Khvanchkara Winery • ხვანჭკარის ღვინის მარანი გაყიდვებში 20%-იან ზრდას აფიქსირებს. ამის შესახებ Business Insider Georgia-სთან საუბარში კომპანიის გენერალურმა დირექტორმა, გიორგი ჭანტურიამ, განაცხადა.

„წელს გაყიდვებში დაახლოებით 20%-იანი ზრდა გვაქვს. წარმოდგენილები ვართ როგორც ადგილობრივ, ისე საექსპორტო ბაზრებზე.
ადგილობრივ ბაზარზე აქტიურად ვართ წარმოდგენილები რითეილში, ასევე ღვინის ბარებსა და ჰორეკა სექტორში.
ექსპორტზე ვართ როგორც პოსტსაბჭოთა სივრცის ქვეყნებში, ასევე გერმანიასა და აშშ-ში. ახალ ბაზრებზე განსაკუთრებულად დიდი გადაზიდვები არ გაგვიკეთებია,“ - აღნიშნა გიორგი ჭანტურიამ.
მისივე თქმით, კომპანია Khvanchkara Winery ინტენსიურად მუშაობს საექსპორტო არეალის გაფართოებაზე.

„აქტიურად ვმუშაობთ საექსპორტო არეალის გაფართოებაზე. რეალურად ამ მიმართულებით და ზოგადად ბაზრების დივერსიფიკაციაზე ყოველდღიური მუშაობა გვაქვს. არიან დაინტერესებული კომპანიები, ტარდება დეგუსტაციები. გარკვეულ შედეგებს და ახალ პარტნიორებს იანვარ-თებერვლიდან ველოდებით, როდესაც ახალი ღვინოები უკვე მზად იქნება,“ - აღნიშნა დირექტორმა.
გიორგი ჭანტურიას თქმით, კომპანია განსაკუთრებულ ყურადღებას უთმობს საერთაშორისო გამოფენებში მონაწილეობას, მათ შორის ერთ-ერთ უმსხვილესს - ProWein-ს, რომელიც გერმანიის ქალაქ დიუსელდორფში 1994 წლიდან ტარდება.

„ამ გამოფენას დიდ მნიშვნელობას ვანიჭებთ, რადგან ის ერთ-ერთი ყველაზე მოთხოვნადი და მასშტაბური ღონისძიებაა. ვინც კი ამ სფეროთი არის დაინტერესებული, ყველა იქ იყრის თავს,“ - ამბობს ჭანტურია.
მისივე თქმით, წელს რაჭაში გაცილებით უკეთესი მოსავალი დაფიქსირდა, რის გამოც ღვინის საწარმოებმაც უფრო მეტი ყურძენი გადაამუშავეს.

„წელს რაჭაში, ისევე როგორც მთელ საქართველოში, ძალიან დიდი მოსავალი იყო - ჩვენს რეგიონში დაახლოებით 80%-ით მეტი. შესაბამისად, ჩვენს მიერ გადამუშავებული ყურძნის მოცულობაც მნიშვნელოვნად გაიზარდა - შარშანდელთან შედარებით პრაქტიკულად გაორმაგდა,“ - აღნიშნა Khvanchkara Winery-ის დირექტორმა.

ცნობისთვის, ხვანჭკარის ღვინის ქარხანა 1927 წელს რაჭაში, ამბროლაურის რაიონის სოფელ ხვანჭკარში, თავადი ყიფიანის მარნის ადგილზე შეიქმნა. დღეს იგი შპს „ხვანჭკარა“-ს წარმოადგენს. წლების განმავლობაში ქარხანაში მოღვაწე მეღვინეები ახალი თაობებისთვის ინარჩუნებენ ყიფიანებისეულ ტრადიციულ მეთოდს, რამაც „ხვანჭკარას“ ღვინო მსოფლიოს არაერთ ქვეყანაში გაუთქვა სახელი.