ხელნაკეთი სათამაშოების მწარმოებელი ბრენდი „ჯეინის თოჯინები“ დიდი პოპულარულობით სარგებლობს. პროდუქცია მზადდება სრული სტანდარტების დაცვით, ბუნებრივი, ანტიალერგიული მასალებისგან და სრულიად უსაფრთხოა პატარებისთვის. ბრენდის დამფუძნებელი Business Insider Georgia -სთან 2025 წელზე, გამოწვევებსა და სამომავლო გეგმებზე საუბრობს. მისი თქმით, ბრენდისთვის გასული წელი საკმაოდ ნაყოფიერი იყო.

„რომ შევაჯამო გასული წელი, ძალიან კმაყოფილი ვარ საკუთარი თავით და იმით, რაც შევძელი. ნაყოფიერი წელი იყო, მოვახერხე სიახლეების შეტანა საქმიანობაში და აქტიურად ჩავერთე სხვადასხვა გამოფენებში.

რაც შეეხება შემდეგ წელს, კიდევ უფრო აქტიური ვიქნები. კვლავ მივიღებ მონაწილეობას გამოფენებში და საქმიანობას კიდევ უფრო მეტად განვავითარება. შეკვეთები იმატებს, ამიტომ მომიწევს დამატებითი კადრების აყვანაც. ამჟამად, 5 ყოფილი მოსწავლე მყავს დასაქმებული. მათთან მუშაობა ბევრად მარტივია, რადგან ზუსტად იციან ჩემი მიდგომები და მუშაობის სტილი.

საქართველოს ბაზარზე უამრავი სახეობის ძაფია, თუმცა მათი დიდი ნაწილი საკმაოდ სინთეტიკურია, ასეთ მასალას მე არ ვიყენებ. დაახლოებით 80% იმ პროდუქციის, რაც იყიდება, სწორედ ამ ტიპის ძაფით არის მოქსოვილი. მიზეზი მარტივია: ამ ძაფით ბევრად ადვილად მუშაობენ, არის მოცულობითი და სათამაშოებიც უფრო დიდი ზომის გამოდის. მომხმარებელს ხშირად ჰგონია, რომ დიდი ზომა მეტი შრომის შედეგია და შესაბამისად უნდა ღირდეს უფრო ძვირი, თუმცა ასე სულაც არ არის. ამიტომ ბევრი ქსოვს ამ ძაფით.

მე ამ მიდგომის მომხრე არ ვარ, განსაკუთრებით მაშინ, როცა საქმე ბავშვებისთვის შექმნილ სათამაშოებს ეხება, მსგავსი ტიპის ძაფი არ არის რეკომენდებული პატარებისთვის. ამიტომ ჩემს მოსწავლეებს თავიდანვე ვასწავლი, რომ გარკვეულ მასალებს საერთოდ არ უნდა შეეხონ. სწორედ ამ მიზეზით მირჩევნია ჩემ მიერ გადამზადებული კადრების აყვანა, ეს ბევრად მარტივია როგორც ჩემთვის, ისე მათთვის.

სივრცის გახსნაზე ვფიქრობდი, მაგრამ ამ ეტაპზე არ ვფიქრობ.
დიდია მოთხოვნა არა თბილისში მაცხოვრებლებისგან, რომლებიც უპირატესობას ონლაინ სივრცეს ანიჭებენ, ამიტომ ეს საკითხი დროებით დავაპაუზე.

აღსანიშნავია, რომ კომპანია 8 წელია რაც ბაზარზე ოპერირებს. ბრენდის დაარსების იდეა საკუთარი შვილისთვის შექმნილ სათამაშოს უკავშირდება. ამის შემდეგ გადაწყვიტა დამფუძნებელმა ამ ყველაფრის საქმედ ქცევა. ჯეინ გომურაშვილი იმასაც აღნიშნავს, რომ იმ პერიოდში, როდესაც მან საქმიანობა დაიწყო, მსგავსი ტიპის სათამაშოები ქართულ ბაზარზე არ არსებობდა და სწორედ „ჯეინის თოჯინები“ აღმოჩნდა პირველი, ვინც ამ ყველაფერს ხელი შეუწყო.