ქართული ყურძნის კოსმეტიკური ბრენდი „მტევანი კოსმეტიკსი“ გაყიდვების არხების გაფართოებასა და ასორტიმენტის განვითარებას განაგრძობს. მიმდინარე პროექტებსა და სამომავლო გეგმებზე Business Insider Georgia-ს „მტევანი კოსმეტიკსის“ დამფუძნებელი ალექსანდრე ბოლქვაძე ესაუბრა.

„ზოგადად, ძალიან აქტიურად ვმუშაობთ და კომპანია გაყიდვების მიმართულებით ყოველთვიურად ვითარდება.

რაც შეეხება ასორტიმენტს, ამაზე ადრეც ვისაუბრეთ, თუმცა კიდევ ერთხელ გავიმეორებ: გვაქვს როგორც კოსმეტიკის ხაზი, ისე არაკოსმეტიკური მიმართულება - Mtevani Home, რომელიც აერთიანებს სანთლებს, თხევად და მყარ დიფუზორებს, ოთახის სურნელოვან დიფუზორებსა და ფარდებისა და თეთრეულისთვის განკუთვნილ სურნელოვან პროდუქტებს.

Mtevani Home-ის ხაზს აქტიურად ვავითარებთ, რადგან ვფიქრობთ, რომ მისი საშუალებით არაფარმაცევტულ რითეილშიც შევალთ და გავძლიერდებით. ამჟამად ჩვენი კოსმეტიკური პროდუქცია ძირითადად ფარმაცევტულ სექტორზეა ორიენტირებული, თუმცა გვინდა, არაფარმაცევტული მიმართულებაც განვავითაროთ. ეს საკმაოდ დიდი და მნიშვნელოვანი ბაზარია, რომლის ერთ-ერთი მთავარი სეგმენტი სუპერმარკეტებია.

სუპერმარკეტებში ჩვენს ტრადიციულ ფარმაცევტულ პროდუქტებზე, მაგალითად, შამპუნებსა და შხაპის გელებზე, შედარებით ნაკლები მოთხოვნაა, რადგან ამ კატეგორიაში მომხმარებლებს არჩევანის უფრო ფართო შესაძლებლობა აქვთ და სხვა ტიპის პროდუქტებითაც ინტერესდებიან. სწორედ ამიტომ ვაპირებთ, ორივე მიმართულება პარალელურად განვავითაროთ.

რაც შეეხება სამომავლო გეგმებს, აქტიურად ვმუშაობთ გაყიდვების არხების გაფართოებაზე. ძალიან მალე სითი მოლსა და გალერია თბილისში შევალთ. ამჟამად სტენდებით წარმოდგენილი ვართ ისთ ფოინთსა და თბილისი მოლში. შემდგომ ეტაპზე ბათუმი მოლის მიმართულებითაც ვიმუშავებთ და ქსელის გაფართოებას გავაგრძელებთ.

პარალელურად, ინტენსიურად ვმუშაობთ საექსპორტო მიმართულების განვითარებაზეც. ამ ეტაპზე კონკრეტული დეტალების გამხელისგან თავს შევიკავებ, თუმცა ერთ-ერთი პრიორიტეტული ბაზარი ყაზახეთია. ამ მიმართულებით საკითხს საფუძვლიანად ვსწავლობთ და უკვე საბოლოო ეტაპზე ვართ, რათა ბაზარზე შესვლის სწორი სტრატეგია შევიმუშაოთ.

გარდა ამისა, გავაფართოეთ მარკეტინგული მიმართულებაც. თუ ადრე ორ ინფლუენსერთან ვთანამშრომლობდით, ახლა ამ პროცესში გაცილებით მეტი, შედარებით მცირე აუდიტორიის მქონე ინფლუენსერია ჩართული. მათმა ნაწილმა თავად გამოიჩინა ინიციატივა და თანამშრომლობის სურვილი გამოთქვა. შესაბამისად, ამ მიმართულებითაც აქტიურად ვმუშაობთ, რათა ბრენდის ცნობადობა კიდევ უფრო გავზარდოთ“, - აცხადებს ალექსანდრე ბოლქვაძე.