გავაფართოვეთ ასორტიმენტი, პროდუქციაზე მოთხოვნა საგრძნობლად გაიზარდა , - ამის შესახებ Business Insider Georgia -ს სურნელოვანი სანთლების მწარმოებელი კომპანია „ციმციმის“ პარტნიორმა ნანა დავითაძემ განუცხადა.

„გავაფართოვეთ ასორტიმენტი, მოთხოვნა მნიშვნელოვნად გაიზარდა და რაც ყველაზე მთავარია გაიზარდა ცნობადობაც. ეს ყველაფერი გარკვეულწილად "ფლეშ მარკეტის" დამსახურებაა, რომელიც ყოველ შაბათ-კვირას სიონის ქუჩაზე იმართება. „ციმციმი“ აქტიურად არის ჩართული ქუჩის გაყიდვებსა და ბაზრობებში, რის შედეგადაც გაყიდვები კოლოსალურად გაიზარდა.

ჩვენი სანთლები დამზადებულია ნატურალური ვაქსით, რასაც განსაკუთრებით დიდ ყურადღებას აქცევენ ტურისტები. როგორც კი ხედავენ, მაშინვე ამჩნევენ ხარისხს. გვაქვს არომატების ფართო არჩევანი, რომელიც მათ განსაკუთრებით მოსწონთ “, - ამბობს ნანა დავითაძე.

„ციმციმი“ ამჟამად 25-მდე სახეობის პროდუქტს აწარმოებს და სამომავლოდ წარმოების ზრდას გეგმავს.

„ამჟამად, ვაწარმოებთ დაახლოებით 25 სახეობის პროდუქტს, ხოლო ახალი წლის მოახლოებასთან ერთად ვგეგმავთ წარმოების ზრდას, რადგან ამ პერიოდში ჩვენს სანთლებზე მოთხოვნა განსაკუთრებით მაღალია. უკვე მივიღეთ წინასწარი შეკვეთები. აღსანიშნავია, რომ კომპანიების მხრიდან მნიშვნელოვნად გაიზარდა ინტერესი და მოთხოვნა კორპორატიული საჩუქრების მიმართ “, - აღნიშნავს კომპანიის პარტნიორი.

ცნობისთვის, „ციმციმი“ ქართული კომპანიაა, რომელიც სულ რაღაც ერთი წლის წინ გამოჩნდა ბაზარზე და აწარმოებს 100%-ით ნატურალურ სოიოს ცვილისგან დამზადებულ სურნელოვან სანთლებს. პროდუქცია გარდა იმისა, რომ სასარგებლო და ნატურალურია, ასევე ხასიათდება დამატენიანებელი ეფექტით.