ჯორჯიან უოთერ ენდ ფაუერის მფლობელი, წყალმომარაგების ესპანური კომპანია Aqualia საერთაშორისო ოპერირების არეალს კიდევ უფრო აფართოებს. ამჯერად კომპანია იაპონიის ბაზარზე იწყებს ისტორიულ პროექტს: ქალაქ ტოიოჰაშიში წყალგამწმენდი ნაგებობის რენოვაციასა და აიჩის პრეფექტურაში ორი სადგურის 30-წლიან ექსპლუატაციას.

იაპონიაში შეთანხმებული კონტრაქტი ნერგავს ჰიბრიდულ Build-Transfer (BT) და ინოვაციურ მოდელს. პროექტის ფარგლებში აშენდება უახლესი ტექნოლოგიებით აღჭურვილი სადგური, რომელიც დღეში 80 000 მ³-ზე მეტ წყალს დაამუშავებს.

აღნიშნული სახელშეკრულებო მოდელის მეშვეობით Aqualia კიდევ ერთხელ ხაზს უსვამს ერთგულებას ინოვაციების, ინტეგრირებული მენეჯმენტისა და სუფთა ენერგიის მიმართ, რაც აძლიერებს კომპანიის გლობალურ ლიდერობას მდგრადი ინფრასტრუქტურის სფეროში და წყლის სექტორის გამოწვევების წარმატებით დაძლევაში.

Aqualia-მ, Infroneer Holdings Co., Ltd.-ის ხელმძღვანელობით შექმნილ კონსორციუმთან ერთად, მოიპოვა ტოიოჰაშის წყალგამწმენდი სადგურის რენოვაციისა და აიჩის პრეფექტურაში მდებარე ორი წყალგამწმენდი სადგურის 30-წლიანი ოპერირების პროექტი. ეს კონტრაქტი ისტორიული მნიშვნელობისაა, რადგან იაპონიაში, დასავლური კომპანიის ჩართულობით, პირველად აერთიანებს Build-Transfer (BT) მოდელს კონცესიასთან.

ტოიოჰაშის ქარხანა, რომელიც ფუნქციონირებს 1967 წლიდან, ყოველდღიურად ამუშავებს 80 000 მ³ წყალს ტოიოჰაშის, ტოიოკავას და შინშიროს ქალაქებისთვის, ემსახურება ჰიგაში მიკავას რაიონს (აიჩის პრეფექტურის აღმოსავლეთი ნაწილი). ხუთი ათწლეულის განმავლობაში უწყვეტი მუშაობის შედეგად, ობიექტებს სჭირდებათ სრულფასოვანი მოდერნიზაცია, რათა გაიზარდოს ეფექტურობა და უზრუნველყოფილი იყოს მდგრადობა მაღალი სეისმური აქტივობის პირობებში.

პროექტის ფარგლებში აშენდება უახლესი ტექნოლოგიებით აღჭურვილი სადგური, რომელიც საკუთრებად გადაეცემა პრეფექტურას, ხოლო ექსპლუატაცია და მოვლა-პატრონობა განხორციელდება საჯარო-კერძო პარტნიორობის ფორმატში. კონცესია გაგრძელდება 20 წლის განმავლობაში, რაც კერძო სექტორის გამოცდილების დახმარებით მდგრად და ეფექტურ მომსახურებას უზრუნველყოფს.

პროექტი ითვალისწინებს უახლეს ტექნოლოგიებს, IoT (Internet of Things) სენსორებისა და ჭკვიანი მონიტორინგის სისტემების დანერგვას, რაც უსაფრთხო და მდგრადი წყალმომარაგების გარანტიაა. მოდელი ასევე მოიცავს კრიზისების მართვას ანტისეისმური დიზაინის შესაბამისად, ხელს უწყობს ჰიბრიდული ენერგიის გამოყენებას და უზრუნველყოფს ინტეგრირებულ მართვას, რომელიც წყლის რესურსების მენეჯმნეტს რეგიონულ ეკონომიკურ განვითარებასთან აკავშირებს.

იაპონიის ბაზარზე შესვლით, Aqualia კიდევ უფრო აძლიერებს თავის საერთაშორისო პოზიციებს. კომპანია უკვე 19 ქვეყანაში ოპერირებს (ალჟირი, საუდის არაბეთი, კოლუმბია, ჩილე, ეგვიპტე, არაბთა გაერთიანებული საამიროები, ესპანეთი, აშშ, საფრანგეთი, საქართველო, იტალია, იაპონია, მექსიკა, ომანი, პერუ, პორტუგალია, კატარი, ჩეხეთი და რუმინეთი) და მდგრადი ინფრასტრუქტურის მეშვეობით მომსახურებას მსოფლიოს 45 მილიონზე მეტ ადამიანს უწევს.

წლების განმავლობაში განხორციელებული მასშტაბური გაფართოების შედეგად, მათ შორის შეერთებულ შტატებში (2024) და საქართველოში (2022), Aqualia აგრძელებს საერთაშორისო განვითარების სტრატეგიას, ზრდასა და ფინანსურ სიძლიერეს. კომპანიის საერთაშორისო მიმართულებამ მთლიანი შემოსავლის თითქმის ნახევარი შეადგინა და 2024 წლის ბოლოს 731 მილიონ ევროს მიაღწია.

Aqualia წყლის მენეჯმენტის კომპანიაა, რომელსაც FCC (51%) და IFM Investors (49%) ფლობს. Aqualia მომხმარებელთა რაოდენობის მიხედვით (Global Water Intelligence-ის 2024 წლის დეკემბრის რეიტინგის მიხედვით) მეოთხე უმსხვილესი წყლის მენეჯმენტის კომპანიაა ევროპაში ხოლო მეცხრე მსოფლიოში.