2026 წელს სამშენებლო, სარემონტო და საყოფაცხოვრებო  პროდუქტების მაღაზიათა ქსელი Grossmann • გროსმანნ თბილისში ფილიალების რაოდენობის გაორმაგებას გეგმავს. როგორც Business Insider Georgia-სთან საუბარში Grossmann-ის დამფუძნებელმა ვახტანგ კაჭარავამ განაცხადა, 2026 წლის გეგმა-მინიმუმი თბილისში კიდევ სამი ახალი ფილიალის დამატებაა, საიდანაც ერთის გახსნა უკვე უახლოეს პერიოდში მოხდება.

„2026 წელს პირველ ფილიალს უახლოეს ერთ თვეში, თბილისთან ახლოს - შინდისში გავხსნით. წელს მინიმუმ სამი ფილიალის გახსნას ვვარაუდობთ. თუ ეკონომიკამ და პროცესებმა ხელი შეგვიწყო, ჩემი სურვილია, რომ დამატებით კიდევ ორი გავხსნათ, ანუ ჯამში ხუთი. თუმცა მინიმალური გეგმა სამი ფილიალის დამატებაა - ერთი შინდისი იქნება, ხოლო თბილისის სხვადასხვა უბანში კიდევ მინიმუმ ორი ფილიალი დაემატება“, - აღნიშნა Grossmann-ის დამფუძნებელმა.

2025 წელს Grossmann-მა სამი ფილიალით დახურა, რაც ახალი კომპანიისთვის საკმაოდ კარგი შედეგია.

„ალბათ, როგორც ყველა სტარტაპს, მოლოდინები ოპტიმისტურია, თუმცა რეალობა ცოტათი განსხვავებული გამოვიდა. შიდა ფაქტორებიდან გამომდინარე - ახალი გუნდია, ხოლო მიმართულებაც ჩემთვის ახალი იყო. ასევე მაკროეკონომიკური ფაქტორები ქვეყანაში დიდად ხელს არ გვიწყობდა, რაც სტარტაპებისთვის დამატებითი დაბრკოლება იყო. ამას ემატებოდა ზოგიერთი რეგულაცია, რომელმაც წვდომა შეუზღუდა ჩვენს კლიენტებს - მცირე და საშუალო სამშენებლო კომპანიებს. ასევე, ადრე ეს სექტორი საშემოსავლო გადასახადისგან თავისუფალი იყო, ახლა კი ფიზიკური პირებიც იბეგრებიან. მოკლედ, ეს ყველაფერი გარკვეულ დაბრკოლებებს ქმნიდა სტარტაპისთვის.

თუმცა, ჯამში, ჩვენ იმ გეგმებს მივუახლოვდით, რაც გვქონდა, და ვფიქრობ, 2026 წელი ბევრად უკეთესი იქნება. მინდოდა ცოტა მეტი ფილიალი გაგვეხსნა პირველივე წელს, თუმცა სამი ფილიალით დავასრულეთ 2025 წელი და ეს, რა თქმა უნდა, ნორმალური შედეგია“, - აღნიშნა ვახტანგ კაჭარავამ.

როგორც კომპანიის დამფუძნებელი აცხადებს, Grossmann გაფართოებას საკუთარი ინვესტიციით ახორციელებს, თუმცა, როდესაც კომპანია სათანადო ზომას მიაღწევს, შეეძლება ფინანსური სექტორიდან დაფინანსების მოთხოვნა.

„ჯერ ჩვენი ფინანსებით ვაფინანსებთ განვითარების პროექტებს. თუმცა, ვფიქრობ, მალე მოვა დრო, როდესაც ლოკალურ თუ საერთაშორისო ფინანსებზე განაცხადებს გავაკეთებთ. ჯერჯერობით შედარებით პატარა მასშტაბის ვართ, შესაბამისად, ბანკების და საერთაშორისო საინვესტიციო კომპანიების დაფინანსებაზე წვდომა რთულია. საჭიროა კომპანიის გადიდება, აქტივების გაზრდა, რის შემდეგაც უფრო მარტივი გახდება დაფინანსების მიღება“, - განმარტავს დამფუძნებელი.

Grossmann-ის მაღაზიაში პროდუქცია საკმაოდ შერეული და დივერსიფიცირებულია.

„ჩვენი მაღაზია შერეული ფორმატით მუშაობს - არ ვართ კონკრეტულ მიმართულებაზე დამოკიდებული. ექვსი მთავარი მიმართულება გვაქვს: სამშენებლო პროდუქტები, სანტექნიკის მასალები, ელექტროობა, ინსტრუმენტები და დანადგარები - ყველაფერი პროპორციულად გადანაწილებულია. ბიზნესის კუთხით ეს ძალიან კარგი სტრატეგიაა: რისკები დივერსიფიცირებულია და პროდუქციის დამოკიდებულება კონკრეტულ მომწოდებელზე მინიმალურია. ვფიქრობ, ეს ჰარმონიულადაა გადანაწილებული და ძალიან კარგია“, - აღნიშნავს ვახტანგ კაჭარავა.