ჩვენი სტრატეგია გახსნის დღიდან ეფუძნება ბაზრების დივერსიფიკაციას, რასაც თანმიმდევრულად და წარმატებით ვახორციელებთ, - ამის შესახებ Business Insider Georgia-სთან საუბარში Clocks Hotel Tbilisi-ს გენერალურმა მენეჯერმა, ანი მღებრიშვილმა განაცხადა. მის თქმით,  მაღალი დატვირთულობა შენარჩუნდა მთელი ზაფხულის განმავლობაში და შემოდგომის თვეებშიც გრძელდება.

„2025 წლის ზაფხულის სეზონი საკმაოდ წარმატებული აღმოჩნდა Clocks Hotel Tbilisi-სთვის. განსაკუთრებით აღსანიშნავია ივლისისა და აგვისტოს პერიოდი. წინა წლებისგან განსხვავებით, როცა მაისი-ივნისის პერიოდის დატვირთულობა პიკს აღწევდა, შემდგომი თვეები (ივლისი-აგვისტო) შედარებით მშვიდი იყო. წელს სრულიად სხვა შედეგი მივიღეთ - მაღალი დატვირთულობა შენარჩუნდა მთელი ზაფხულის განმავლობაში და შემოდგომის თვეებშიც გრძელდება. ჩვენი სტრატეგია გახსნის დღიდან ეფუძნება ბაზრების დივერსიფიკაციას, რასაც თანმიმდევრულად და წარმატებით ვახორციელებთ. ვცდილობთ ვუმასპინძლოთ სტუმრებს სხვადასხვა ქვეყნიდან, რაც ქმნის სტაბილურ და მდგრად შედეგს. 

2026 წელსაც სწორედ ამ მიდგომას გავაგრძელებთ, ამავდროულად რაღა თქმა უნდა გავითვალისწინებთ და შევეცდებით მოვერგოთ ყველა იმ ახალ ბაზარს, სადაც საქართველო პოზიციონირდება როგორც საინტერესო ტურისტული მიმართულება. მიმდინარე პერიოდიც საკმაოდ დატვირთულია. სექტემბერ-ოქტომბერში ჩვენს სასტუმროში ძირითადი დატვირთვა მოდის ევროპულ ტურისტულ ჯგუფებზე, თუმცა ამასთან ერთად უკვე იგრძნობა კორპორატიული სეგმენტის გააქტიურება ამ სეზონზე ფაქტობრივად თანაბარი წილი უჭირავთ ტურისტულ და ბიზნესს სეგმენტს, რაც პოზიტიური ტენდენციაა და ამსუბუქებს სეზონურობის გავლენას“, - აცხადებს ანი მღებრიშვილი.

Clocks Hotel Tbilisi-ს გენერალური მენეჯერის თქმით, ზამთრის სეზონზე სასურველი დატვირთულობის მისაღწევად აუცილებელია უფრო მეტი საერთაშორისო ღონისძიებების დაგეგმვა.

„რაც შეეხება გამოწვევებს, ვფიქრობ, მაღალი სეზონის დასრულების შემდეგ ერთ-ერთ ყველაზე დიდ გამოწვევად წელსაც დარჩება სასტუმროების დატვირთულობა. ეს თავის მხრივ იწვევს ფასების შემცირებას . სასტუმროების დატვირთულობის გაზრდის მიზნით მიმაჩნია, რომ ზამთრის პერიოდში აუცილებელია უფრო მეტი საერთაშორისო ღონისძიებების დაგეგმვა - იქნება ეს კონფერენციები, ფორუმები, სპორტული თუ კულტურული ღონისძიებები. ასეთი ინიციატივები აუცილებლად მოიზიდავს დამატებით სტუმრების ნაკადს და საშუალებას მოგვცემს, დაბალი სეზონი გარდავქმნათ აქტიურ პერიოდად და განვავითაროთ ტურიზმის აქტივობა მთელი წლის განმავლობაში“, - განაცხადა Clocks Hotel Tbilisi-ს გენერალურმა მენეჯერმა.