Fitch Ratings-მა გააუმჯობესა Georgia Global Utilities JSC-ის (GGU) საკრედიტო რეიტინგის პერსპექტივა სტაბილურიდან პოზიტიურამდე, და დაადასტურა კომპანიის IDR „BB-“ დონეზე.

შეფასების თანახმად, GGU-ის საინვესტიციო სტრატეგია კვლავ კონცენტრირებულია წყლის ქსელის ინფრასტრუქტურის განახლებაზე (დაკარგების შესამცირებლად), სატუმბი სადგურების მოდერნიზაციაზე(ენერგოეფექტურობის ზრდისა და მომხმარებლებზე ელექტროენერგიის მიწოდების გასაზრდელად), ასევე მრიცხველების სისტემისა და მომხმარებელთა მანიპულაციის გამოვლენის მექანიზმების გაუმჯობესებაზე.

Fitch Ratings-ის შეფასებით, ჯგუფის შემოსავლების დაახლოებით 85% მოდის რეგულირებულ წყალმომარაგებასა და ნარჩენი წყლების მომსახურებაზე, რაც გამყარებულია ტარიფების პროგნოზირებადობით 2026 წლის ბოლომდე, თბილისში არსებული პოზიციით და ქსელური ინფრასტრუქტურის პირდაპირი მფლობელობით.

ცნობისთვის, Georgia Global Utilities (GGU) თბილისის, მცხეთისა და რუსთავის წყალმომარაგების სისტემებისა (gwp) და ენერგეტიკული ობიექტების მმართველი კომპანიაა. GGU ფლობს ოთხ ჰიდროელექტროსადგურს 149 MWh ჯამური დადგმული სიმძლავრით: თეთრიხევიჰესს, ბოდორნაჰესს, საგურამოჰესსა და ჟინვალის ჰიდროელექტროსადგურს, რომელიც საქართველოში სიდიდით მეორეა წყალსაცავიან ჰიდროელექტორსადგურებს შორის.

2022 წლიდან კომპანიის 80%-იანი წილის მფლობელია ევროპის წყალმომარაგების ბაზრის ერთ-ერთი უმსხვილესი წარმომადგენელი ესპანური კომპანია FCC Aqualia, ხოლო 20%-ს საინვესტიციო ჰოლდინგი "საქართველოს კაპიტალი" ფლობს.

ესპანური წყალმომარაგების კომპანია FCC Aqualia წყლის მენეჯმენტის კომპანიაა, რომელსაც FCC (51%) და IFM Investors (49%) ფლობს. Aqualia მომხმარებელთა რაოდენობით მეოთხე უმსხვილესი წყლის მენეჯმენტის კომპანიაა ევროპაში და მეცხრე მსოფლიოში. აქუალია ემსახურება 45.2 მილიონ მომხმარებელს 18 ქვეყანაში, კერძოდ: საქართველოში, ესპანეთში, შეერთებულ შტატებში, საფრანგეთში, იტალიაში, მექსიკაში, ომანში, პერუში, პორტუგალიაში, კატარში, ალჟირში, საუდის არაბეთში, კოლუმბიაში, ჩილეში, ეგვიპტეში, არაბთა გაერთიანებულ საემიროებში, ჩეხეთსა და რუმინეთში.