიშნავს, რომ მგზავრებს გერმანიის მიმართულებით უფრო მოქნილად და უფრო კომფორტულად გადაადგილება შეეძლებათ.

„ Condor Airlines ბრუნდება საქართველოს ავიაბაზარზე. ოპერირებდა წლების განმავლობაში.  Condor Airlines მომავალი წლიდან ყოველდღიური ფრენებით შემოდის საქართველოს ავიაბაზარზე. მას ფრანკფურტის მიმართულებით ექნება ყოველდღიური რეისები, რაც საქართველოსთვის ნიშნავს, რომ გერმანიის მიმართულებით მგზავრებს მიეცემათ შესაძლებლობა უფრო მოქნილად და უფრო კომფორტულად გადაადგილდნენ. აგრეთვე ბიზნესსექტორისთვისაც ძალიან მნიშვნელოვანია, რომ არჩევითობა ექნებათ - საქართველოს დედაქალაქს დაკავშირებადობა ექნება დასავლეთ ევროპის კიდევ ერთ მიმართულებასთან, რაც ტურიზმსაც შეუწყობს ხელს. ტურიზმისთვისაც ძალიან მნიშვნელოვანია, რომ პირდაპირ თბილისი დაკავშირებული იყოს ფრანკფურტთან. ყოველდღიური ფრენები ნიშნავს, რომ ბაზარი უფრო მოქნილია და მგზავრს მეტი არჩევანის საშუალება აქვს. საერთო ჯამში მინდა ხაზი გავუსვა, რომ ქუთაისისა და თბილისის საერთაშორისო აეროპორტებიდან, ჯამში, გერმანიის 8 ქალაქთან გვაქვს ავიამიმოსვლა. ვცდილობთ, რომ ეს ციფრი მუდმივად გავზარდოთ და არ შევამციროთ, რათა უფრო მეტი კომფორტი შევუქმნათ ჩვენს მგზავრებს - ავიამიმოსვლა იყოს უფრო მოქნილი, სწრაფი და მოხერხებული. სტაბილურობა და სანდოობა ძალიან მაღალი გვაქვს ავიასექტორშიც“, - აცხადებს მოსეშვილი.