Paprika ორგანული ნედლეულით დამზადებული ქართული სანელებლების მწარმოებელი კომპანიაა, რომელიც სამი წელია ბაზარზე ოპერირებს. Business Insider Georgia 2025 წლის შედეგებსა და სამომავლო გეგმებზე კომპანიის საზოგადოებასთან ურთიერთობის მენეჯერს, თეკლა ჩხეიძეს ესაუბრა.

- როგორ აფასებთ 2025 წელს?

2025 წელი „პაპრიკას“ სუნელებისთვის სტაბილური და წარმატებული აღმოჩნდა. კომპანიამ მოახერხა ექსპორტის გაფართოება და საკუთარი პროდუქციის ოთხ სხვადასხვა ქვეყანაში გატანა, რაც მნიშვნელოვანი ნაბიჯია საერთაშორისო ბაზრებზე პოზიციონირების თვალსაზრისით.

განსაკუთრებით აღსანიშნავია „პაპრიკას“ სუნელების მონაწილეობა IFEMA Madrid-ის საერთაშორისო გამოფენაში, რამაც მნიშვნელოვნად გაზარდა ინტერესი კომპანიის პროდუქციის მიმართ, როგორც დისტრიბუტორების, ისე პოტენციური პარტნიორების მხრიდან. გამოფენაზე წარმოდგენილმა ქართულმა სუნელებმა კიდევ ერთხელ დაადასტურა მათი ხარისხი, უნიკალური გემო და კონკურენტუნარიანობა საერთაშორისო ბაზარზე.

ამ ეტაპზე „პაპრიკას“ სუნელები აქტიურ მოლაპარაკებებს აწარმოებს სხვადასხვა ქვეყნის წარმომადგენლებთან. კომპანიის მიზანია საექსპორტო ბაზრების გაფართოება და გრძელვადიანი პარტნიორული ურთიერთობების ჩამოყალიბება, რაც მომავალ წლებში კიდევ უფრო გააძლიერებს ბრენდის პოზიციებს.

„პაპრიკას“ სუნელები განაგრძობს განვითარებას ხარისხზე, ინოვაციებსა და საერთაშორისო სტანდარტებზე ორიენტირებით, რათა ქართული პროდუქტი ღირსეულად იყოს წარმოდგენილი მსოფლიო ბაზარზე.

- როგორია კომპანიის გეგმები 2026 წლისთვის? განსაკუთრებით, გაფართოების / ასორტიმენტის ზრდის მიმართულებით?

2026 წელს „პაპრიკას“ სუნელები განვითარების ახალ, სტრატეგიულ ეტაპზე გადადის. კომპანიის განვითარების გეგმა ორიენტირებულია პროდუქტის ასორტიმენტის გაფართოებასა და საქმიანობის კატეგორიულ დივერსიფიკაციაზე, რაც მიზნად ისახავს როგორც არსებული ბაზრების გაძლიერებას, ისე ახალი საექსპორტო მიმართულებების განვითარებას.

სუნელების მიმართულების პარალელურად, კომპანია გეგმავს ახალი კატეგორიის - ქართული თხილის ინტეგრირებას პროდუქციის პორტფელში. აღნიშნული გადაწყვეტილება ეფუძნება საერთაშორისო ბაზრებზე არსებულ მოთხოვნასა და საქართველოს აგრო-პროდუქციის საექსპორტო პოტენციალს. განსაკუთრებული ყურადღება ეთმობა ხარისხის კონტროლს, წარმოების სტანდარტიზაციასა და პროდუქციის შესაბამისობას საერთაშორისო მოთხოვნებთან.

ცნობისთვის, პროდუქცია ხარისხის კონტროლის საერთაშორისო სტანდარტებით გათვალისწინებულ ყველა საფეხურს გადის - დაწყებული პროდუქტის გადარჩევიდან დამთავრებული შეფუთვით. წარმოებისთვის გამოიყენება ბიოლოგიურად სუფთა, ორგანული ნედლეული.