გურიაში გამართული „გემო ფესტის“ ერთ-ერთი მონაწილე იყო ოზურგეთის მუნიციპალიტეტში მდებარე საოჯახო სასტუმრო კომლი • komli, რომლის დამფუძნებლის, ლიკა მეგრელაძის თქმით, მისი მონაწილეობის მთავარ მიზანს გურიის პოპულარიზაცია წამოადგენდა.

„გემო ფესტში“ მონაწილეობა იმიტომ გადავწყვიტე, რომ ძალიან მინდოდა გურიის პოპულარიზაცია. წლებია ამ საქმეში ვარ და სულ მშურდა იმერეთისა და რაჭის, სადაც რეგიონული ფესტივალები ტარდება. ძალიან მინდოდა, მსგავსი რამ გურიაშიც გამართულიყო. გურული გასტრონომია და კერძები სათანადოდ არ არის წარმოდგენილი და სწორედ ამიტომ იყო მნიშვნელოვანი, რომ გურული კერძების თანამედროვე ვარიაციები შემოგვეთავაზებინა“, - აღნიშნა ლიკა მეგრელაძემ.

ფესტივალზე „კომლმა“ სტუმრებს წარუდგინა ღორის რულეტი, შეგემებული ხახვის მარინადით და ატმის სალათით, ასევე ჩაის სოუსით - კერძი, რომელიც ტაკოს ფორმით იყო წარმოდგენილი, როგორც სტრიტფუდის ფორმატი. როგორც ლიკა მეგრელაძე ამბობს, კერძი იმდენად მოწონება დაიმსახურა, რომ მენიუში მისი დამატება უკვე გადაწყვეტილია.

„ასევე შემოგვიერთდნენ ჩვენი მეგობრები და ზღვის პროდუქტები უგემრიელესი სოუსებით წარადგინეს. ჩვენც ვგეგმავთ, რომ სეზონურად ჩვენი კვების ობიექტში „მიდიების კვირეული“ ჩავატაროთ,“ – აცხადებს მეგრელაძე.
მისივე თქმით, გურიის პოპულარიზაცია აუცილებელია, რადგან საზოგადოებას ჯერ კიდევ ბევრი კითხვა აქვს ამ რეგიონის შესახებ.

„გურიას ნაკლებად იცნობენ საქართველოშიც კი, ხშირად ამბობენ, თუ რა არის განსაკუთრებული გურიაში, რა არის გურული კერძები და ამ კითხვებს, რომ პასუხი გაეცეს უფრო მეტად უნდა ვიაქტიუროთ“, - აცხადებს „კომლის“ დამფუძნებელი. 

„კომლი“ ტრადიციული სასტუმრო არ არის - იგი გლემფინგის ტიპის მომსახურებას სთავაზობს ვიზიტორებს. ტურისტებს ეძლევათ შესაძლებლობა, ღამე გაათენონ ღვინის კასრებში განთავსებულ კომფორტულ სივრცეებში.

„სამი კასრი გვაქვს, შესაბამისად, ბევრ სტუმარს ერთდროულად ვერ ვიღებთ, მაგრამ ეს არის უნიკალური გამოცდილება, რომელიც საქართველოში ჩამოსულმა სტუმარმა აუცილებლად უნდა გამოსცადოს. ჩვენი უცხოელი სტუმრების დიდი ნაწილი ევროპიდან და აშშ-დან მოდის. ადგილობრივი სეგმენტი 5%-ს შეადგენს, თუმცა წლიდან წლამდე იზრდება“, - განმარტავს ობიექტის მფლობელი.

გარდა განთავსებისა, „კომლი“ სტუმრებს სთავაზობს უნიკალურ გამოცდილებას - ჩაის ტურს.

„ჩაის ტურიზმის პოპულარიზაციას ვცდილობთ 2018 წლიდან. მთელ მსოფლიოში ჩაის ტურიზმი გეომეტრიული პროგრესით ვითარდება - ფაქტობრივად აფეთქებაა. ჩვენთან ჩაის ისტორიის გაცნობის, კრეფის, დამუშავებისა და დაგემოვნების შესაძლებლობა აქვს სტუმარს. ინტერესი ყოველწლიურად კი არა - ყოველთვიურად იზრდება“, - ამბობს ლიკა მეგრელაძე.

როგორც აღმოჩნდა, ტურისტებისთვის განსაკუთრებით მიმზიდველია ადგილობრივი, პირადი ისტორიები.

„რითი უნდა გააკვირვო მილანიდან ან ვენეციიდან ჩამოსული ადამიანი? 2019 წლიდან დავიწყეთ ჩვენი ოჯახის ისტორიის გაზიარება — ფოტოების, წერილებისა და ნაამბობი ამბების საშუალებით. აღმოჩნდა, რომ ეს მათთვის ძალიან საინტერესოა. ამ პროცესში მივხვდით, რომ ძალიან მაგრები ვართ — გურიის 200 წლიან ისტორიას ჩვენი ოჯახის მაგალითზე ვუყვებით სტუმრებს“, - ამბობს „კომლის“ მფლობელი. 

აღსანიშნავია, რომ 23-24 აგვისტოს შეკვეთილში, მუსიკოსთა პარკში, ტურიზმის ეროვნული ადმინისტრაციის ორგანიზებით გასტრონომიული ფესტივალი „გემო ფესტი“ გაიმართა.

ფესტივალში მონაწილეობის მსურველებს გამოცდილმა შეფმზარეულებმა ტრენინგი ჩაუტარეს და შედეგად 13 მონაწილე შეირჩა ოზურგეთის, ლანჩხუთისა და ჩოხატაურის მუნიციპალიტეტებიდან.

მონაწილეებს შესაძლებლობა ჰქონდათ, წარმოედგინათ როგორც ტრადიციული, ასევე იშვიათი და ნაკლებად ცნობილი გურული კერძები, რომლებიც ფესტივალის სტუმრებმა დააგემოვნეს.