„კერკი“ ქართული მშრალი ხილის ბრენდია, რომელიც 2021 წლიდან ოპერირებს ბაზარზე. Business Insider Georgia კომპანიის დირექტორს თამარ გაბეჩავას 2025 წლის შედეგებსა და სამომავლო გეგმებზე ესაუბრა.

როგორ აფასებთ 2025 წელს?

„კერკის“ პროდუქტებზე მოთხოვნა 2025 წელს წინა წლებთან შედარებით გაიზარდა, განსაკუთრებით წინასაახალწლო პერიოდში.

„კერკი“ მომხმარებლებს სთავაზობს როგორც ტრადიციულ ჩირეულს, ასევე ინოვაციურ პროდუქტებს, რომელთა გაყიდვების სტატისტიკა მზარდია. კერძოდ, მანდარინის ჩიფსს, განსხვავებული ტექნოლოგიით დამუშავებულ გამოშრალ ხურმას და განსაკუთრებით საინტერესო - ხილის თხევადი მასის გამოშრობით მიღებულ ჯანსაღ სნექსს, ხილის ფირფიტებს, რომლებიც „ბატონის ფორმაში“ არის შეფუთული.

როგორია კომპანიის გეგმები 2026 წლისთვის, განსაკუთრებით გაფართოების / ასორტიმენტის ზრდის მიმართულებით?

2026 წლის თებერვლიდან „კერკი“ „მშრალი ხილის“ კონცეფციით გაზრდის როგორც ასორტიმენტს, ასევე გაყიდვების არხებს.

„კერკის“ პროდუქცია ძირითადად თბილისში, ბათუმსა და მაგისტრალზე მდებარე სურსათის სავაჭრო ქსელებში იყიდება. 2026 წლიდან კომპანია გაყიდვების არხების გეოგრაფიული არეალის ზრდას გეგმავს.

ვგეგმავთ, გაყიდვების ინფრასტრუქტურის შექმნას სავაჭრო მოლებში, ასევე გავხდებით ხილის გამოშრობის მიმართულებით მომუშავე ადგილობრივი მცირე საწარმოების და საოჯახო მეურნეობებისთვის პროდუქტების გაყიდვების მხარდამჭერი. მოგეხსენებათ, მცირე საწარმოებს და საოჯახო მეურნეობებს ძალიან უჭირთ სავაჭრო ქსელებში შესვლა, საკომისიოების გადახდა, ბრენდიგი, მარკეტინგი, პროდუქტების წარმოებისთვის საჭირო საბრუნავი რესურსის მოძიება. „კერკი“ ერთის მხრივ, გააძლიერებს და გააფართოებს თავისი გაყიდვების არხებს და მეორეს მხრივ, მცირე საწარმოების და საოჯარო მეურნეობებისთვის გახდება სტაბილური პარტნიორი.

„კერკის“ ბრენდით ,,მშრალი ხილის’’ მიმართულება 2026 წლიდან ეტაპობრივად ასობით სავაჭრო ობიექტში გამოჩნდება და მომხმარებელს მრავალფეროვან ასორტიმენტს შესთავაზებს.

გასულ წლებში, ბრენდის მთავარი მიმართულება იყო სავაჭრო ქსელებში პროდუქციის გაყიდვა, ხოლო მიმდინარე წლის შემოდგომაზე გადავწყვიტეთ კორპორატიული მიმართულებით გააქტიურება. ერთგვარი პილოტირების ეტაპი წარმატებული გამოდგა და 2026 წლიდან „კერკი“ განსაკუთრებულად გააძლიერებს კორპორატიულ გაყიდვებს.

ცნობისთვის, მშრალი ხილის ქართული საწარმო ,,კერკი“ აჭარაში, კერძოდ ქედის მუნიციპალიტეტის სოფ. ძენწმანში მდებარეობს.