Kdema • კდემა ქართული წარმოების აქსესუარების, ჩანთებისა და ტანსაცმლის ბრენდია, რომელიც 2022 წლიდან ოპერირებს ბაზარზე. მეტი ინფორმაციისთვის Business Insider Georgia კომპანიის კრეატიულ დირექტორს ანი ჯვარიძეს ესაუბრა. 

როგორია კომპანიის საქმიანობის სპეციფიკა, როდის დაიწყეთ საქმიანობა და რას სთავაზობთ მომხმარებლებს?

„კდემა“ 2022 წელს დაარსდა და უკვე სამი წელია, რაც მომხმარებლებს მაღალი ხარისხის ქართულ პროდუქციას სთავაზობს. ბრენდის სახელის შერჩევისას ჩვენთვის უმნიშვნელოვანესი იყო მისი თანხვედრა ქართულ იდენტობასთან, ხასიათსა და ესთეტიკასთან. სწორედ ამ ღირებულებებზე ფიქრის პროცესში დაიბადა „კდემა“  - სიტყვა, რომელიც ჩვენთვის დახვეწილობასთან, სიმშვიდესა და ელეგანტურობასთან ასოცირდება.

საქმიანობა საკმაოდ მცირე ბიუჯეტით, ყოველგვარი ინვესტიციის გარეშე დავიწყეთ და საკმაოდ საინტერესო და გამოწვევებით სავსე გზა გავიარეთ. ამ დროის განმავლობაში ჩვენი მთავარი მისია იყო, ნებისმიერი თაობის წარმომადგენლისთვის ხელმისაწვდომ ფასად შეგვეთავაზებინა მაღალი ხარისხის ქართული პროდუქცია, რომელიც მათ ყოველდღიურ სტილს კიდევ უფრო გამორჩეულს გახდიდა და მათ უნიკალურობასა და თავდაჯერებულობას წარმოაჩენდა. 

„კდემას“ თითოეული პროდუქტი ხელით იქმნება და მასზე არაერთი ადამიანი მუშაობს. დიზაინის შექმნიდან პროდუქტის სრულყოფამდე ჩართულია გუნდის თითოეული წევრი. სწორედ ამ ერთობლივ, შთაგონებულ შრომაში ვხედავთ შესაძლებლობას, რომ მომხმარებელს შევთავაზოთ უნიკალური, დახვეწილი და ინდივიდუალიზმზე ორიენტირებული პროდუქცია.

როგორია კომპანიის მიმდინარე ასორტიმენტი?

„კდემა“ აწარმოებს როგორც ჩანთებს, ასევე, კაბებსა და ფეხსაცმელებს. უნდა აღინიშნოს, რომ ამ ეტაპზე ჩვენი ბრენდი უფრო მეტად ჩანთებით არის ცნობილი. შესაბამისად, სხვა პროდუქტებთან შედარებით ჩანთების ასორტიმენტი უფრო ფართო გვაქვს და მომხმარებელს, ამჟამინდელი მოცემულობით, 30 სხვადასხვა დიზაინის ჩანთას ვთავაზობთ. აღსანიშნავია ისიც, რომ „კდემა“ ყველა ასაკზე მორგებულ პროდუქტებს ქმნის. ჩვენი კოლექცია აერთიანებს კლასიკურ და თანამედროვე ტენდენციებს, რაც მომხმარებელს შესაძლებლობას აძლევს, საკუთარი სტილი და გემოვნება ჩვენს პროდუქციაში აღმოაჩინოს. 

როგორ აფასებთ მოთხოვნას ზოგადი თვალსაზრისით?

ვფიქრობთ, რომ ადგილობრივი წარმოება საქართველოში სტაბილურად ვითარდება – იქმნება ახალი ქართული ბრენდები, რომლებიც მომხმარებლებს კრეატიულ და ხარისხიან პროდუქციას სთავაზობენ. შედეგად მომხმარებელთა მოლოდინები და ნდობა ადგილობრივი პროდუქციის მიმართ გამყარებულია და ამ ნდობის საფუძველზე, შესაბამისად, გაზრდილია მოთხოვნაც. ამ ცვლილებებს ჩვენც ვხედავთ საკუთარ საქმიანობაში და გვჯერა, რომ ეს ტენდენცია მომავალშიც გაგრძელდება. 

რას მიიჩნევთ კომპანიის კონკურენტულ უპირატესობად?

მომხმარებლებისგან მიღებული უკუკავშირის საფუძველზე თამამად შეგვიძლია ვთქვათ, რომ „კდემას“ აქვს ჩამოყალიბებული უნიკალური ვიზუალური ენა და სტილი, რაც მას სხვა ბრენდებისგან გამოარჩევს. გარდა ვიზუალური სტილისა, ჩვენი ერთ-ერთი ყველაზე ძლიერი მხარეა მჭიდრო, გულწრფელი ურთიერთობა მომხმარებელთან.

როგორია კომპანიის სამომავლო გეგმები?

თანამედროვე მოდის ბაზარზე ელექტრონული კომერციის როლი დღითიდღე იზრდება, რაც ონლაინ გაყიდვებს კიდევ უფრო მეტ მნიშვნელობას ანიჭებს. სწორედ ამიტომ განსაკუთრებული ფოკუსი გვაქვს ციფრული არხების განვითარებაზე – ვმუშაობთ საერთაშორისო ონლაინ პლატფორმებზე პროდუქციის განთავსებასა და გაყიდვების გაფართოებაზე. 

ამის პარალელურად ვმუშაობთ იმაზე, რომ „კდემას“ პროდუქციის ხილვა უფრო მეტ ფიზიკურ, კონცეპტუალურ მაღაზიაშიც იყოს შესაძლებელი და მათ, ვისთვისაც ტრადიციული შოპინგი ერთგვარი შთაგონებაა, ჩვენი პროდუქციის შეძენა ამ ფორმითაც შეეძლოთ.  

აღსანიშნავია, რომ „კდემა“ იყენებს ეკომეგობრულ მასალებს. პროდუქციის მიწოდება ხორციელდება როგორც საქართველოში, ასევე საერთაშორისო მასშტაბით. თბილისში შეკვეთები, როგორც წესი, მეორე დღესვე მიეწოდება მომხმარებელს, ხოლო რეგიონებში 3 სამუშაო დღის განმავლობაში.