საოჯახო სასტუმრო Guest House Ardoti გაფართოვდა. ამის შესახებ Business Insider Georgia-ს სასტუმროს დამფუძნებელმა, ლევან არდოტელმა, განუცხადა.

„ახალ სეზონს სიახლეებით ვხვდებით. დავასრულეთ ორი კოტეჯის მშენებლობა და დამატებითი დასასვენებელი ადგილები გვაქვს. ვგეგმავდით საცხენოსნო ტურების დამატებას და უკვე შეგვიძლია მომხმარებლებს ეს სერვისი შევთავაზოთ,“ – ამბობს ლევან არდოტელი.

წინა წელთან შედარებით, ჯავშნების რაოდენობა გაზრდილია, რაც იძლევა იმის თქმის საფუძველს, რომ ზაფხულის სეზონი დატვირთული იქნება.

„არსებული ჯავშნების მიხედვით შეგვიძლია ვივარაუდოთ, რომ ზაფხული საკმაოდ აქტიური იქნება. ტენდენცია შეიცვალა – თუ წინა წელს ჯავშნები ძირითადად „ბუქინგის“ მეშვეობით ხორციელდებოდა, ახლა ისინი უმეტესად კერძო გიდებისა და სხვადასხვა კომპანიის მეშვეობით ხორციელდება. მოთხოვნა საგრძნობლად გაზრდილია,“ – აღნიშნავს არდოტელი.

კომპანია სამომავლოდ სერვისების გამრავალფეროვნებას გეგმავს და არ გამორიცხავს აგროტურისტულ საქმიანობაში ჩართვას.

„სამომავლოდ ვგეგმავთ ველო და კვადრო ტურების დამატებას. ჯერჯერობით კონკრეტული თარიღი განსაზღვრული არ გვაქვს, თუმცა ამ მიმართულებით აქტიურად ვმუშაობთ. გარდა ამისა, ვეწევით მესაქონლეობას, გვყავს ფუტკარი და მოგვყავს ბოსტნეული. ვფიქრობთ, რომ უცხოელი დამსვენებლებისთვის ადგილობრივ საქმიანობაში ჩართვა საინტერესო იქნება. გვსურს ამ მიმართულების დახვეწა და განვითარება,“ – აცხადებს ლევან არდოტელი.

ცნობისთვის, სასტუმრო პირიქითა ხევსურეთში, სოფელ არდოტში, შატილიდან 20 კილომეტრში მდებარეობს და 2019 წლიდან ფუნქციონირებს.