EMMAR-ის ინვესტიციას საფუძვლად უდევს ჩვენს ქვეყანაში არსებული საინვესტიციო გარემო და საქართველოს მიმზიდველობა, - ამის შესახებ რადიო „სივრცის“ ეთერში გადაცემა Business Insider Georgia-ში სტუმრობისას "თბილისი დრაი პორტის" სამეთვალყურეო საბჭოს თავმჯდომარემ ჯემალ ინაიშვილმა განაცხადა, მისი თქმით, $6 მილიარდიანი ინვესტიცია ხელს შეუწყობს მცირე და საშუალო ბიზნესი, ასევე, პარალელური დარგების განვითარებას.

„პირველ რიგში მე ვფიქრობ, რომ ეს ინვესტორის გადაწყვეტილებაა და ამას საფუძვლად უდევს ის გარემო, ჩვენს ქვეყანაში არსებული საინვესტიციო და ჩვენი ქვეყნის მიმზიდველობა, ამ სახის და ამ ოდენობის ინვესტიციებისთვის უკვე. ეს პირველი პრეცედენტია, როდესაც გაჟღერდა ამ ოდენობის ინვესტიცია ერთჯერადი, ერთი კონკრეტული მიმართულებით. რა თქმა უნდა ამის ათვისება არ მოხდება და ვერ მოხდება ვერც ერთი წლის განმავლობაში და ვერც ორის. ეს გაიწელება გარკვეულ პერიოდში და ეს ასეც არის ალბათ გათვალისწინებული, მაგრამ თვითონ ეს 6 მილიარდიანი ინვესტიცია ხელს შეუწყობს მრავალ სხვა პარალელურ ინვესტიციებს და ხელს შეუწყობს მცირე და საშუალო ბიზნესის განვითარებას პარალელურად საქართველოში და ეკონომიკის პარალელური დარგების განვითარებას. იმიტომ, რომ ეს იქნება მრავალ წახნაგოვანი და მრავალ მიმართულებიანი ინვესტიცია, იმიტომ რომ იქ სადაც უნდა აშენდეს, იქ გზა იქნება მისაყვანი, იქ იქნება სხვა ინფრასტრუქტურა, კომუნიკაციები და ასე შემდეგ და ასე შემდეგ. იმიტომ, რომ მთავარი ინვესტორის გარდა ბევრი მოთამაშე იქნება პარალელურად ჩართული“, - აცხადებს ჯემალ ინაიშვილი.

 "თბილისის დრაი პორტის" სამეთვალყურეო საბჭოს თავმჯდომარის განმარტებით, EMMAR-ის მიერ ასეთი მნიშვნელოვანი ინვესტიციის განხორციელებით სარგებელს ბევრი სხვა მომიჯნავე სექტორები და ბიზნესები ნახავენ.

„რა თქმა უნდა, ჩვენც ვხედავთ სარგებელს აქედან, როგორც სატრანსპორტო კომპანიები, ჩვენი სატრანსპორტო კომპანია და ბევრი სხვა ჩვენი კონკურენტი. მათ შორის იმიტომ რომ ბევრი რამ რაც ამ მშენებლობის პროცესში იქნება საჭირო, ის იქნება ტრანსპორტირებული ზღვით, მსოფლიოს სხვადასხვა ქვეყნებიდან. აქედან გამომდინარე, ბევრი მოთამაშე ეყოლება ამ ინვესტიციას და თანამონაწილე“, - ამბობს ჯემალ ინაიშვილი.