illy Caffè Georgia • ილი კაფე, რომელმაც 2025 წელს ორი ფილიალი დაამატა, გაფართოებას 2026 წელსაც გეგმავს. როგორც Business Insider Georgia-სთან საქართველოში illy Caffè-ს ფრანჩაიზის მფლობელი კომპანიის „ჯორჯიან რითეილ ინვესტმენთსის“ დირექტორმა ლაშა კრიჭაშვილმა განაცხადა, illy Caffè-ს გახსნა ბათუმში იგეგმება.

„გასულ წელს უკვე გავიხსენით თბილისი მოლსა და ისთ ფოინთის ახალ შენობაში. უკვე აქტიურად ვმუშაობთ ბათუმის პროექტზე. ადგილს ვეძებთ - უფრო ძველი ბათუმისკენ ვიხრებით, სადაც სტუმრიანობა და ტურისტული მხარე უფრო მეტად აქტიურია. თუ შესაბამისი ფართი მოვიძიეთ, მაშინ ბათუმში illy Caffè-ს წლის ბოლოსთვის გავხსნით. ბათუმის ფილიალი იქნება დიდი მოცულობის, დაახლოებით 200 კვ/მ-მდე, ისეთი, როგორიც გალერიაში, თბილისში გვაქვს“, - აცხადებს ლაშა კრიჭაშვილი.

აღსანიშნავია, რომ illy Caffè თბილისში დღეისათვის 4 ობიექტით არის წარმოდგენილი. როგორც „ჯორჯიან რითეილ ინვესტმენთსის“ დირექტორი აცხადებს, illy Caffè-ში მოხდა ასორტიმენტის გამრავალფეროვნება და ქართველი მომხმარებლისთვის ახალი პროდუქტების შეთავაზება.

„ასორტიმენტი ჩვენი სტანდარტიდან გამომდინარე იგივე გვაქვს, მაგრამ მაჩას კუთხით წავედით - მაჩა ლატე, მაჩა კაპუჩინო, ცივი მაჩა ლატე, ცივი კაპუჩინო და სხვა.

ახალი პროდუქტების რეალიზაციით ამ მომენტისთვის კმაყოფილები ვართ. რაც შეეხება გალერიას ფილიალს, სადაც სრული მენიუ გვაქვს წარმოდგენილი, დავამატეთ სპაგეტის, სენდვიჩების, ბურგერის მიმართულება და ძირითადი კერძების მიმართულება“, - აღნიშნავს „ჯორჯიან რითეილ ინვესტმენთსის“ დირექტორი.

illy Caffè-ში მენიუს კუთხით გარკვეული ცვლილებები წლის განმავლობაში იგეგმება, თუმცა ფრანჩაიზის მფლობელს დეტალური ინფორმაცია illy-ს სათაო ოფისიდან უკვე თებერვლის ბოლოს ექნება.

„მენიუსთან დაკავშირებით წინასწარ ასე ვერ გეტყვით, რადგან ჩვენ თვითონ Illy-ზე ვართ დამოკიდებული და დაახლოებით თებერვლის ბოლოსკენ მეცოდინება უკვე, რა შემიძლია მომხმარებელს შევთავაზო“, - აცხადებს ლაშა კრიჭაშვილი.

illy Caffè არის იტალიური ყავის კომპანია, რომელიც ცნობილია პრემიუმ ხარისხის ყავითა და ინოვაციური მიდგომებით. კომპანიის დაარსება მოხდა 1933 წელს, როდესაც ყავის ექსპერტმა Francesco Illy-მა შექმნა თავისი პირველი ყავის დანადგარი, რომელიც ყავის ზეთების საუკეთესო შენახვას უზრუნველყოფდა.

Francesco Illy-მა კომპანიის დაარსების შემდეგ მიზნად დაისახა ყავის უმაღლესი ხარისხის მიწოდება. ჯერ კიდევ დასაწყისში, Illy-მ წარმატებით შექმნა სპეციალური სისტემები ყავის საფასურისა და ხარისხის კონტროლისთვის. შემდეგ მისმა შთამომავალმა Ernesto Illy-მ მასშტაბური ინოვაციები და ახალი ტექნოლოგიები დაამატა, რის შედეგადაც Illy Caffè დღესდღეობით მსოფლიოში ერთ-ერთ საუკეთესო ყავის კაფედ ითვლება.