ძალიან მნიშვნელოვანი ინვესტიციაა სოფლის მეურნეობაში, - ამის შესახებ განცხადება გარემოს დაცვისა და სოფლის მეურნეობის მინისტრმა დავით სონღულაშვილმა კახეთში, კომპანიის „ივრის ფერმები” ნუშის ბაღები დათვალიერების შემდეგ გააკეთა. კომპანია სახელმწიფო პროექტების ბენეფიციარია - სარგებლობს შეღავათიანი აგროკრედიტით და „დანერგე მომავლის“ საგრანტო პროგრამით.

„მოგეხსენებათ 350 ჰა ნუშის ბაღი გაშენდა. ჯამში კაკლოვანი კულტურა არის ერთ-ერთი პრიორიტეტული მიმართულება, სადაც აქტიურად არის სახელმწიფო წარმოდგენილი მხარდამჭერი პროგრამით. კაკლოვანი კულტურები არის პრიორიტეტული მიმართულება. შესაბამისად ჩვენი სამინისტროს ფარგლებში, სახელმწიფო აქტიურად უჭერს მხარს ამ დარგის განვითარებას, როგორც ერთ-ერთ მნიშვნელოვან საექსპორტო პროდუქციის განვითარებას“, - განაცხადა მინისტრმა.

კომპანია „ივრის ფერმები”, რომელიც 2022 წელს დაარსდა, ორიენტირებულია კაკლოვანი კულტურების წარმოების თანამედროვე მოდელის განვითარებაზე. დღეისათვის კომპანიის ნუშის ბაღები 350 ჰექტარს მოიცავს.

კომპანია „ივრის ფერმები” აქტიურად თანამშრომლობს ესპანელ ექსპერტებთან და იყენებს მათ მიერ შემუშავებულ ფიტოსანიტარიულ და განოყიერების გეგმებს, რომლებიც მორგებულია ბაღის საჭიროებებზე და თანხვედრაშია ევროპულ რეგულაციებთან. ბაღები უზრუნველყოფილია თანამედროვე საირიგაციო სისტემით, რომელიც მდინარე ივრიდან მარაგდება. წვეთოვანი საირიგაციო სისტემის ეფექტიანი გამოყენებისა და „ივრის ფერმების“ სასაწყობე სივრცის ელექტრიფიკაციისთვის კომპანიამ 1.75 მეგავატიანი ელექტროქსელიც შექმნა.

„სამ წელიწადში შევძლებთ ექსპორტზე გავიტანოთ 160 ტონამდე ნუში, ხოლო როცა ბაღები სრულ მსხმოიარობას მიაღწევს, ჩვენი საექსპორტო მოსავლის რაოდენობა უკვე 800-900 ტონამდე გაიზრდება. ჩვენი საქმიანობით ვქმნით სამუშაო ადგილებს, მნიშვნელოვანი წვლილი შეგვაქვს როგორც რეგიონის, ასევე ქვეყნის აგრონომიულ და ეკონომიკურ განვითარებაში“, - განაცხადა კომპანიის დირექტორმა ნინო ცხადაიამ.