2025 წლის იანვარ-სექტემბრის განმავლობაში სადაზღვევო სექტორის მიერ მოზიდულმა პრემიამ 1 098 მილიონი ლარი შეადგინა. აღნიშნულის შესახებ ინფორმაციას საქართველოს დაზღვევის სახელმწიფო ზედამხედველობის სამსახური ავრცელებს. ამავე პერიოდის შედეგებით მზღვეველების სადაზღვევო მოგებამ შეადგინა 272 მილიონი ლარი, წმინდა მოგებამ კი 113 მილიონი ლარი.  სადაზღვევო კომპანიების აქტივების ჯამური მოცულობა შეადგენს 1 696 მილიონ ლარს, ხოლო კაპიტალი 517 მილიონ ლარს. 

2025 წლის 30 სექტემბრის მდგომარეობით რეგისტრირებულია 19 სადაზღვევო კომპანია, რომლებიც ფლობენ სიცოცხლის და არასიცოცხლის დაზღვევის ლიცენზიას. 

უფრო კონკრეტულად, მიმდინარე წლის 9 თვის სტატისტიკით, სადაზღვევო კომპანიების მიერ მოზიდული პრემია პირდაპირი დაზღვევის საქმიანობიდან 1 098 მლნ. ლარი, მაშინ როდესაც 2024 წლის 9 თვეში ეს მაჩვენებლები 983 მლნ. ლარს შეადგენდა. ზრდა 12%-მდეა.

სექტორის მიერ მოზიდული სადაზღვევო პრემია დაზღვევის სახეობების მიხედვით ასე გამოიყურება:

• სამედიცინო (ჯანმრთელობის) დაზღვევა - 478.1
• სახმელეთო სატრანსპორტო საშუალებათა დაზღვევა (გარდა სარკინიგზო ტრანსპორტისა) - 226.6
• ქონების დაზღვევა - 128.4 მლნ ლარი;
• სიცოცხლის დაზღვევა - 94.1 მლნ ლარი;
• სახმელეთო ტრანსპორტის გამოყენებასთან დაკავშირებული სამოქალაქო - 67.1 მლნ ლარი;
• სამოქალაქო პასუხისმგებლობის დაზღვევა - 25.8 მლნ ლარი;
• უბედური შემთხვევის დაზღვევა - 15.9 მლნ ლარი;
• ტვირთების დაზღვევა - 13.6 მლნ ლარი;
• სამოგზაურო დაზღვევა - 12.1 მლნ ლარი;
• საჰაერო სატრანსპორტო საშუალებათა დაზღვევა (კორპუსის დაზღვევა) - 12.1 მლნ ლარი;
• ვალდებულებათა შესრულების დაზღვევა - 10.8 მლნ ლარი;
• საჰაერო სატრანსპორტო საშუალებათა გამოყენებასთან დაკავშირებული - 7.9 მლნ ლარი;
• დაზღვევა საფინანსო დანაკარგებისაგან - 5.2 მლნ ლარი;
• მცურავი სატრანსპორტო საშუალებების დაზღვევა (კორპუსის დაზღვევა) - 0.5 მლნ ლარი;

სტატისტიკა ცხადყოფს, რომ ანაზღაურებული სადაზღვევო ზარალების მიხედვით კომპანია ჯიპიაი ლიდერობს, ხოლო 9 თვის განმავლობაში გამომუშავებული პრემიის მიხედვით ლიდერი თიბისი დაზღვევაა, ხოლო დამდგარი სადაზღვევო ზარალებში კომპანია ჯიპიაი არის პირველ ადგილზე.