„ოქროველის“ ბრენდით ტყის ღვინო მაღალმთიან აჭარაში 2021 წლიდან იწარმოება. კომპანიაში არსებულ სიახლეებსა და სამომავლო გეგმებზე Business Insider Georgia „ოქროველის“ დამფუძნებელს ზანდა მესხიძეს ესაუბრა.

როგორია კომპანიის მიმდინარე სიახლეები?

2025 წელი ნაკლები სიახლეებით ვართ  წარმოდგენილი, მხოლოდ რამდენიმე სარეალიზაციო წერტილი დაგვემატა, თუმცა ეს წელი გამოვიყენეთ მაღალმთიან რეგიონში ტყის მოცვის ძიებისთვის, რადგან ყოველწლიურად ტყის მოცვის რაოდენობა მცირდება და უფრო და უფრო რთული ხდება მისი მოპოვება.

გვქონდა ტური ცხენებით მაღალმთიან ადგილებზე. მოპოვება რთული იქნება, მაგრამ არის მოცვის რესურსი, რაც გვახარებს და გვაძლევს სტაბილურობის საფუძველს.

როგორია მიმდინარე ასორტიმენტი?

ამ ეტაპზე ვინარჩუნებთ ფოკუსს ერთ კლასიკურ პროდუქტზე - ნატურალურ ტყის მოცვის სასმელზე. ამის მიზეზი მარტივია: ბუნებრივი რესურსების შეზღუდული ხელმისაწვდომობა და ხარისხზე კომპრომისის გარეშე მუშაობის პრინციპი. პერიოდულად ვთავაზობთ ტყის მოცვის ჩაის მომხმარებელს (თუმცა შეზღუდული რაოდენობით და არა მასიური წარმოებით) და ვიღებთ შეკვეთებს სხვადასხვა სამკურნალო, ველური მცენარეების ჩაიზე, როგორიცაა: მშრალი ასკილი, ევკალიპტი და უკვდავას ყვავილი.

როგორია კომპანიის სამომავლო გეგმები?

ყველაზე გრძელვადიანი და მნიშვნელოვანი მიზანი არის თბილისის ბაზარზე სანდო და ხარისხიანი დისტრიბუციის არხების მოძებნა. ვგრძნობ, რომ დედაქალაქში დიდი მოთხოვნაა ჩვენი პროდუქტისადმი, მაგრამ ჯერ კიდევ ვეძებ იმ სანდო პარტნიორს, რომელიც გაითვალისწინებს ჩვენი პროდუქტის სპეციფიკას და ფასეულობებს.
პარალელურად ვცდილობთ ონლაინ პლატფორმებთან თანამშრომლობას, რადგან ყველაზე კომფორტული იქნება მომხმარებლისთვის შეკვეთა ადგილზე მიტანით. ასევე ვგეგმავთ საახალწლოდ სასაჩუქრე შეფუთვას ან ნატურალურ ჩაისთან ერთად ვარიაციას, რაც იდეალური იქნება მათთვის, ვინც ეძებს უნიკალურ, ხარისხიან საჩუქარს და ამის შესახებ ინფორმაციას აუცილებლად გავაზიარებთ წინასწარ ჩვენი სოციალური გვერდის დახმარებით.

მიუხედავად ყველა გამოწვევისა, წარმოების გაგრძელებაზე ყველაზე მეტად გვახარებს და გვაძლევს ნამდვილ სტიმულს ჩვენი ერთგული მომხმარებლები. აქვე მინდა გამოვხატო ღრმა მადლიერება ყველა იმ ადამიანის მიმართ, ვინც ირჩევს ჩვენს პროდუქტს. მათ გარეშე ჩვენი კომპანია უბრალოდ არც შეიქმნებოდა. ეს ნდობა არის ჩვენი ყველაზე დიდი ღირებულება და მოტივაცია. ამიტომ, კიდევ ერთხელ დიდი მადლობა მათ და ვპირდებით ყველაფერს გავაკეთებთ იმისთვის, რომ მათი იმედები ყოველთვის გავამართლოთ ჩვენი ხარისხიანი, ავთენტური პროდუქციით.

ცნობისთვის, „ოქროველი“ არის პატარა საოჯახო წარმოება, რომელიც შეზღუდული რაოდენობით აწარმოებს ტყის მოცვის ნატურალური წვენისგან, სასიამოვნო და სასარგებლო სასმელს.