ჩვენ ვართ პირველი ეროვნული სამოსის კომპანია ISO 9001 სერტიფიკატით , - ამის შესახებ Business Insider Georgia-ს ქართულ მოტივებზე შექმნილი სამოსის მწარმოებელი კომპანია „ფაფანაკის“ დამფუძნებელმა ნინო ჭყონიამ განაცხადა.

„უნდა აღინიშნოს, რომ ჩვენ ვართ პირველი ეროვნული სამოსის კომპანია, რომელმაც აღნიშნული სტანდარტი (ISO 9001) სრულად დანერგა და სერტიფიცირება მოიპოვა, რაც განსაკუთრებით საამაყოა. პროცესი დაახლოებით ერთი წლის განმავლობაში მიმდინარეობდა, რომლის ყველა ეტაპიც წარმატებით გავიარეთ და შედეგად აღნიშნული სერტიფიკატი მოვიპოვეთ.

ზოგადად, ISO სტანდარტი არ მოიცავს მხოლოდ მენეჯმენტის სისტემას - იგი გულისხმობს პროცესების სრულ სტანდარტიზაციასა და ეფექტიან მართვას.

საერთაშორისო ბაზრებზე გასვლის პროცესში სერტიფიცირება ერთ-ერთი პირველი და აუცილებელი მოთხოვნაა, რომელსაც პრაქტიკულად ყველა ბაიერი ყურადღებას აქცევს.

ახლა უკვე შეგვიძლია თამამად შევთავაზოთ ჩვენი პროდუქცია საერთაშორისო ბაზარს და აქტიურად ვმუშაობთ ამ მიმართულებით. სწორედ ეს იყო და არის ჩვენი მთავარი მიზანი.

გარდა ამისა, ვცდილობთ გავზარდოთ საწარმოო შესაძლებლობები - აქტიურად ვმუშაობთ როგორც ლოკაციის ცვლილებაზე, ისე გუნდის გაფართოებაზე. ეს საშუალებას მოგვცემს, ექსპორტისთვის პროდუქციის წარმოება და მიწოდება კიდევ უფრო სტაბილური და ეფექტიანი გავხადოთ.

ასევე ვმუშაობთ დამატებითი რესურსების, მათ შორის სპონსორების მოზიდვაზე. ჩვენი მიზანია, მეტი განვითარება მივცეთ ეროვნული სამოსის სფეროს, რომელიც განსაკუთრებულად შრომატევადია - კადრების გადამზადება, მათი სწავლება და შემდგომი დასაქმება დიდ დროსა და ძალისხმევას მოითხოვს.

სამომავლოდ ვგეგმავთ, შევქმნათ მინი-სასწავლო სივრცე და დავნერგოთ სპეციალიზებული კურსები, სადაც კურსდამთავრებულებს ექნებათ შესაძლებლობა, ჩვენს კომპანიაში დასაქმების.

ჩვენთვის, ეროვნული სამოსის შექმნა მხოლოდ ტრადიციის შენარჩუნება არ არის - ეს არის პასუხისმგებლობა ქვეყნისა და კულტურის წინაშე “, - აცხადებს ნინო ჭყონია.

ინფორმაციისთვის, „ფაფანაკი“ თბილისში ფლობს სამკერვალოს და ასევე მაღაზიას ფალიაშვილის ქუჩაზე.