მწვანე ქალაქი • Green City კომპანიაა, რომელიც უკვე სამი წელია ოპერირებს ქართულ ბაზარზე და მომხმარებელს სხვადასხვა სახის მცენარეებს სთავაზობს. როგორც Business Insider Georgia-სთან „მწვანე ქალაქის“ დამფუძნებელმა თაკო ცუცქირიძემ განაცხადა, მცენარეები საოჯახო მეურნეობაში გამოჰყავთ, საიდანაც მათ რეალიზაციასა და მიწოდებას მთელი საქართველოს მასშტაბით ახორციელებენ. 

„საქმიანობა დაახლოებით 3 წლის წინ დავიწყეთ. მომხმარებლებს ვთავაზობთ  წიწვოვანი და ფოთლოვანი მცენარეების ფართო ასორტიმნეტს, მიტანისა და დარგვის სერვისით “, - ამბობს კომპანიის დამფუძნებელი.

კომპანიის ასორტიმენტი საკმაოდ მრავალფეროვანია და დაახლოებით 30 ჯიშის მცენარეს აერთიანებს. მოთხოვნა საკმაოდ მზარდია.

"ამ ეტაპისთვის დაახლოებოთ 30 ჯიშის მცენარე გვაქვს გამოყვანილი ჩვენს სანერგეში. მოთხოვნა და ინტერესი  მომხმარებლების მხრიდან მუდმივად მზარდია“, - აღნიშნავს თაკო ცუცქირიძე.

კომპანია სხვადასხვა კონკურენტული უპირატესობით გამოირჩევა. ყველაზე მთავარი კი სანდოობაა.

„ჩვენი უპირატესობა სხვა კომპანიებთან შედარებით არის სანდოობა, რასაც ყოველთვის აღნიშნავს ჩვენი მომხმარებელი. იმედს არ ვუცრუებთ არასდროს და ხშირია შემთხვევები, როდესაც მათი რეკომენდაციის საფუძველზე სხვა მომხმარებლებიც მოდიან ჩვენთან. გარდა ამისა, ჩვენი ნერგები სხვა ნერგებისგან განსხვავებით ადგილზე იწარმოება და არ არის იმპორტირებული, ტორფში გამოყვანილი, ყველა ნერგი არის ადგილზე მოყვანილი, რაც უპირატესობაა გახარების თვალსაზრისით “, - აცხადებს კომპანიის დამფუძნებელი.

სამომავლოდ, კომპანია აქტიურად ფიქრობს გაფართოებაზე და ლოკაციის დამატებაზე.

„ძალიან გვინდა რომ თბილისში გვქონდეს სივრცე, სადაც ჩვენი ნერგები გვექნება წარმოდგენილი და მომხმარებელს ადგილზე მოსვლის შესაძლებლობა ექნება. ბევრი მსურველი გვყავს, რომელიც ლოკაციის გამო ვერ ახერხებს ჩვენამდე მოსვლას. ეს არის ჩვენი მთავარი სამომავლო მიზანი და სურვილი “, - განმარტავს თაკო ცუცქირიძე.

ცნობისთვის, „მწვანე ქალაქი“ კახეთში, ლაგოდეხის მუნიციპალიტეტის სოფელ კართუბანში მდებარეობს. მცენარეების მიწოდება მთელი საქართველოს მასშტაბით ხორციელდება და საშუალოდ 1-დან 2 დღემდეა საჭირო.