ეს არის გზავნილი, რომ საქართველო აირჩევს ინტელექტს, ინოვაციას და ინტეგრაციას, - ამის შესახებ  პარლამენტის ევროპასთან ინტეგრაციის კომიტეტის თავმჯდომარის მოადგილემ და იმავდროულად დარგობრივი ეკონომიკისა და ეკონომიკური პოლიტიკის კომიტეტის წევრმა ვაკო თურნავამ საპარლამენტო სესიაზე სიტყვით გამოსვლისას განაცხადა, სადაც „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ შესატან ცვლილებებზე ისაუბრა, რომლის ინიციატორიც თავად არის. 

„დღეს, მზარდი გლობალური კონკურენციის პირობებში, საქართველო შედარებითი ეკონომიკური უპირატესობის მოსაპოვებლად ვეღარ იბრძოლებს მხოლოდ შეღავათიანი საგადასახადო პირობებით. საჭიროა, შევქმნათ სამართლებრივი და ბიზნესგარემო, რომელიც იმავე სიჩქარით ვითარდება, როგორც ტექნოლოგიები, და ისეთი პირობები, რომლებიც ინვესტორსაც და მაღალი კვალიფიკაციის პროფესიონალსაც დაარწმუნებს, რომ საქართველო არის სწორი არჩევანი.

სწორედ ამ მიზნით, მოგეხსენებათ, საქართველოს პარლამენტს ინიციატივით მივმართე, რათა დაჩქარებული წესით შევიდეს ცვლილებები „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ საქართველოს კანონში.

აღნიშნული ცვლილებები არ წარმოადგენს მხოლოდ ტექნიკურ იურიდიულ რეგულაციას — ეს არის მნიშვნელოვანი სტრატეგიული ნაბიჯი და ახალი სიტყვა, რომელიც ერთდროულად ემსახურება საქართველოს ეკონომიკურ განვითარებას, საგადასახადო სისტემის ეფექტიანობას და რეგიონულ და  საერთაშორისო ჭრილში პოზიციონირების გაძლიერებას. 

კანონპროექტი ადგენს სპეციალურ ბინადრობის ნებართვას IT სექტორის პროფესიონალებისთვის, რაც:

1.⁠ ⁠უზრუნველყოფს საერთაშორისო ტექნოლოგიური კომპანიების ხელმძღვანელებისა და წარმომადგენლების სტაბილურ ყოფნას ქვეყანაში;
2.⁠ ⁠საშუალებას მისცემს მცირე მეწარმეებად დარეგისტრირებულ უცხოელ სპეციალისტებს, დარჩნენ და საქმიანობა განახორციელონ საქართველოში გრძელვადიანად;
3.⁠ ⁠და რაც ყველაზე მნიშვნელოვანია — IT სექტორიდან სახელმწიფო ბიუჯეტში გაიზრდება საშემოსავლო გადასახადის შემოსავალი (მოსალოდნელია 3.6-ჯერ მეტი შემოსავალი მომდევნო 3 წლის განმავლობაში).

აქვე, მინდა ვისარგებლო შესაძლებლობით და მივმართო ჩვენს მოქალაქეებს — ეს ცვლილება თქვენს სამსახურს, განათლებას, ქალაქის და სოფლის განვითარებას მოემსახურება. ყოველი ლარი, რომელიც ქვეყანაში დარჩება და ამ ბინადრობის ნებართვის მფლობელების მიერ დაიხარჯება, ნიშნავს უფრო მეტ შესაძლებლობას თქვენთვის და თქვენი შვილებისთვის. გარდა პირდაპირი ფინანსური შემოსავლების ზრდისა, რომელიც თითოეულ ქართულ ოჯახს მოხმარდება, მაღალი კვალიფიკაციის IT სპეციალისტების საქართველოში მოზიდვა ხელს შეუწყობს მათ მიერ ცოდნისა და გამოცდილების გაზიარების ჩვენი ახალგაზრდების, სტუდენტების, დამწყები პროფესიონალებისთვის, რაც ერთი ორად გაზრდის აღნიშნული საკანონმდებლო ინიციატივის სარგებლიანობას ჩვენი ქვეყნისთვის.

მინდა მივმართო ჩვენს საერთაშორისო პარტნიორებსაც: საქართველო გახლავთ ქვეყანა, რომელიც აცნობიერებს გლობალური ციფრული ეკონომიკის როლს და დგამს მკაფიო პოლიტიკურ და საკანონმდებლო ნაბიჯებს. ჩვენ გელით საქართველოში არა როგორც ტურისტებს, არამედ როგორც პარტნიორებს — ინოვაციის, ზრდისა და განვითარების გზაზე.

ეს არ არის მორიგი საკანონმდებლო ცვლილება — ეს არის გზავნილი, რომ საქართველო აირჩევს ინტელექტს, ინოვაციას და ინტეგრაციას.

ბატონო თავმჯდომარე, პატივცემულო კოლეგებო, მოგიწოდებთ, მხარი დაუჭიროთ ამ კანონპროექტს — დღეს ჩვენ ვწერთ ქვეყნის ეკონომიკური პოლიტიკის წარმატების ახალ ისტორიას“, - აღნიშნა ვაკო თურნავამ.