Green Steps • გრინ სთეფს გარემოსდაცვითი საკონსულტაციო კომპანიია, რომლის საქმიანობის არეალი მოიცავს საკონსულტაციო მომსახურების გაწევას გარემოსდაცვითი მიმართულებით, საქმიანობების მონიტორინგს და ნებართვების მიღებას. კომპანიის აღმასრულებელი დირექტორი ქრისტინა კოროშინაძე Business Insider Georgia-სთან ისეთ აქტუალურ თემაზე საუბრობს, როგორიც არის 2025 წლის 26 ივნისს გარემოსდაცვით შეფასების კოდექსში შეტანილი გარკვეული ცვლილებები.

როგორც იცით, 2025 წლის 26 ივნისს საქართველოს პარლამენტმა შეიტანა გარკვეული ცვლილებები გარემოსდაცვით შეფასების კოდექსში, რომ გვითხრათ რა ტიპის ცვლილებებზეა საუბარი და კონკრეტულად რომელიმე სექტორზე აისახება თუ არა?

პირველ რიგში დავიწყებ იმით რომ, მნიშვნელოვანია ბიზნესმა იცოდეს, 26 ივნისს გარემოსდაცვით შეფასების კოდექსში შეტანილი რიგი ცვლილებები უკვე ამოქმედდა, ხოლო დანარჩენი ამოქმედდება 2025 წლის პირველი აგვისტოდან.

ამ ეტაპზე რა ცვლილებებიც შევიდა კოდექსში, არ ეხება კონკრეტულად რომელიმე სექტორს, ცვლილებები თანაბრად გავრცელდება კოდექსით გათვალისწინებული საქმიანობების ყველა ტიპზე და შესაბამისად ყველა სექტორზე.

ამის მიზეზი გახლავთ ის, რომ ცვლილებები ძირითადად დაკავშირებულია ადმინისტრაციულ საქმისწარმოებასთან. კერძოდ, საუბარია ადმინისტრაციული საქმისსწარმოების შეწყვეტის ვადებზე, ასევე საუბარია, იმაზე რომ როცა სააგენტო მიმართავს სხვა უწყებებს მოსაზრებებზე, მათ ექნებათ კონკრეტული ვადა და ამ ვადაში პასუხის არ გაცემის შემთხვევაში, დადებით გადაწყვეტილებად ჩაითვლება და სააგენტო აღარ დაელოდება მათ პასუხს განუსაზღვრელი დროით, რაც ერთის მხრივ დააჩქარებს გადაწყვეტილების მიღების პროცედურას. თუმცა მეორეს მხრივ, ამან შესაძლოა რიგი კითხვები გააჩინოს. შესაბამისად, ამ ჩანაწერით ძალიან საპასუხისმგებლო როლი ეკისრებათ ამიერიდან უწყებებს, რომ დროულად, შესაბამის ვადებში მიიღონ გადაწყვეტილებები.

კოდექსის პირველ და მეორე დანართში (საქმიანობების ჩამონათვალში) წინა ცვლილების დროს ბევრი სიახლე იყო, ამ ეტაპზე შეიცვალა თუ არა რამე?

კოდექსში დაგეგმილი ცვლილებების პირველ მოსმენაზე ჩვენ ვიხილეთ ცვლილებების უფრო მსუყე პაკეტი, მათ შორის უფრო მეტი ცვლილება იყო დაგეგმილი კონკრეტულად პირველ და მეორე დანართში არსებული საქმიანობებისთვის, თუმცა ამ მონაცემებით რა საკითხებიც ამოქმედდა, ეხება მაგალითად: 

საავტომობილო გზაზე გვირაბის ან/და ხიდის მშენებლობას, სადაც დაკონკრეტდა რომ გზშ-ის პროცედურა აღარ დასჭირდება ისეთი ხიდის მშენებლობას, რომელიც შენდება არსებული ხიდის ჩასანაცვლებლად იმავე ხიდის ადგილას ან/და არსებული ხიდის მომიჯნავედ.
ასევე, მეორე დანართიდან ამოიღეს პუნქტი - რომლის დროსაც სკრინინგს ექვემდებარებოდა წყალდიდობისა და დატბორვის საწინააღმდეგო სამუშაოები; - რაც სავსებით მიზანშეწონილად მიმაჩნია, რადგან მსგავსი ტიპის პრევენციული სამუშაოების ჩატარება ხშირად იმდენად სასწრაფო საკითხია რომ სკრინინგის გადაწყვეტილებას ვერ დაელოდები.

