კომპანია „ხახაბო“ პროდუქციის ექსპორტზე გატანას გეგმავს

ბიზნესი

კომპანია „ხახაბო“ პროდუქციის ექსპორტზე გატანას გეგმავს

13.03.2026.10:00

ნატურალური ზეთების მწარმოებელი კომპანია „ხახაბო“ პროდუქციის ექსპორტზე გატანას გეგმავს , - ამის შესახებ Business Insider Georgiaს კომპანიის დამფუძნებელმა, ზაქარია სვიმონიშვილმა განუცხადა.

„ვგეგმავთ პროდუქციის ამერიკისა და იაპონიის ბაზრებზე გატანას. უკვე არსებობს დაინტერესება და კონკრეტული შემოთავაზებები, ამ ეტაპზე კი მოლაპარაკებები მიმდინარეობს. უახლოეს პერიოდში საბოლოო პასუხიც გვეცოდინება “, - აცხადებს კომპანიის დამფუძნებელი.

ამჟამად, „ხახაბო“ 7 სახეობის ზეთს აწარმოებს, ასორტიმენტის ზრდა არ მომხდარა.

„გვაქვს 7 სახეობის ზეთი, ასორტიმენტი არ გაგვიზრდია. ესენია: სელის, გოგრის, ჩიას, სეზამის, ნუშის, ნიგვზის და შავი კვლიავის ზეთი “, - აღნიშნავს ზაქარია სვიმონიშვილი.

მოთხოვნა პროდუქციაზე სტაბილურად მზარდია.

„მოთხოვნა საკმაოდ მზარდია. 2025 წელს, წინა წელთან შედარებით, ზრდამ 50%-ს გადააჭარბა.

ჩვენი მთავარი ფოკუსი ექსპორტისკენ არის მიმართული. ამ ეტაპზე ველით მოლაპარაკებების დასრულებას “, - ამბობს კომპანიის დამფუძნებელი.

ინფორმაციისთვის, „ხახაბოს“ ზეთები სამკურნალო და კოსმეტიკური ხაზით იწარმოება, გამოიყენება კულინარიაშიც. პროდუქტი 100%-ით ნატურალურია. მზადდება მთლიანად ცივი დაწურვის მეთოდით, ყოველგვარი კონსერვანტების გარეშე.