კახეთში მდებარე სასტუმრო "თვინს ჰოტელში", რომელიც „ტყუპების საღვინე სახლის“ ტურისტული ობიექტია, აგვისტოში უფრო მაღალ დატვირთულობას ელოდებიან, ვიდრე ივლისის თვის განმავლობაში. როგორც Business Insider Georgia-სთან „ტყუპების საღვინე სახლის“ მენეჯერმა ელდარ რამიშვილმა განაცხადა, ამ დროისათვის სასტუმროს ძირითად სტუმრებს ადგილობრივი მოსახლეობა წარმოადგენს. ასევე ადგილობრივი ბაზრისთვის გაშვებულია გარკვეული აქციებიც, რომლებიც Swoop-სა და HotSale-ს ვებ-გვერდებზეა ჩაშვებული. 

„აქციები გაქვს Swoop-სა და HotSale-ზე და ამ ეტაპზე ძირითადად ქართველ მომხმარებელზე ვმუშაობთ. არსებული ჯავშნების მიხედვით ივლისი შესაძლოა 30%-იანი დატვირთულობით დავხუროთ, თუმცა აგვისტოში დატვირთულობა შესაძლოა 40%-მდე ავიდეს“, - აცხადებს ელდარ რამიშვილი.

მისივე თქმით, უცხოელი სტუმრების გააქტიურება უფრო შემოდგომიდან არის მოსალოდნელი, რადგანაც რთველის გამო კახეთს ბევრი უცხელი დამსვენებელი ჰყავს.ამ დროის მაჩვენებლებით კი  "თვინს ჰოტელში" უცხოელი სტუმრების 70%-იან კლებაზე საუბრობენ. 

„ზოგადად ამ დროს უცხოელების ნაკადი ყოველთვის იყო, თუმცა წელს 70%-იანი კლება გაქვს. თუმცა სტუმრები გვყავს გერმანიიდან, ნიდერლანდებიდან, ბელგიიდან, რუსეთიდან“, - აცხადებს  „ტყუპების საღვინე სახლის“ მენეჯერი. 

რაც შეხება "თვინს ჰოტელში“ განთავსების ფასებს, სააქციო შეთავაზებების გარდა, წელს ფასები 20%-ითაა შემცირებული.

სასტუმრო 22 ნომერს აერთიანებს და მისი ყველა ოთახი აღჭურვილია თანამედროვე გათბობა-გაგრილებისა და ცხელი წყლის სისტემებით.

ტყუპების საღვინე სახლი / Twins Wine House გარდა ღვინის წარმოებისა და სასტუმრო კომპლექსისა მოიცავს ქვევრისა და ღვინის მუზეუმს, ღია და დახურული ტყუპის მარნებს, ღია აუზსა და საუნას, სარესტორნო და საბანკეტო სივრცეებს, სადაც საუკეთესოდ შეგიძლიათ გაატაროთ დრო. კომპლექსი მუდამ ღიაა როგორც ქართველი, ისე უცხოელი სტუმრებისთვის.

დღესდღეობით „ტყუპების საღვინე სახლი“ ყოველწლიურად დაახლოებით 250 000 ლიტრ ღვინოს აწარმოებს, რომლის ნახევარიც ქართულ ბაზარს მიეწოდება, დანარჩენი კი ექსპორტზე გადის. კომპანიის მთავარი ნიშა ქართული ტრადიციული წესით, ქვევრში დაყენებული ღვინოა.