PolSport • პოლსპორტი სპორტული ბანაკია ბაკურიანში, რომელიც სამი წელია ფუნქციონირებს და ორიენტირებულია მოზარდების, როგორც ზამთრის (სათხილამურო), ისე საზაფხულო გადამზადებაზე. მეტი ინფორმაციისთვის, Business Insider Georgia “პოლსპორტის“ მენეჯერს ირაკლი ვეცკოს ესაუბრა.

როგორია კომპანიის საქმიანობის სპეციფიკა, როდის დაიწყეთ საქმიანობა და რას სთავაზობთ მომხმარებლებს?

„პოლსპორტი“ სამი წელია ფუნქციონირებს. საქმიანობის სპეციფიკა გულისხმობს ზამთრისა და საზაფხულო ბანაკების მოწყობას ბავშვებისთვის.
ზამთრის ბანაკი მოიცავს სამთო-სათხილამურო აქტივობებს, სადაც ბავშვები სწავლობენ ან აუმჯობესებენ თხილამურებზე სრიალის უნარებს.
საზაფხულო ბანაკი ძირითადად ფოკუსირებულია ლაშქრობებზე და მთაში სიარულზე.
ორივე შემთხვევაში, ბავშვები გარე სპორტულ აქტივობებთან ერთად, ჩართულნი არიან სხვადასხვა სახის ფიზიკურ, სპორტულ, ინტელექტუალურ და შემეცნებით აქტივობებშიც.

როგორ აფასებთ მოთხოვნას ზოგადი თვალსაზრისით?
ზოგადად, მოთხოვნა ამ სფეროს მიმართ მზარდია, რაც ჩვენი დაკვირვებით რამდენიმე მიზეზით აიხსნება. პირველ რიგში, თავად მომსახურების ტიპი, რომელსაც „პოლსპორტი“ სთავაზობს მშობლებს, საკმაოდ მიმზიდველია. მშობლებისთვის მნიშვნელოვანია, რომ ბავშვები ბანაკში სრულიად დამოუკიდებლად მიემგზავრებიან, სადაც მათ უზრუნველყოფილი აქვთ კვება, უსაფრთხოება, ზედამხედველობა და მრავალფეროვანი გასართობი აქტივობები. ხშირ შემთხვევაში, ბავშვები ბანაკში ახალ მეგობრებსაც იძენენ.
აღსანიშნავია ბანაკის ფასის ხელმისაწვდომობაც, რაც მშობლებისთვის საკმაოდ მისაღებია, თუ გავითვალისწინებთ იმ ხარჯებს, რომელიც დამოუკიდებლად მსგავსი ტიპის მომსახურების ორგანიზებას სჭირდება. მაგალითად, ზამთარში ბანაკი მოიცავს თხილამურებით სრიალის სწავლას, აღჭურვილობას სრული კომპლექტით და პროფესიული ზედამხედველობით. მშობელი იღებს სრულ პაკეტს, რომელიც მოიცავს ბავშვის ტრანსპორტირებას თბილისიდან და მის უკან დაბრუნებას, საცხოვრებელს, კვებას, მოვლასა და უსაფრთხოებას.

საზაფხულო ბანაკები კი განსაკუთრებით მდიდარია ლაშქრობის ტიპის აქტივობებით. ეს არის: მთაში სიარული, ღამის თევა, კოცონის დანთება, ბუნების მოვლა და მრავალი სხვა უნარ-ჩვევის განვითარება, რაც ბავშვისთვის როგორც ფიზიკურად, ასევე გონებრივად მნიშვნელოვანია.
ეს ყველაფერი ერთად ქმნის საუკეთესო გამოცდილებას, რომელიც მშობლებისა და ბავშვებისთვის ერთნაირად ღირებულია.

როგორია „პოლსპორტის“ სამომავლო გეგმები?
გეგმაში გვაქვს, რაც შეიძლება მეტ ბავშვსა თუ მოზარდს შევთავაზოთ, გავუჩინოთ სურვილი და შესაძლებლობა, რომ გაეცნონ და დაეუფლონ ამ სპორტს. თხილამურებით სრიალი საქართველოში საკმაოდ პოპულარულია, ბევრი ადამიანი ეწევა ამ სპორტს და ჩვენი მთავარი სურვილია, რომ ქართველმა სპორტსმენებმა მომავალში შეძლონ ევროპისა და მსოფლიოს წამყვან მთიან კურორტებზე ასპარეზობა.
ჩვენი მიზანია, ბავშვებს პატარა ასაკიდანვე შევუწყოთ ხელი ამ სფეროში განვითარების. ჯერ უნდა დაიწყონ ადგილობრივი შეჯიბრებებით, რაც შემდეგ მათ გაუხსნის გზას საერთაშორისო ასპარეზობისკენ. ბანაკში მონაწილეთა ასაკი მერყეობს 8-დან 15 წლამდე.

აღსანიშნავია, რომ „პოლსპორტი“ და კლუბი „იკი-სკი“, რომელიც უკვე 27 წელია ამ სფეროში წარმატებით მოღვაწეობს, 2025 წლის ზაფხულიდან პარტნიორობაზე შეთანხმდნენ და მსურველებს სხვადასხვა სიახლეს შესთავაზებენ.