„შინარი“ ქართული, ნატურალური პროდუქტების კომპანიაა, რომელიც ბაზარზე სულ რამდენიმე თვის წინ გამოჩნდა. მეტი ინფორმაციისთვის Business Insider Georgia კომპანიის დამფუძნებლებს მარიამ გურგულიანსა და ნიკოლოზ ჯაჭვაძეს ესაუბრა.

- როგორია კომპანიის საქმიანობის სპეციფიკა, როდის დაიწყეთ ბაზარზე ოპერირება და რას სთავაზობთ მომხმარებლებს?

მოგეხსენებათ, ბაზარზე ნატურალური პროდუქტების დეფიციტია. ამიტომ გადავწყვიტეთ, საქართველოს ორი უკიდურესი რეგიონიდან — სვანეთიდან და კახეთიდან მომხმარებლებისთვის ნატურალური პროდუქტები შეგვეთავაზებინა.
ამჟამად ჩვენი ასორტიმენტი მოიცავს შემდეგ პროდუქტებს: თაფლი, ჩურჩხელა, სვანური მარილი, სვანური სუნელები და კახური ზეთი.

- როგორ აფასებთ მოთხოვნას ზოგადი თვალსაზრისით?

მოთხოვნა საკმაოდ მაღალია. მიუხედავად იმისა, რომ ბაზარზე ოპერირება ნოემბრიდან დავიწყეთ, ამ მოკლე დროში შევიძინეთ ბევრი ლოიალური მომხმარებელი. განსაკუთრებით დიდი დატვირთვა დეკემბერში, საახალწლო პერიოდში გვქონდა, რაც, ჩვენი შეფასებით, პროდუქციის ხარისხით არის განპირობებული.

- რას მიიჩნევთ კომპანიის კონკურენტულ უპირატესობად?

ჩვენი კონკურენტული უპირატესობა და ნიშა მაღალი ხარისხია. არ ვცვლით ინგრედიენტების დოზებს და არ ვიყენებთ დამატებით შენარევებს ყველაფერი სუფთა და ნატურალურია.

კომპანიის კონკურენტულ უპირატესობას, ხარისხთან ერთად, წარმოადგენს უნიკალური პროდუქტი - კუბდარის საკმაზი, რომელსაც მხოლოდ ჩვენ ვაწარმოებთ და ბაზარზე მისი ანალოგი არ არსებობს.

გვაქვს სახლური გემოები და მომხმარებელს ვთავაზობთ ზუსტად ისეთ პროდუქტს, როგორსაც თავად მივირთმევდით და მივირთმევთ.

- როგორია კომპანიის სამომავლო გეგმები?

პირველივე დღიდან ჩვენი მიზანია მომხმარებლებთან უშუალო კომუნიკაცია. სწორედ ამიტომ, მონაწილეობა მივიღეთ საშობაო ბაზრობაზე, სადაც მომხმარებლებს შევხვდით. მათ საშუალება ჰქონდათ, ადგილზე ენახათ და შეეფასებინათ ჩვენი პროდუქცია.

მომხმარებლების ინტერესის, მოთხოვნის და ასევე ჩვენი სურვილის გათვალისწინებით, სამომავლოდ ფიზიკური მაღაზიის გახსნას ვგეგმავთ, სადაც ნებისმიერ მსურველს შეეძლება მოსვლა და პროდუქციის ადგილზე დათვალიერება. გვინდა, ეს პროცესი იყოს უფრო კომფორტული როგორც მათთვის, ასევე ჩვენთვის.

ცნობისთვის, პროდუქციის შეძენა ამჟამად მხოლოდ ონლაინ არის შესაძლებელი.