„გემო ფესტი“ მცირე მეწარმეებისთვის განვითარების ძლიერი პლატფორმაა, - აცხადებს სამზეურა/Samzeura  დამფუძნებელი მარინა ჩიხლაძე.

გურიაში ჩატარებულმა „გემო ფესტმა“ კიდევ ერთხელ დაადასტურა, რომ რეგიონში ტურიზმისა და კულინარიის განვითარებისთვის ადგილობრივი ინიციატივების მხარდაჭერა გადამწყვეტია. ფესტივალში მონაწილე ტურისტული ობიექტის, „სამზეურას“ დამფუძნებელი ამბობს, რომ მსგავსი ღონისძიებები მცირე მეწარმეების განვითარებისთვის არაჩვეულებრივი შესაძლებლობაა.

„გემო ფესტი“ ჩემნაირი მცირე მეწარმისთვის არაჩვეულებრივი საშუალებაა. საოცარი შესაძლებლობაა განვითარებისთვის. ჩვენ იმდენს ვშრომობთ, რომ ამ შრომის შესაბამის ანაზღაურებას იშვიათად ვიღებთ. შაბათ-კვირის ხარჯზე სამმაგი და ოთხმაგი შემოსავალი მივიღე – დიდებული შედეგი იყო,“ – აცხადებს ჩიხლაძე.

მისი თქმით, მსგავსი ინიციატივები ხელს უწყობს როგორც ადგილობრივი გასტრონომიის, ისე მცირე ტურისტული ობიექტების ცნობადობის ზრდას.

„სასურველია, რომ მსგავსი ფესტივალები უფრო ხშირად გაიმართოს. რაც უფრო მეტ ადამიანს ექნება წვდომა ამ პლატფორმასთან, მით მეტი განვითარდება რეგიონში მცირე ბიზნესი,“ – აღნიშნავს ის.
„სამზეურა“ ოზურგეთის მუნიციპალიტეტში, სოფელ ჭანიეთში მდებარეობს და ტრადიციულ გურულ სტუმარ-მასპინძლობას სთავაზობს დამთვალიერებლებს. ობიექტზე ფუნქციონირებს მინი-მუზეუმი, სადაც ვიზიტორებს მასტერ-კლასები უტარდებათ, ხოლო დღის ბოლოს გურული კერძებით უმასპინძლდებიან.

„ჯერჯერობით ღამისთევის სერვისი არ გვაქვს, თუმცა ვგეგმავთ ამ მიმართულების დამატებას. მიუხედავად იმისა, რომ ბაზარზე სულ სამი წელია ვართ, ჩვენი ვიზიტორების რაოდენობა ხშირად აღემატება იმ ობიექტებს, რომლებიც 10-15 წელია ფუნქციონირებენ. ამაში ხელს გვიწყობს როგორც მდებარეობა (ბათუმი-ქობულეთის გზატკეცილთან სიახლოვე), ისე პირადი კონტაქტები და ხარისხზე ორიენტირებული მიდგომა,“ – ამბობს „სამზეურას“ დამფუძნებელი.

მისი მონაცემებით, 2025 წელი ტურისტული თვალსაზრისით რეკორდული აღმოჩნდა.

„მიმდინარე წლის 7 თვეში ტურისტების მოთხოვნა თითქმის სამჯერ გაიზარდა წინა წლებთან შედარებით. სტუმრები აქტიურად გვყავს ბალტიისპირეთიდან, პოლონეთიდან, გერმანიიდან, ისრაელიდან. თოვლიან თვეებშიც კი სტუმრებს ვმასპინძლობდით“, - აცხადებს ტურისტული ობიექტის დამფუძნებელი. 
ჩიხლაძის თქმით, „გემო ფესტი“ მნიშვნელოვანი ბიძგია მიკრობიზნესებისთვის, განსაკუთრებით იმ ადამიანებისთვის, ვინც საქმეს გულით აკეთებს.

„მაქსიმუმის ჩადებაა საჭირო. საქმე გამოგივა, როცა გიყვარს ის, რასაც აკეთებ. უბრალოდ, ადამიანებს მეტი ხელშეწყობა სჭირდებათ – და სწორედ ამას აკეთებს ეს ფესტივალი,“ – აცხადებს ის.

აღსანიშნავია, რომ 23-24 აგვისტოს შეკვეთილში, მუსიკოსთა პარკში, ტურიზმის ეროვნული ადმინისტრაციის ორგანიზებით გასტრონომიული ფესტივალი „გემო ფესტი“ გაიმართა.

ფესტივალში მონაწილეობის მსურველებს გამოცდილმა შეფმზარეულებმა ტრენინგი ჩაუტარეს და შედეგად 13 მონაწილე შეირჩა ოზურგეთის, ლანჩხუთისა და ჩოხატაურის მუნიციპალიტეტებიდან.

მონაწილეებს შესაძლებლობა ჰქონდათ, წარმოედგინათ როგორც ტრადიციული, ასევე იშვიათი და ნაკლებად ცნობილი გურული კერძები, რომლებიც ფესტივალის სტუმრებმა დააგემოვნეს.