გადაზიდვებში წინა წელთან შედარებით ზრდა გაქვს - Kairos Logistics
2025 წლის პირველ კვარტალში გადაზიდვების მოცულობა გაზრდილია. აღნიშნულის შესახებ Business Insider Georgia-სთან საერთაშორისო გადამზიდავი კომპანია Kairos Logistics-ის გენერალურმა დირექტორმა მიხეილ ნამადოვმა განაცხადა. მისი თქმით, ჩინეთიდან სახმელეთო გადაზიდვების გახსნის შემდეგ მოთხოვნა მნიშვნელოვნადაა მომატებული.
„ზოგადად გადაზიდვებში მიმდინარე პერიოდისთვის წინა წელთან შედარებით ზრდა გაქვს. ამ ეტაპზე ახალი მიმართულებები რაც გაქვს, ეს არის ჩინეთიდან გახსნილი სახმელეთო გადაზიდვები, რომელიც საკმაოდ გააქტიურებულია. ასევე საკმაოდ აქტიურია ევროპა, შუა აზიის მიმართულებები.
ჩინეთიდან სახმელეთო გადაზიდვების შემთხვევაში მოთხოვნა არის, როგორც იმპორტზე, ასევე ტრანზიტზე. Kairos Logistics-ის მაგალითზე, ჩინეთიდან იმპორტი სახმელეთო გადაზიდვებით თითქმის გაორმაგებულია“, - აღნიშნა ნამადოვმა.
როგორც ცნობილია ჩინეთიდან სახმელეთო გადაზიდვების გახსნა 2024 წლის ბოლოს მოხდა, რამაც ქართველ მძღოლებს ჩინეთის ტერიტორიაზე შესვლა და იქიდან ტვირთების წამოღების შესაძლებლობა მისცა.
Kairos Logistics-ის გენერალური დირექტორი ამბობს, რომ იმპორტის კუთხით ისინი აქტიურად თანამშრომლობენ ტექნიკის, ავეჯის, საკვების, დანადგარების და ასე შემდეგ, სხვადასხვა სახის პროდუქციის შემომტან კომპანიებთან.
მისივე თქმით, ექსპორტის შემთხვევაში ჩინეთში საქართველოდან ძირითადად ღვინის და დაფნის ტრანსპორტირება ხდება და ნამადოვის თქმით, ბოლო პერიოდში ჩინეთში დაფნაზე მოთხოვნა მნიშვნელოვნადაა გაზრდილი.
გარდა ჩინეთისა Kairos Logistics-ის გადაზიდვების პორტფოლიოში მნიშვნელოვანი წილი უჭირავს დსთ, ევროპასა და თურქეთში გადაზიდვებს.
„აღნიშნულ მიმართულებებზე საქართველოდან ტრადიციულად არის მოთხოვნა ღვინისა და მინერალური წყლების გადაზიდვაზე. ამ მიმართულებით ლიდერები ვართ. ზოგადად საქართველოდან სახმელეთო ექსპორტს საკმაოდ წარმატებით ვახორციელებთ. იმპორტის შემთხვევაში კი სწრაფად ბრუნვადი ტვირთები, ავეჯი, ტექნიკა, დანადგარების, ბოლო პერიოდში გაიზარდა სოლარ პანელების შემოტანაზე მოთხოვნა“, - აღნიშნა ნამადოვმა.
დღის ტოპ 10 სიახლე
მოსაზრება
ჩვენი ამოცანაა, ბიზნეს სექტორის ინტერესების წარმოდგენა
საჭიროა, ამ დადგენილებების მოდიფიცირება ისეთი გზით, რომ არ დაზიანდეს არც ბიზნესის და არც სახელმწიფოს ინტერესები.
სოსო ფხაკაძე
სხვა სიახლეები
24.04.2025
გვაქვს მოლოდინი, რომ 2025 წლის ზაფხულის სეზონი, მეტად ნაყოფიერი იქნება საქართველოს ტურიზმისთვის, ვიდრე განვლილი წლებში, - აცხადებს კომპანია Inn Hospitality-ს კომერციული დირექტორი ნინა გაჩეჩილაძე.
Inn Hospitality კი ქართულ ბაზარზე რამდენიმე სასტუმროს აერთიანებს, მათ შორისაა Bakuriani Inn და Akhaltsikhe Inn.
„მოგეხსენებათ, უკვე მაისის თვიდან კურორტ ბაკურიანზე იწყება წიწვოვანი მცენარეების ყვავილობა, ე.წ დამტვერვა, რის გამოც კურორტისადმი ინტერესი მატულობს, განსაკუთრებით შიდა ბაზარზე, ხოლო ახალციხის მიმართულებით, მეტად აქტიური ხდება საქმიანი ტურიზმი. შესაბამისად, ამ პერიოდიდან, როგორც სასტუმრო Bakuriani Inn-ის ასევე, სასტუმრო Akhaltsikhe Inn-ის შემთხვევაში ველოდებით მოთხოვნის ზრდას.
თუ გავითვალისწინებთ, უკვე არსებული მიზნობრივი ბაზრებიდან მომართვიანობის დინამიკას, სტრატეგიულ პარტნიორებს და ამავდროულად ბოლო პერიოდში, ქვეყნის მასშტაბით, ავიაკომპანიებთან მიღწეულ შეთანხმებებს და მიმდინარე მარკეტინგულ კამპანიებს, გვაქვს მოლოდინი რომ 2025 წლის ზაფხულის სეზონი, მეტად ნაყოფიერი იქნება საქართველოს ტურიზმისთვის ვიდრე განვლილი წლებში, როგორც სასტუმრო Bakuriani Inn-ის, ასევე Akhaltsikhe Inn-ის შემთხვევაში“, - განმარტავს Inn Hospitality-ს კომერციული დირექტორი.
ნინა გაჩეჩილაძის თქმით, იმისათვის, რომ სასტუმრომ მეტი სტუმრის მოზიდვა შეძლოს ემატება ახალი სერვისები, მათ შორისაა ტურების ორგანიზება.
„რაც შეეხება ჩვენს შეთავაზებებს, გარდა სასტუმროს სერვისებისა, როგორიცაა სპა და აუზი, სამჯერადი კვება, ბარ-რესტორანი, ბავშვთა გასართობი სივრცეები და სხვა, ვაგრძელებთ სამცხე ჯავახეთის მასშტაბით, ტურების დაგეგმვა-ორგანიზებას. ამ მარშრუტებში უცვლელი რჩება რეგიონში მდებარე კულტურულ-ისტორიული ძეგლების მონახულება, რასაც დაემატა ტურები ტაბაწყურის მიმართულებით. ამავდროულად მაისის თვიდან, ჩვენი ერთგული სტუმრებისთვის გააქტიურდება, ე.წ ლოიალურობის პროგრამა, რომელიც გულისხმობს სპეციალური ფასდაკლებებსა და ბენეფიტებს“, - ამბობს ნინა გაჩეჩილაძე.
