„ფერმიო“ აგროციფრული პლატფორმაა, რომელიც ქართველ ფერმერებს, ადგილობრივ მწარმოებლებსა და მომხმარებლებს ერთმანეთთან პირდაპირ, შუამავლის გარეშე აკავშირებს. მეტი ინფორმაციისთვის, Business Insider Georgia „ფერმიოს“ დამფუძნებელს, თორნიკე სიხარულიძეს ესაუბრა.

რა არის კომპანიის საქმიანობის მთავარი მიმართულება, როდის შეიქმნა პლატფორმა და რა იდეას ეფუძნება მისი შექმნა?

„ფერმიო“ აგროციფრული პლატფორმაა, რომელიც ქართველ ფერმერებს, ადგილობრივ მწარმოებლებსა და მომხმარებლებს ერთმანეთთან პირდაპირ, შუამავლის გარეშე აკავშირებს. იდეა 2021 წელს გაჩნდა, ხოლო პლატფორმა დაახლოებით ორთვენახევრის წინ გავუშვით - თავდაპირველად ვებსაიტი, შემდეგ კი მობილური აპლიკაციები.

იდეამ მისი სრული სახე ჩვენი პროექტიდან, „მოიარე საქართველო”-დან მიიღო. უკვე სამი წელია, რეგიონებში ვმოგზაურობთ, ადგილობრივ ოჯახებში ვრჩებით და უამრავ უნიკალურ ფერმერსა და მეღვინეს ვხვდებით. ამ ადამიანებს საოცარი პროდუქცია და საინტერესო საქმიანობა აქვთ, თუმცა ხშირად მათი პროდუქტის შესახებ ქალაქში ცოტამ თუ იცის და მათთვის სასურველი მყიდველის პოვნა არც ისე მარტივია.

ამ გამოცდილებამ დაგვანახა, რომ სოფელს მხოლოდ პროდუქციის გაყიდვის შესაძლებლობა კი არა, მეტი კავშირი, ცნობადობა და განვითარების ახალი გზები სჭირდება. სწორედ ამიტომ შევქმენით „ფერმიო“ - პლატფორმა, რომელიც ადამიანებს დაეხმარება, მარტივად იპოვონ და შეიძინონ ადგილობრივი პროდუქცია, განათავსონ შეკვეთები, მოიძიონ მუშახელი, სასოფლო-სამეურნეო ტექნიკა და სხვადასხვა სერვისი, ასევე აღმოაჩინონ საოჯახო სასტუმროები, კოტეჯები და აგროტურისტული ადგილები.

ჩვენი მიზანია, „ფერმიო“ გახდეს სივრცე, სადაც სოფლის შესაძლებლობები უფრო დანახვადი და ხელმისაწვდომი იქნება, ფერმერებსა და ადგილობრივ ოჯახებს კი მეტი შემოსავლის მიღების, ახალი მომხმარებლების პოვნისა და განვითარების შესაძლებლობა მიეცემათ. გვინდა, რომ ამ პროცესით სარგებელი მხოლოდ ერთმა მხარემ კი არა, მთლიანად რეგიონებმა და ადგილობრივმა მოსახლეობამ მიიღოს.

რას სთავაზობს Fermio ფერმერებს და მომხმარებლებს და როგორ მუშაობს პლატფორმა პრაქტიკაში?

ფერმიო ფერმერებსა და მომხმარებლებს ერთ სივრცეში აერთიანებს და მათ შორის პირდაპირ კავშირს ამარტივებს. ფერმერისთვის რეგისტრაცია და პროდუქციის განთავსება სრულიად უფასოა. ჩვენ არ ვართ კლასიკური ელექტრონული კომერციის პლატფორმა - ფერმერი თავად აქვეყნებს განცხადებას, უთითებს ადგილმდებარეობასა და საკონტაქტო ინფორმაციას, მომხმარებელი კი პირდაპირ უკავშირდება მას. ფასზე, გადახდასა და მიწოდებაზე ისინი თავად თანხმდებიან, ჩვენი ჩარევის გარეშე. შესაბამისად, ფერმერებს არ ვაკისრებთ საკომისიოს ან ფარულ გადასახადებს.

