ყველაფერი მსუბუქი გატაცებით დაიწყო, შემდეგ შევყევი ძველი ხევსურული ნაქარგების შესწავლას და სურვილი გამიჩნდა, რომ ყველაფერი ისეთ მაღალ დონეზე გამეკეთებინა, როგორც ეს წინაპრების მიერ დატოვებულ ნიმუშებშია, - ამის შესახებ Business Insider Georgia-ს - ბრენდის ავტორმა მანანა მჭედლიშვილმა განუცხადა.

„ჩემს საქმეს ერთი ნემსის ბიზნესს ვუწოდებ. ხელით ვქარგავ და ვკერავ, რადგან ეს სპეციფიკური საქმეა და მეშინია ნაქარგი არ დაზიანდეს. საქმე იმდენად შრომატევადია, რომ ჩემს ნაქარგებს გასაყიდად ვერ ვიმეტებ. ამ შრომის ფასი მაღალია, ხოლო საზოგადოების ფინანსური შესაძლებლობები დაბალი. ხშირად ვმონაწილეობ გამოფენებში და „ნაჭრელა“ ბიზნესის სახეს ახლა იღებს, რადგან გაჩნდა შანსი, რომ ჩემი ნაქარგები აშშ-ის ბაზარზე გავიდეს“, - ამბობს მანანა მჭედლიშვილი.

აშშ-ის ბაზარზე შესვლის შანსი მას შემდეგ გაჩნდა, რაც სოციალურ ქსელიდან გაიგო, რომ აშშ-ში იხსნება მაღაზია, სადაც ქართული სუვენირები და ხელნაკეთი ნივთები გაიყიდება. მაღაზიის წარმომადგენლებს დაუკავშირდა და „ნაჭრელას“ პირველი პროდუქცია, აშშ-ში ფილადელფიაში ქართული სუვენირების მაღაზიაში მარტიდან გაიყიდება.

რაც შეეხება სამომავლო გეგმებს, „ნაჭრელა“ თანდათან წარმატებულ ბიზნესად ჩამოყალიბდება.

„საქართველოს სავაჭრო სამრეწველო პალატამ გამოაცხადა კონკურსი „უფასო ვებგვერდი ბიზნესს“ და რამდენიმე გამარჯვებულს გვიმზადებენ ვებგვერდს და უახლოეს თვენახევარში მექნება გამართული გვერდი. სადაც გარდა გაყიდვებისა მინდა დიდი ყურადღება დავუთმო პოპულარიზაციას და ხევსურული ნაქარგის შემეცნებით მხარეს და ინფორმაცია მივაწოდო მკითხველსა და მომხმარებელს. ამასთან, რასაც ხევსურულ ნაჭრელას უწოდებენ, პროცესი იქამდე მივიყვანო, რომ არამატერიალური კულტურული ძეგლების ნუსხაში შევიდეს. სატანადო მასალები უკვე მოგროვილი მაქვს,“ - ამბობს მანანა მჭედლიშვილი.

ხევსურული ნაქარგების სპეციალისტი ამბობს, რომ მისი ნაწარმით ერთ-ერთი ადგილობრივი მსხვილი კომპანია დაინტერესდა და მალე ბაზარზე ერთობლივ პროდუქტსაც გამოიტანენ, ჯერჯერობით სხვა დეტალები კონფიდენციალური რჩება.

მანანა მჭედლიშვილი ხევსურული ნაქარგი - ნაჭრელას მეთოდით ამზადებს თმის აქსესუარებს, ყელსაბამებს, გულისპირებს, ქამრებს, ჩანთებს.