Galt & Taggart-ის საბაზისო სცენარით 2025 წელს საქართველოს ეკონომიკა 6,8%-ით გაიზრდება. როგორც რადიო „სივრცის“ ეთერში გადაცემა Business Insider Georgia-ში სტუმრობისას Galt & Taggart-ის ეკონომისტმა ლაშა ქავთარაძემ განმარტა, იანვარში საბაზისო სცენარი 5%-ს შეადგენდა, თუმცა მზარდი ეკონომიკური ზრდის მაჩვენებლების გათვალისწინებით Galt & Taggart-მა პროგნოზს გადახედა. 

„როდესაც წელი დაიწყო, ჩვენ მაშინ წარმოვადგინეთ სამი სცენარი: საბაზისო, ოპტიმისტური და პესიმისტური სცენარი. საბაზისო სცენარით ჩვენი პროგნოზი იყო, რომ 2025 წელს საქართველოს ეკონომიკა 5%-ით გაიზრდებოდა. აქ ვითვალისწინებდით, როგორც შიდა პოლიტიკურ არასტაბილურობას, ასევე გლობალურად, რეგიონში შექმნილ იმ გაურკვევლობებს, რომლებიც ახასიათებს რუსეთ-უკრაინის ომს და ასევე მაგალითად, როდესაც ამერიკის პრეზიდენტი მოვიდა მოსალოდნელი იყო ასევე, რომ სატარიფო პოლიტიკასთან დაკავშირებით იქნებოდა გარკვეული ცვლილებები. თუმცა შემდგომ ეს სიურპრიზები უფრო ბევრი გვქონდა. როდესაც ვაკვირდებოდით იანვარში ეკონომიკურ აქტივობას, ასევე თებერვალში ეკონომიკურ აქტივობას, შემდგომ ახლა მარტის ოფიციალური მაჩვენებელი საქსტატისგან არ გვაქვს, თუმცა ჩვენ სხვადასხვა ინდიკატორებს ვაკვირდებით, სამი თვის მაკროეკონომიკური  მონაცემების საფუძველზე ჩვენ მოგვიხდა პროგნოზის ანუ 5%-ის ზრდა 6.8%-მდე. ჩვენ ვფიქრობთ, რომ ეს პროგნოზი მიმდინარე წლისთვის საკმაოდ რეალისტურია.

უფრო მეტიც, შეიძლება კონსერვატიულიც კი აღმოჩნდეს. იმიტომ, რომ თუ ეს ტენდენცია, რაც უკვე ამ სამ თვეში გვაქვს, გაგრძელდება შემდგომ თვეებშიც არ არის გამორიცხული, რომ ზრდის მიმართულებით ამ პროგნოზის გადახედვა მოგვიწიოს. აქ ჩვენ ვუყურებთ საერთაშორისო ორგანიზაციების პროგნოზებსაც“, - აღნიშნა ეკონომისტმა.

ლაშა ქავთარაძის თქმით, 2025 წელს Moody’s-ის მიერ საქართველოს ეკონომიკური ზრდის პროგნოზი 6%-ია, ასეთივეა S&P-ის, EBRD-ის პროგნოზები.

„ყველა ორგანიზაციის პროგნოზების საშუალოც, რომ გამოვიყვანოთ 6%-თან არის ახლოს. ბევრი მათ შორის გამოირჩევა კონსერვატიული მიდგომით. წინა პერიოდებში თუ დავაკვირდებით ჩვენ მათ მიერ გაკეთებულ პროგნოზებს თუ შევადარებთ მაგალითად, ფაქტობრივ მონაცემებს დიდი განსხვავება იყო. ამიტომ უფრო კონსერვატიული მიდგომებით არიან გამორჩეული. საინტერესო არის ზოგადად, როცა ვსაუბრობთ ეკონომიკურ ზრდაზე, ფაქტობრივად პირველ ორ თვეში ოფიციალური, რაც არის ეს არის 9.4%-იანი ეკონომიკური ზრდა. შარშან წლიური იყო 9.4%, ანუ სტაბილურად ნარჩუნდება ეს მაღალი ეკონომიკური ზრდა. შარშან, ეკონომიკური ზრდის ძირითადი განმაპირობებელი იყო მომსახურების დარგები, მაშინ როცა მრეწველობა გამოცოცხლდა, გადამამუშავებელი მრეწველობა იყო დამატებითი კონტრიბუტორი, თუმცა როდესაც მთლიანად მრეწველობას ვუყურებთ, მრეწველობა არ იყო დიდი კონტრიბუტორი ეკონომიკური ზრდის. აქ ძირითადად იყო მომსახურების დარგები. თუ შევხედავთ დანახარჯების მეთოდით, მოხმარება იყო ძირითადი განმაპირობებელი, მაშინ როცა ინვესტიციებიც პოზიტიური კონტრიბუტორი იყო. წმინდა ექსპორტს რაც შეეხება, ექსპორტსა და იმპორტს შორის სხვაობა, მათი კონტრიბუცია უარყოფითი რჩებოდა 2024 წელს. ეკონომიკის ზრდაში ჩვენ ყურადღებას ვამახვილებთ თუ რომელი სექტორებია მოწინავე. ჩვენ წინა პერიოდებშიც გვქონდა ისეთი სიტუაცია, რომ ეკონომიკა თანდათანობით უფრო მეტად დივერსიფიცირებული ხდება. მაგალითად 2024 წლის სექტორებს თუ დავაკვირდებით მთლიან შიდა პროდუქტში არც ერთი სექტორი არ არის ისეთი წილით, რომელიც 20%-ზე მაღალი იქნებოდა“, -აღნიშნა Galt & Taggart-ის ეკონომისტმა.

ლაშა ქავთარაძის თქმით, ეს ყველაფერი მიუთითებს იმაზე, რომ საქართველოს ეკონომიკა დივერსიფიცირებულია.