ქართული სატვირთო ავიაკომპანია Geosky Airlines სატრანსპორტო ქსელის გაფართოებას განაგრძობს. ავიაკომპანია, რომელიც ჩინეთსა და ევროპას შორის, თბილისის საერთაშორისო აეროპორტში შუალედური დაჯდომით ახორციელებს ტვირთების გადაზიდვას, ახალ ჩინურ მიმართულებას ამატებს. 

ავიაკომპანიის მიერ გავრცელებული ინფორმაციის მიხედვით, თბილისი-ჩუნცინის მიმართულებით პირველი საინაუგურაციო რეისი 13 სექტემბერს წარმატებით შესრულდა.

„აღნიშნული რეისი წარმოადგენს კიდევ ერთ მნიშვნელოვან ნაბიჯს კომპანიის საერთაშორისო ბაზარზე ოპერირების გაფართოების პროცესში“, — აცხადებენ Geosky Airlines-ში.
დღეისათვის Geosky Airlines ჩინეთსა და ევროპას შორის კვირაში რამდენიმე სიხშირით ოპერირებს. ავიაკომპანია ჩინეთის სამი ქალაქიდან ევროპაში სამი მიმართულებით ასრულებს სატვირთო რეისებს.

Geosky Airlines სატვირთო ავიაპარკის გაფართოებაზეც ინტენსიურად მუშაობს. აგვისტოში ავიაკომპანიის საჰაერო ფლოტს Boeing 767-300 ტიპის ახალი სატვირთო თვითმფრინავი შეემატა. როგორც ავიაკომპანიის მიერ სოციალურ ქსელში გავრცელებული ინფორმაციიდან ირკვევა, ეს მნიშვნელოვანი ეტაპია Geosky Airlines-ის ოპერაციული შესაძლებლობების გაძლიერებისა და გლობალურად სანდო, ეფექტიანი და მაღალი ხარისხის საჰაერო ტვირთმომსახურების უზრუნველყოფის გზაზე.

სამოქალაქო ავიაციის სააგენტოს (GCAA) ვებგვერდზე გამოქვეყნებული მონაცემების თანახმად, საქართველოს სამოქალაქო საჰაერო ხომალდების რეესტრში შპს ავიაკომპანია ჯეო სქაი-ს (Airline Geo Sky) ბალანსზე რეგისტრირებულია 5 საჰაერო ხომალდი — საუბარია თვითმფრინავებზე, რომელთა ექსპლუატანტიც სწორედ ეს ავიაკომპანიაა.