ვფიქრობთ, რომ ეს ყველაფერი მიუთითებს, თუ რამდენად ღიაა კომპანია ასეთი სახის ჩართულობისთვის; მათთვის მნიშვნელოვანია, რომ პროექტის ფარგლებში საქართველოს ინტერესები იყოს გათვალისწინებული, - ამის შესახებ რადიო „სივრცის“ ეთერში, გადაცემაში Business Insider Georgia, სტუმრობისას Eagle Hills Georgia-ს სამეთვალყურეო საბჭოს წევრმა და სააგენტო „აწარმოე საქართველოში“-ს დირექტორის მოადგილემ, თორნიკე ზირაქიშვილმა განაცხადა.

როგორც გუშინ გახდა ცნობილი, Eagle Hills Georgia-ს სამეთვალყურეო საბჭოს წევრები არიან: ეკონომიკისა და მდგრადი განვითარების მინისტრის მოადგილე ირაკლი ნადარეიშვილი, სააგენტო „აწარმოე საქართველოში“-ს დირექტორის მოადგილე თორნიკე ზირაქიშვილი და Eagle Hills-ის დამფუძნებელი მოჰამედ ალი რაშედ ალაბბარი. ამონაწერი სამეწარმეო და არასამეწარმეო იურიდიულ პირთა რეესტრიდან გუშინ გამოქვეყნდა.

„გუშინდელი ამონაწერის გამოჩენა კიდევ ერთი დასტურია იმ მონაცემებისა და მაჩვენებლების, რაზეც ჩვენ ვსაუბრობდით, იმიტომ რომ ეს კომპანია სახელმწიფოს თანამეწილეობით არის შექმნილი. ჩვენ გვაქვს 33.33% ამაში და, ამასთან ერთად, როგორც სახელმწიფო, ვყოფილვართ სამეთვალყურეო საბჭოს წევრები. რა არის აქ ძალიან მნიშვნელოვანი? ეს არის ყველა გამართული კომპანიის, ყველა კორპორაციის მმართველობის სწორი და ყველაზე ღია ფორმა, რაც შეიძლება კომერციულ პროექტებს ჰქონდეს. ასევე, ძალიან მნიშვნელოვანი იყო, რომ თავად კომპანიის მხრიდან თავიდანვე არსებობდა ღიაობა პროცესის მიმართ - მათ უნდოდათ, რომ ჩვენ გვქონოდა ასეთი ხედვა და ჩართულობა ამ პროექტში და ჩვენ გვქონდა წვდომა ყველა შესაბამის ინფორმაციაზე ამ მექანიზმის საშუალებით, რომელიც შეიძლება პროექტის განვითარებას უკავშირდებოდეს.

ამასთან ერთად, რა თქმა უნდა, ეს არის ერთგვარი კავშირის მექანიზმი პროექტში დაგეგმილი მნიშვნელოვანი მოვლენების, ზედამხედველობის და სხვა კუთხით, რათა ქართულმა მხარემ მუდმივად იცოდეს, როგორ ვითარდება პროექტი, რა მდგომარეობაშია ის, ხომ არაფერი საჭიროებს ჩვენს ჩარევას. ვფიქრობთ, რომ ეს ყველაფერი მიუთითებს, თუ რამდენად გამართული და ღიაა კომპანია ასეთი სახის ჩართულობისთვის და რამდენად მნიშვნელოვანია მათთვის, რომ საქართველოს ინტერესები გათვალისწინებული იყოს პროექტის ფარგლებში. ასეთი ჩართულობა, რა თქმა უნდა, ძალიან მნიშვნელოვანია ქართული მხარისთვისაც“, - განაცხადა ზირაქიშვილმა.