თავდაპირველად პლატფორმა მხოლოდ აგროპროდუქციის გაყიდვაზე იყო ორიენტირებული, თუმცა გაშვების შემდეგ დავინახეთ, რომ სოფელსა და აგროსექტორს გაცილებით მეტი საჭიროება აქვს. ამიტომ „ფერმიო“ ეტაპობრივად განვავითარეთ და დღეს ის მხოლოდ პროდუქციის გაყიდვის სივრცე აღარ არის.

პლატფორმაზე შესაძლებელია ადგილობრივი აგროპროდუქციის მოძიება და განთავსება, ასევე მოთხოვნების გამოქვეყნება - მაგალითად, როდესაც კომპანიას ან ფიზიკურ პირს დიდი რაოდენობით თაფლი, თხილი, კარტოფილი ან სხვა პროდუქტი სჭირდება. დაინტერესებული ფერმერები თავად უკავშირდებიან დამკვეთს და პირობებს პირდაპირ ათანხმებენ.

გარდა ამისა, „ფერმიოზე“ შესაძლებელია სასოფლო-სამეურნეო ტექნიკისა და ინვენტარის მოძიება, ხელნაკეთი ნივთების განთავსება, მუშახელისა და სხვადასხვა სერვისების პოვნა. პლატფორმა ასევე აერთიანებს საოჯახო სასტუმროებს, კოტეჯებსა და აგროტურისტულ შესაძლებლობებს, მასტერკლასებსა და ტურებს. მომხმარებლებს შეუძლიათ, ჩაერთონ მოხალისეობრივ აქტივობებშიც.

ერთ-ერთი მნიშვნელოვანი ფუნქციაა „ჩემთან ახლოს“, რომელიც მომხმარებელს მითითებულ რადიუსში ადგილობრივი მწარმოებლების აღმოჩენაში ეხმარება. ამასთანავე უნდა ვახსენოთ პროდუქტებზე მოთხოვნის სტატისტიკა, რომელიც მომხმარებლებისთვის უკვე ხელმისაწვდომია. მისი საშუალებით შესაძლებელია იმის ნახვა თუ რომელ პროდუქტებზეა მოთხოვნა, რა რაოდენობით და როგორ იცვლება მოთხოვნა სხვადასხვა პერიოდში. ეს ინფორმაცია ფერმერებს ბაზრის საჭიროებების უკეთ დანახვასა და საკუთარი საქმიანობის დაგეგმვაში ეხმარება
ჩვენი მიზანია, „ფერმიო“ იყოს არა მხოლოდ პროდუქციის გაყიდვის პლატფორმა, არამედ სივრცე, სადაც ფერმერები პოულობენ მყიდველებს, დამკვეთები - საჭირო პროდუქციას, ადამიანები  სამუშაოსა და სერვისებს, ხოლო მოგზაურები - საქართველოს რეგიონებში დასვენებისა და ადგილობრივი ცხოვრების გაცნობის შესაძლებლობებს.

როგორია მომხმარებლებისა და ფერმერების მხრიდან ინტერესი ამ ეტაპზე და რომელ მიმართულებებსა და პროდუქტებზეა ყველაზე დიდი მოთხოვნა?

ამ ეტაპზე მომხმარებლებისა და ფერმერების მხრიდან ინტერესი ჩვენს მოლოდინს აჭარბებს. პლატფორმის გაშვებიდან დაახლოებით ორთვენახევარში „ფერმიოზე“ უკვე 2 400 რეგისტრირებული ფერმერი და 3 000-მდე განცხადებაა განთავსებული. ვებსაიტზე ათასობით ვიზიტის გარდა მობილური აპლიკაციების ჩამოტვირთვების რაოდენობამ 15 000-ს გადააჭარბა, ხოლო App Store-ში გამოჩენიდან 25-ე დღეს აპლიკაციამ ყველა კატეგორიის ჩამოწერებში პირველი ადგილი დაიკავა.

ჩვენთვის განსაკუთრებით მნიშვნელოვანია არა მხოლოდ რეგისტრაციებისა და ჩამოტვირთვების რაოდენობა, არამედ ისიც, რომ ადამიანები პლატფორმას რეალურად იყენებენ. ბოლო კვირების განმავლობაში, „ფერმიოს“ მეშვეობით, დღეში 100-დან 600-მდე ზარი და WhatsApp-კონტაქტი ხორციელდება ფერმერებთან.

