„გემო ფესტმა“ საკმაოდ წარმატებულად ჩაიარა და გაყიდვებითაც ძალიან კმაყოფილები ვართ, - აცხადებს ბრენდი „გურული ბიჭები“, რომელიც სპეციალურად ფესტივალისთვის შეიქმნა.

როგორც „გურული ბიჭების“ წარმომადგენელი, რამაზ შენგელია ამბობს, ამ წამოწყების შემდეგ გადაწყდა, რომ ბრენდმა არსებობა გააგრძელოს და საბოლოოდ ოზურგეთში აზიური კერძების ობიექტი გაიხსნას.

„გემო ფესტში“ მონაწილეობისთვის სპეციალურად შევქმენით ბრენდი „გურული ბიჭები“ და ვაპირებთ, რომ ეს საქმიანობა გავაგრძელოთ. ფესტივალზე მომხმარებლებს შევთავაზეთ ქათმის და სულგუნის ბურთულები გურული ხემსით - ჯონჯოლით და ტრადიციული გურული სუნელით, კენკრის სოუსთან ერთად. კერძი ჩვენი გამოცდილების საფუძველზე შევქმენით.

„გემო ფესტი“ წარმატებული გამოდგა და გაყიდვებითაც კმაყოფილები ვართ. ამდენ მოთხოვნას არც კი ველოდით. კმაყოფილები ვართ და ვაპირებთ, რომ სამომავლოდაც გავაგრძელოთ სხვადასხვა ფესტივალში მონაწილეობა. ასევე, ვგეგმავთ კვების ობიექტის გახსნას. რეალურად, გურიაში არ არის ხარისხიანი სუში და გვინდა, რომ აზიური მხარე დავამატოთ ოზურგეთს. წინასწარ არ ვიცით, მაგრამ გვინდა, რომ დავარქვათ „გურული ბიჭების სუში“ ან მსგავსი რამ - იდეა მოგვწონს.

მომავალში ყველას ვურჩევდი, რომ „გემო ფესტში“ მიიღონ მონაწილეობა და ტრადიციული და თანამედროვე ვარიაციების შერწყმით წარადგინონ კერძები. ჩემი აზრით, ეს მოსწონს ხალხსაც და ამით ძველი კერძების თანამედროვე ვარიაციებით გაცოცხლება მოხდება“, - აცხადებს რამაზ შენგელია.

აღსანიშნავია, რომ 23-24 აგვისტოს შეკვეთილში, მუსიკოსთა პარკში, ტურიზმის ეროვნული ადმინისტრაციის ორგანიზებით გასტრონომიული ფესტივალი „გემო ფესტი“ გაიმართა.

ფესტივალში მონაწილეობის მსურველებს გამოცდილმა შეფ-მზარეულებმა ტრენინგი ჩაუტარეს და შედეგად 13 მონაწილე შეირჩა ოზურგეთის, ლანჩხუთისა და ჩოხატაურის მუნიციპალიტეტებიდან.

მონაწილეებს შესაძლებლობა ჰქონდათ, წარმოედგინათ როგორც ტრადიციული, ასევე იშვიათი და ნაკლებად ცნობილი გურული კერძები, რომლებიც ფესტივალის სტუმრებმა დააგემოვნეს.