საინტერესოა ასევე ის საკითხები, რომელიც წინა ცვლილების დროს განიხილეს და ამ მოცემულობით აღარ განიხილება, ასეთია მაგალითად: ქარის სადგური, რომელიც წინა რედაქციის მიხედვით როგორც გახსოვთ პირველ დანართში გადადიოდა სიმძლავრის დაკონკრეტებით, კერძოდ 35 მგვტ-ზე მეტი სიმძლავრის ჰესი დაექვემდებარებოდა გზშ-ის და გაურკვეველი იყო უფრო ნაკლები სიმძლავრის მქონე სადგურების ბედი, ამ შემთხვევაში ვხედავთ, რომ ეს საკითხი დარჩა ძველი რედაქციის მიხედვით და ქარის სადგურებს ვხედავთ ისევ მეორე დანართში სიმძლავრის დაკონკრეტების გარეშე, რაც ვფიქრობ ძალიან სწორია.

საბოლოო ჯამში როგორ აისახება ბიზნესზე არსებული და დაგეგმილი ცვლილებები?

ამ კითხვაზე პასუხს დავიწყებ იმით, რომ აშკარად ჩანს, სააგენტო ცდილობს გადადგას ნაბიჯები ბიზნესის გარემოს გაუმჯობესებისკენ, ცხადია ბევრი რამ პრაქტიკაში უკეთ გამოჩნდება, თუმცა ამ ეტაპზე საქმისწარმოებათან დაკავშირებული ცვლილებები, ვფიქრობ სწორედ პროცედურების შედარებით გამარტივებას ემსახურება.
თუნდაც საქმისწარმოების შეწყვეტის ვადების დაკონკრეტება ნიშნავს იმას, რომ ბიზნესს დროულად ეძლევა შესაძლებლობა დოკუმენტის ხარისხი გააუმჯობესოს, და რაც ყველაზე მთავარია - ბიზნესს ეცოდინება კონკრეტული ვადა როდის მიიღებს პასუხს, ეს საკითხი ძალიან მშივნელოვანია ბიზნესისთვის, რადგან მან უნდა განსაზღვროს მისი სამუშაო გრაფიკი და ფინანსები.

აქვე, ძალიან საინტერესოა გზშ-ის ვადის გაზრდის საკითხიც, სავარაუდოდ გარკვეულ გამოცდილებას ეყრდნობა სააგენტო, თუმცა იმედია ამ ვადის გაზრდის დაბალანსება მოხდება სხვა პროცესების შემცირების ხარჯზე და ერთიანობაში ბიზნესს არ გაუჭიანურდება გარემოსდაცვითი გადაწყვეტილების გაცემის პროცესი.
ცხადია, ეს არის დაწერილი და ამას ყველაფერს სჭირდება აღსრულება და ძალიან საინტერესო იქნება 1 წლის თავზე შევაჯამოთ როგორი რეაქცია ექნება ბიზნესს მოცემულ ცვლილებებზე.

თქვენი აზრით როგორ აისახება ცვლილებები გარემოსდაცვით საკონსულტაციო კომპანიებზე? დამატებითი უნარები ან დამატებითი შესწავლა ხომ არ იქნება საჭირო აღსრულების ნაწილში?

ჩვენზე ეს ფაქტობრივად არ აისახება. პირიქით, ვფიქრობ მეტად წელგამართული ვიქნებით ბიზნესთან და უფრო კარგად შევძლებთ პროცესის დაგეგმარებას საწყის ეტაპზევე, ასე რომ, რომ შევაჯამოთ კოდექსში შეტანილი ცვლილებები, ჩვენი მხრიდან მიწოდებული სერვისის ხარისხზე არანაირად არ აისახება.