ამ ეტაპზე ყველაზე აქტიური მიმართულებებია აგრობაზარი, აგროტურიზმი და შეკვეთები. მომხმარებლები ეძებენ ადგილობრივ პროდუქტებს, ფერმერები კი ცდილობენ, იპოვონ ახალი მყიდველები. განსაკუთრებით მნიშვნელოვანია შეკვეთების მიმართულება, რადგან ის საშუალებას აძლევს კომპანიებსა და ფიზიკურ პირებს, წინასწარ გამოაქვეყნონ მოთხოვნა კონკრეტულ პროდუქტსა და რაოდენობაზე, დაინტერესებულმა ფერმერებმა კი პირდაპირ შესთავაზონ საკუთარი პროდუქცია.

აგროტურიზმის მიმართულებაც განვითარების მნიშვნელოვანი შესაძლებლობაა. საქართველოს რეგიონებში ბევრი საინტერესო საოჯახო სასტუმრო, კოტეჯი და უნიკალური ადგილია, რომელთა შესახებაც ფართო აუდიტორიამ ჯერ კიდევ არ იცის. გვინდა, „ფერმიომ“ ამ ადგილების აღმოჩენა გაამარტივოს და ტურისტებისგან მიღებული სარგებელი ადგილობრივ ოჯახებამდე მივიდეს.

ჩვენი აზრით, ამ ეტაპზე ყველაზე მნიშვნელოვანი ის არის, რომ ინტერესი მხოლოდ ერთ მიმართულებაზე არ კონცენტრირდება. თანდათან იკვეთება საჭიროება ისეთი სივრცის არსებობისა, სადაც ადამიანები შეძლებენ არა მხოლოდ პროდუქციის შეძენას, არამედ სოფელში არსებული შესაძლებლობების აღმოჩენას, სამუშაოს პოვნას, მომსახურების მიღებასა და ადგილობრივ ეკონომიკურ საქმიანობაში ჩართვას.

რა გეგმები გაქვთ განვითარების, ახალი მიმართულებებისა და პლატფორმის შესაძლებლობების გაფართოების მიმართულებით?

ჩვენი სამომავლო გეგმები რამდენიმე მნიშვნელოვან მიმართულებას მოიცავს. ერთ-ერთი მათგანია ფასის ინდიკატორია, რომელიც მომხმარებლებსა და ფერმერებს საქართველოს მასშტაბით კონკრეტულ პროდუქტებზე საშუალო საბაზრო ფასის გაგებაში დაეხმარება. ასევე ვგეგმავთ მოსავლის რაოდენობის შესახებ სტატისტიკის განვითარებას, რაც დროთა განმავლობაში ქართული აგროსექტორის უფრო სრულ სურათს დაგვანახებს.

ამ ეტაპზე ჩვენი მთავარი მიზანი ქართულ ბაზარზე დამკვიდრება და პლატფორმის განვითარებაა. გვინდა, რომ საქართველოში სიტყვა „აგრო“ პირდაპირ „ფერმიოსთან“ ასოცირდებოდეს და პლატფორმა სოფლის მეურნეობასთან დაკავშირებულ შესაძლებლობებს ერთ სივრცეში აერთიანებდეს.

შემდეგი ეტაპი საერთაშორისო ბაზარზე გასვლაა. პირველ რიგში, განვიხილავთ სომხეთის ბაზარს. ამასთან, უკვე გვაქვს ინტერესი უცხოეთში მცხოვრები ქართველებისგან, რომლებიც გვთავაზობენ, თავიანთ ქვეყნებში „ფერმიოს“ წარმომადგენლები გახდნენ.

საბოლოოდ, ჩვენი მიზანია, შევქმნათ ერთიანი ციფრული სივრცე, რომელიც გაამარტივებს სოფლის მეურნეობასთან დაკავშირებულ ურთიერთობებს, გააჩენს ახალ ეკონომიკურ შესაძლებლობებს და ხელს შეუწყობს საქართველოს რეგიონების განვითარებას.